PM Kisan | కఠినంగా పీఎం కిసాన్‌ నిబంధనలు.. అనర్హులుగా రిటైర్డ్‌, ప్రస్తుత ప్రభుత్వ ఉద్యోగులు

కేంద్ర ప్రభుత్వం రైతులకు పెట్టుబడి సాయం అందించే ప్రధానమంత్రి కిసాన్‌ సమ్మాన్‌ యోజన పథకం నిబంధనలు అత్యంత కఠినంగా ఉన్నాయి.

PM Kisan | హైదరాబాద్‌, జూలై 15 (నమస్తే తెలంగాణ): కేంద్ర ప్రభుత్వం రైతులకు పెట్టుబడి సాయం అందించే ప్రధానమంత్రి కిసాన్‌ సమ్మాన్‌ యోజన పథకం నిబంధనలు అత్యంత కఠినంగా ఉన్నాయి. ఈ నిబంధనల కారణంగా చాలామంది ఈ పథకానికి అనర్హులవుతున్నారు. 2019 ఫిబ్రవరి 1వ తేదీ నాటికి అర్హత పొందినవారికి మాత్రమే ప్రస్తుతం ఈ పథకాన్ని అమలుచేస్తున్నారు. మళ్లీ నాటి నుంచి ఐదేండ్ల వరకు నిబంధనలు మార్చేందుకు అవకాశం లేదు.

ఇలాంటి కఠిన నిబంధనలను ఇప్పుడు రాష్ట్ర ప్రభుత్వం రైతు రుణమాఫీకి అమలు చేయాలని నిర్ణయించింది. రుణమాఫీ అమలుకు ఈ నిబంధనలను వీలైనంత మేరకు వర్తింపచేయాలని నిర్ణయించింది. దీంతో రుణమాఫీకి లక్షల మంది అనర్హులయ్యే ప్రమాదం ఏర్పడింది. రిటైర్డ్‌, ప్రస్తుత ప్రభుత్వ ఉద్యోగులు ఈ నిబంధనల వల్ల అత్యధికంగా నష్టపోయే అవకాశం ఉన్నది.

పీఎం కిసాన్‌కు అనర్హులు

• రాజ్యాంగబద్ధమైన పదవుల్లో ఉన్నవారికి ఈ పథకం వర్తించదు. ప్రస్తుతం పదవుల్లో ఉన్నవారితోపాటు మాజీల కు ఈ పథకం వర్తించదు. మాజీ, ప్రస్తుత మంత్రులు, ఎంపీలు, ఎమ్మెల్యేలు, ఎమ్మెల్సీలు, మేయర్లు, జడ్పీ చైర్మన్లు ఈ పథకానికి అనర్హులు.
  రిటైర్డ్‌, ప్రభుత్వ ఉద్యోగులకు కూడా పీఎం కిసాన్‌ వర్తించదు.
• అనర్హుల జాబితాలో కేంద్ర, రాష్ట్ర ప్రభుత్వ ఉద్యోగులు, ప్రభుత్వరంగ సంస్థల్లో పనిచేసే వారు, ప్రభుత్వ ఆధీనంలో ని స్వతంత్ర సంస్థల్లో పని చేసేవారు, స్థానిక సంస్థల్లోని ఉద్యోగులు ఉన్నారు.
• ఉద్యోగాల్లో రిటైర్డ్‌ అయి ప్రతి నెల రూ.10 వేల కన్నా ఎక్కువగా పెన్షన్‌ తీసుకునేవారూ పథకానికి అనర్హులే.
• ఆదాయపు పన్ను(ఐటీ) చెల్లించేవారు కూడా ఈ పథకానికి అనర్హులు.
• డాక్టర్లు, ఇంజినీర్లు, లాయర్లు, చార్డర్ట్‌ అకౌంటెంట్లు, ఆర్కిటెక్ట్స్‌కు పీఎం కిసాన్‌ వర్తించదు.
• ఎన్‌ఆర్‌ఐ కుటుంబాలకు వర్తించదు.