Brinda Karat | కార్పొరేట్ అనుకూల విధానాలతో వ్యవసాయ రంగానికి నష్టం : బృందా కారత్

Brinda Karat | దేశంలో రాజ్యాంగం, ప్రజాస్వామ్య సంస్థలు, లౌకిక విలువలు, సమానత్వ సూత్రాలను బలహీనపరిచే విధానాలను కేంద్రంలోని మోదీ ప్రభుత్వం అనుసరిస్తోందని బృందా కారత్ విమర్శించారు.

నల్గొండ : దేశంలో రాజ్యాంగం, ప్రజాస్వామ్య సంస్థలు, లౌకిక విలువలు, సమానత్వ సూత్రాలను బలహీనపరిచే విధానాలను కేంద్రంలోని మోదీ ప్రభుత్వం ( Modi Government ) అనుసరిస్తోందని బృందా కారత్ ( Brinda Karat ) విమర్శించారు. విదేశీ కంపెనీలు, కార్పొరేట్ సంస్థలు, పెద్ద వ్యవసాయ వ్యాపార సంస్థలకు అనుకూలంగా వ్యవసాయ విధానాలు రూపొందిస్తున్నారని ఆరోపించారు.

ఆదివారం నల్లగొండ పట్టణంలోని ఎన్జీ కళాశాల ప్రాంగణంలో 36వ అఖిల భారత కిసాన్ సభ మహాసభల సందర్భంగా నిర్వహించిన బహిరంగ సభలో ఆమె ముఖ్యఅతిథిగా పాల్గొని ప్రసంగించారు. మూడు వ్యవసాయ చట్టాలకు వ్యతిరేకంగా రైతులు సాగించిన పోరాటంతో కేంద్ర ప్రభుత్వం వెనక్కి తగ్గాల్సి వచ్చిందని గుర్తుచేశారు. అయినప్పటికీ రైతుల ప్రయోజనాలను కార్పొరేట్ సంస్థలకు అప్పగించే ప్రయత్నాలు కొనసాగుతున్నాయని అన్నారు.భారత్‌-అమెరికా వాణిజ్య ఒప్పందం వల్ల వివిధ రంగాల రైతులకు నష్టం కలిగే ప్రమాదం ఉందని పేర్కొన్నారు.

రైతులతో చర్చించకుండా ఇటువంటి ఒప్పందాలపై ముందుకు వెళ్లడం సరికాదన్నారు. ఆ ఒప్పందాన్ని నిలిపివేయాలని డిమాండ్ చేశారు. నల్లగొండ గడ్డపై జరిగిన తెలంగాణ సాయుధ రైతాంగ పోరాట వారసత్వాన్ని మతతత్వ రాజకీయాలకు ఆపాదించే ప్రయత్నాలను తిప్పికొట్టాలని మాజీ పార్లమెంట్ సభ్యురాలు, అఖిల భారత ప్రజాతంత్ర మహిళా సంఘం (ఐద్వా) జాతీయ నాయకురాలు బృందా కారత్ పిలుపునిచ్చారు. రైతులు, వ్యవసాయ కార్మికులు, గ్రామీణ పేదల హక్కుల కోసం కిసాన్ సభ తొమ్మిది దశాబ్దాలుగా పోరాడుతోందని పేర్కొన్నారు.

ఆదివాసీ నాయకుడు, స్వాతంత్ర్య సమరయోధుడు బిర్సా ముండా 151వ జయంతి సందర్భంగా ఆయనకు నివాళులర్పించారు. జల్, జంగిల్, జమీన్ హక్కుల కోసం ఆయన సాగించిన పోరాటాన్ని స్మరించుకున్నారు.అంతర్జాతీయ పరిణామాలు, యుద్ధాల ప్రభావంతో ధరలు పెరుగుతున్నాయని చెబుతున్న ప్రభుత్వం, ప్రజలపై పడుతున్న భారాన్ని తగ్గించేందుకు చర్యలు తీసుకోవాలని సూచించారు. రేషన్ దుకాణాల ద్వారా బియ్యం, పప్పులు, నూనెలు, ఇతర నిత్యావసర వస్తువులను సబ్సిడీపై అందించాలని కోరారు.
రైతు ఆత్మహత్యలు ఆగాలంటే విధానాలు మారాలి
దేశంలోని పలు ప్రాంతాల్లో రైతులు కరువు, వరదలతో తీవ్రంగా నష్టపోతున్నారని బృందా కారత్ అన్నారు. తెలంగాణలో కరువు పరిస్థితులు, పంట నష్టాలు రైతులను ఇబ్బందులకు గురిచేస్తు న్నాయని పేర్కొన్నారు. పంట నష్టానికి అందుతున్న పరిహారం సరిపోవడం లేదని, మరోవైపు బీమా కంపెనీలు లాభాలు పొందుతున్నాయని విమర్శించారు. రైతులకు పూర్తిస్థాయిలో పరిహారం అందించాలని, బీమా సంస్థల దోపిడీని అరికట్టాలని డిమాండ్ చేశారు.