చచ్చినా పింఛన్‌ ఆగలె!

ఆసరా పింఛన్‌ తీసుకునే వృద్ధుడు మృతి చెందినా.. అతడి పేరుపై పింఛన్‌ డబ్బులను తీసుకున్న ఘటన నాగర్‌కర్నూల్‌ జిల్లాలో చోటుచేసుకున్నది.

• 3 నెలలుగా డబ్బులిచ్చినట్టు రికార్డులో నమోదు

కొల్లాపూర్‌, జూన్‌ 3 : ఆసరా పింఛన్‌ తీసుకునే వృద్ధుడు మృతి చెందినా.. అతడి పేరుపై పింఛన్‌ డబ్బులను తీసుకున్న ఘటన నాగర్‌కర్నూల్‌ జిల్లాలో చోటుచేసుకున్నది. వివరాల్లోకెళ్తే.. కొల్లాపూర్‌ మండలం నార్లాపూర్‌కు చెందిన జీ లక్ష్మయ్య (63) ఈ ఏడాది ఫిబ్రవరి 7న మరణించాడు. అయితే, గ్రామపంచాయతీ పింఛన్‌ రిజిస్టర్‌లో లక్ష్మయ్య పేరుతో పింఛన్‌ డబ్బులు వచ్చినట్టు ఉండటంతో అనుమానంతో కుటుంబ సభ్యులు సోమవారం కొల్లాపూర్‌ ఎంపీడీవో ఆఫీసుకెళ్లి ఆరా తీశారు. మూడు నెలలుగా రూ.6 వేలు చనిపోయిన వ్యక్తి పేరుపై డబ్బులు డ్రా చేసిట్టు బయటపడింది. ఈ విషయం తెలిసి సంబంధిత పంచాయతీ కార్యదర్శి ఈశ్వరయ్య వెంటనే మృతుడి కుమారుడు రాముడు ఫోన్‌కు పింఛన్‌ మొత్తాన్ని డిజిటల్‌ పేమెంట్‌ చేశారు. ఈ విషయమై వివరణ కోరేందుకు ప్రయత్నించగా.. కార్యదర్శి ఫోన్‌లో అందుబాటులోకి రాలేదు.