ఫార్మసీకి కొత్త ఫీజులు

రాష్ట్రంలోని ఫార్మసీ సహా పలు కోర్సుల్లో కొత్త ఫీజులు అమల్లోకి రానున్నాయి. బీ ఫార్మసీ, ఫార్మా -డీ కోర్సులతోపాటు, బ్యాచిలర్‌ ఆఫ్‌ ఆర్కిటెక్చర్‌ (బీఆర్క్‌), బ్యాచిలర్‌ ఆఫ్‌ ఫైన్‌ ఆర్ట్స్‌(బీఎఫ్‌ఏ) కోర్సుల ఫీజులు సైతం పెరిగాయి.

హైదరాబాద్‌, మే 31 (నమస్తే తెలంగాణ): రాష్ట్రంలోని ఫార్మసీ సహా పలు కోర్సుల్లో కొత్త ఫీజులు అమల్లోకి రానున్నాయి. బీ ఫార్మసీ, ఫార్మా -డీ కోర్సులతోపాటు, బ్యాచిలర్‌ ఆఫ్‌ ఆర్కిటెక్చర్‌ (బీఆర్క్‌), బ్యాచిలర్‌ ఆఫ్‌ ఫైన్‌ ఆర్ట్స్‌(బీఎఫ్‌ఏ) కోర్సుల ఫీజులు సైతం పెరిగాయి. ఇవే కాకుండా ఎం ఫార్మసీ, ఎం ఆర్క్‌ వంటి కోర్సుల ఫీజులు కూడా పెరిగాయి. ఆయా కోర్సుల్లో చేరేవారు ఇక నుంచి పెంచిన ఫీజులను కట్టాల్సిందే. వాస్తవానికి ఈ ఫీజులు గతేడాదే పెరిగాయి. కానీ అప్పటికే కౌన్సెలింగ్‌ పూర్తయ్యింది. దీంతో కౌన్సెలింగ్‌ సమయంలో పెంచిన ఫీజులను వర్తింపజేయలేదు. కానిప్పుడు కౌన్సెలింగ్‌ సమయంలోనే విద్యార్థులు పెంచిన ఫీజులు కట్టాల్సి ఉంటుంది. ఫీజు రీయింబర్స్‌మెంట్‌ గల వారికి ఫీజులను మినహాయిస్తారు.

పెరిగిన ఫీజుల వివరాలు

• బీ ఫార్మసీ కోర్సును 120 కాలేజీల్లో నిర్వహిస్తున్నారు. కనిష్ట ఫీజు రూ. 45వేలు, గరిష్ట ఫీజు రూ.1.10లక్షలుగా ఉంది.
• ఫార్మా(డీ)కోర్సును 68 కాలేజీల్లో నిర్వహిస్తున్నారు. ఈ కోర్సు కనిష్ట ఫీజు రూ. 55వేలు, గరిష్ట ఫీజుగా రూ.1.25లక్షలు ఖరారుచేశారు.
• ఎం ఫార్మసీ కోర్సును నిర్వహించే కాలేజీలు రాష్ట్రంలో114 ఉండగా, గరిష్ట ఫీజు రూ.1. 25లక్షలు, కనిష్ట ఫీజు రూ.1.10 లక్షలుగా ఉంది.
• ఫార్మసీ(డీ)పీబీ కోర్సును 29 కాలేజీల్లో నిర్వహిస్తున్నారు. వీటిల్లో గరిష్ట ఫీజు రూ.1.15లక్షలుండగా, కనిష్ట ఫీజు రూ.68వేలుగా ఉంది.
• ఎం ఆర్క్‌ (ఆర్కిటెక్చర్‌) కోర్సును రాష్ట్రంలో ఏడు కాలేజీల్లో నిర్వహిస్తున్నారు. వీటిల్లో గరిష్ట ఫీజు రూ. 80వేలు, కనిష్ట ఫీజు రూ.70వేలుగా ఉంది.
• బీ ఆర్క్‌ కోర్సును 9కాలేజీల్లో నిర్వహిస్తుండగా గరిష్టంగా రూ.1. 20లక్షలు, కనిష్టంగా రూ.65వేలుగా ఖరారుచేశారు.
• బీఎఫ్‌ఏ కోర్సును మూడు కాలేజీల్లో నిర్వహిస్తుండగా మూడింటిలోనూ రూ. 35వేలు ఫీజుగా ఉంది.