హైదరాబాద్ : జనాలు స్వచ్ఛమైన గాలిని పీల్చడం గగనమవుతోంది. వాహనాలు, పరిశ్రమల నుంచి వెలువడే పొగతో హైదరాబాద్ ప్రజలు ఉక్కిరిబిక్కిరి అవుతున్నారు. నగరంలోని కొన్ని ప్రాంతాల్లోనే స్వచ్ఛమైన గాలి లభిస్తుంది. మరి ఆ ప్రాంతం ఏది అంటే.. జూబ్లీహిల్స్, మరొకటి ఉప్పల్ అని తేలింది.
కొద్ది రోజుల క్రితం తెలంగాణ రాష్ట్ర కాలుష్య నియంత్రణ మండలి ( TSPCB ) విడుదల చేసిన ఎయిర్ క్వాలిటీ ఇండెక్స్ ( AQI ) రిపోర్టులో ఈ విషయం వెల్లడి అయింది. సిటీలోనే నాణ్యమైన గాలి లభించేది జూబ్లీహిల్స్ అని ఆ నివేదికలో పేర్కొన్నారు. ఉప్పల్ ఇండస్ర్టియల్ ఏరియా అయినప్పటికీ అక్కడ కూడా గుడ్ ఎయిర్ క్వాలిటీ ఉందని తెలిపారు.
సెప్టెంబర్ 7వ తేదీన జూబ్లీహిల్స్, ఉప్పల్లో 30 నుంచి 50 మధ్య గాలి నాణ్యత నమోదైంది. సెప్టెంబర్ మొదటి వారంలో జూబ్లీహిల్స్లో గాలి నాణ్యత గుడ్ లెవల్లో ఉంది. ఇదే సమయంలో ఉప్పల్లో గాలి నాణ్యత సంతృప్తికరంగా ఉంది. ఈ రెండు ఏరియాలతో పాటు బాలానగర్, ప్యారడైజ్, చార్మినార్ ప్రాంతాల్లో గాలి నాణ్యత సంతృప్తికరంగా ఉంది. జీడిమెట్లలో గాలి నాణ్యతలో ఎలాంటి మార్పు లేదు.
గాలి నాణ్యత 0-50 మధ్య ఉంటే దాన్ని గుడ్ అని పరిగణిస్తారు. 51-100 మధ్య ఉంటే సంతృప్తికరమని.. 101-200 మధ్య ఉంటే ఓ మాదిరి అని.. 201-300 మధ్య ఉంటే పూర్ అని.. 301-400 మధ్య ఉంటే వెరీ పూర్.. 400 లోపు ఉంటే తీవ్రమని పేర్కొంటారు.