దుబ్బాకను కరువు ప్రాంతంగా ప్రకటించాలి : ఎమ్మెల్యే కొత్త ప్రభాకర్ రెడ్డి

రాష్ట్రంలో నెలకొన్న కరువు పరిస్థితులను దృష్టిలో పెట్టుకుని దుబ్బాక నియోజకవర్గాన్ని వెంటనే కరువు ప్రాంతంగా ప్రకటించాలని, నిధుల కొరతతో ఆగిపోయిన అభివృద్ధి పనులు పున ప్రారంభించాలని ఎమ్మెల్యే కొత్త ప్రభాకర్ రెడ్డి డిమాండ్ చేశారు.

రాయపోల్:నవంబర్ 11 : రాష్ట్రంలో నెలకొన్న కరువు పరిస్థితులను దృష్టిలో పెట్టుకుని దుబ్బాక నియోజకవర్గాన్ని వెంటనే కరువు ప్రాంతంగా ప్రకటించాలని, నిధుల కొరతతో ఆగిపోయిన అభివృద్ధి పనులు పున ప్రారంభించాలని ఎమ్మెల్యే కొత్త ప్రభాకర్ రెడ్డి డిమాండ్ చేశారు. బీఆర్ఎస్ ఎమ్మెల్యే ఉన్నందుకే నిధులు ఇవ్వడంలో వివక్ష చూపుతున్నారంటే, రైతుల కోసం తన ఎమ్మెల్యే పదవికి రాజీనామా చేసేందుకు సిద్ధంగా ఉన్నానని సవాల్‌ విసిరారు. నియోజకవర్గంలోని రైతులు ఎదుర్కొంటున్న సాగునీటి సమస్యలను ప్రభుత్వం తక్షణమే పరిష్కరించాలని డిమాండ్‌ చేశారు. రైతుల కష్టాలను గుర్తించి వారికి అండగా నిలవాల్సిన బాధ్యత ప్రభుత్వంపై ఉందని పేర్కొన్నారు.

బుధవారం సిద్దిపేట జిల్లా రాయపోల్ అనాజీపూర్ గ్రామంలో ధాన్యం కొనుగోలు ప్రారంభంలో ఎస్సీ, ఎస్టీ కమిషన్ మాజీ చైర్మన్ బక్కి వెంకటయ్యతో కలిసి ఎమ్మెల్యే పాల్గొన్నారు. ఈ సందర్భంగా ఆయ‌న‌ మాట్లాడుతూ దుబ్బాక నియోజకవర్గంలో ఏళ్ల తరబడి పెండింగ్‌లో ఉన్న సాగునీటి కాల్వల పనులను వెంటనే పూర్తి చేయాలని డిమాండ్‌ చేశారు. వివిధ కారణాలతో మధ్యలోనే నిలిచిపోయిన అభివృద్ధి పనులను తిరిగి ప్రారంభించి, అవసరమైన నిధులు కేటాయించి పూర్తిచేయాలని కోరారు. సాగునీటి వసతి లేక రైతులు తీవ్ర ఇబ్బందులు ఎదుర్కొంటు న్నారని, పంటలు ఎండిపోయి పెట్టుబడులు నష్టపోయే పరిస్థితి నెలకొందని ఆవేదన వ్యక్తం చేశారు.

ప్రభుత్వం ఇప్పటికైనా స్పందించి సాగునీటి సమస్యకు శాశ్వత పరిష్కారం చూపాలని సూచించారు. రాజకీయ కక్షసాధింపు ధోరణితో వ్యవహరించడం వల్ల నష్టపోయేది రైతులేనని అన్నారు. బీఆర్ఎస్‌ పార్టీపై ఉన్న రాజకీయ కోపాన్ని రైతులపై చూపించడం సరికాదని, పార్టీలకు అతీతంగా రైతుల సంక్షేమానికి ప్రాధాన్యత ఇవ్వాలని హితవు పలికారు. రైతులకు సాగునీరు అందించడం, పంటలను కాపాడటం ప్రభుత్వ ప్రథమ కర్తవ్యమని స్పష్టం చేశారు. అలాగే సిద్దిపేట జిల్లాలోని అన్ని నియోజకవర్గాలు, మండలాలు, గ్రామాలకు సమాన ప్రాధాన్యతనిస్తూ అభివృద్ధి కార్యక్రమాలు చేపట్టాలని కోరారు. దుబ్బాక నియోజకవర్గ రైతులకు న్యాయం జరిగే వరకు తమ పోరాటం కొనసాగిస్తామని స్పష్టం చేశారు.

కార్యక్రమంలో గ్రామ సర్పంచ్ నిర్మల, మండల సర్పంచుల పోరం అధ్యక్షులు రేకుల నర్సింహారెడ్డి,
మాజీ జెడ్పిటిసి యాదగిరి, మంతూర్ సర్పంచ్ పర్వేజ్ అహ్మద్, మాసంపల్లి రాజు, ఉప సర్పంచ్ లు సంతోష్ కుమార్‌, హనుమంతు రాజు, మండల పార్టీ ఉపాధ్యక్షులు కొత్తపల్లి సత్యం, వెంకట్ గౌడ్, బాగిరెడ్డి, బీఆర్ఎస్ రాష్ట్ర యువజన నాయకులు రాజిరెడ్డి, ఇప్ప దయాకర్, గల్వ దయాకర్ రెడ్డి, మండల నాయకులు మల్లారెడ్డి, శ్రీధర్, భార్గవ్, బుజ్జి, రాజారాం మధు, తదితరులు పాల్గొన్నారు.