మురుగునీటి శుద్ధిలో హైదరాబాద్‌ ఆదర్శం

హైదరాబాద్‌లో నూటికి నూరు శాతం మురుగునీటిని శుద్ధి చేయాలన్న ప్రభుత్వ లక్ష్యానికి జలమండలి చేరువైంది. దేశంలోని ఏ మెట్రో నగరాల్లో లేని విధంగా రూ.3,866.41 కోట్ల వ్యయంతో 31 ప్రాంతాల్లో మురుగునీటి శుద్ధి కేంద్రాల (ఎస్టీపీ) ఏర్పాటుకు శ్రీకారం చుట్టింది.

• రేపు 5 ప్రాంతాల్లో ఎస్టీపీలు ప్రారంభం

హైదరాబాద్‌ సిటీబ్యూరో, అక్టోబర్‌ 6 (నమస్తే తెలంగాణ): హైదరాబాద్‌లో నూటికి నూరు శాతం మురుగునీటిని శుద్ధి చేయాలన్న ప్రభుత్వ లక్ష్యానికి జలమండలి చేరువైంది. దేశంలోని ఏ మెట్రో నగరాల్లో లేని విధంగా రూ.3,866.41 కోట్ల వ్యయంతో 31 ప్రాంతాల్లో మురుగునీటి శుద్ధి కేంద్రాల (ఎస్టీపీ) ఏర్పాటుకు శ్రీకారం చుట్టింది. వీటిలో ఇప్పటికే కోకాపేట, దుర్గంచెరువు వద్ద ఎస్టీపీలను ప్రారంభించింది. ఈ నెల 8న మరో ఐదు చోట్ల ఎస్టీపీలను మంత్రి కేటీఆర్‌ ప్రారంభించనున్నారు. మీర్‌ఆలం (41.5 ఎంఎల్‌డీ), నల్లచెరువు (86.5), పెద్దచెరువు (17.5 ఎంఎల్‌డీ), ఫతేనగర్‌ (133 ఎంఎల్‌డీ), ఖాజాకుంట (20 ఎంఎల్‌డీ), మియాపూర్‌ పటేల్‌చెరువు (7 ఎంఎల్‌డీ) ఎస్టీపీల ప్రారంభానికి జలమండలి అధికారులు ఏర్పాట్లు పూర్తిచేశారు. 878 ఎంఎల్‌డీల మురుగునీటి శుద్ధి ప్రక్రియను త్వరలో చేపట్టాలని భావిస్తున్న జలమండలి.. 31 చోట్ల ఎస్టీపీల నిర్మాణం చేపట్టింది. వీటిలో 24 చోట్ల ఎస్టీపీల పనులు తుది దశలో ఉన్నాయి. ఈ నెలాఖరు నాటికి మొత్తం అన్ని ఎస్టీపీలను అందుబాటులోకి తేవడం ద్వారా మురుగునీటి శుద్ధిలో హైదరాబాద్‌ను దేశానికే ఆదర్శంగా నిలిపేందుకు జలమండలి కసరత్తు చేస్తున్నది.