బీఆర్‌ఎస్‌ స్థలంలో నిర్మాణాల నిలిపివేతకు హైకోర్టు నిరాకరణ

రంగారెడ్డి జిల్లా కోకాపేటలోని 230, 240 సర్వే నంబర్లలో భారత రాష్ట్ర సమితి (బీఆర్‌ఎస్‌)కి కేటాయించిన 11 ఎకరాల భూమి లో నిర్మాణాలు చేపట్టకుండా ఉత్తర్వులు జారీ చేసేందుకు హైకోర్టు నిరాకరించింది. ఇప్పటికే ఆ భూమిలో బీఆర్‌ఎస్‌ ఏమైనా నిర్మాణాలను చేపట్టినట్టయితే తమ దృష్టికి తీసుకురావచ్చని పిటిషనర్లకు సూచించింది.

హైదరాబాద్‌, జూలై 24 (నమస్తే తెలంగాణ): రంగారెడ్డి జిల్లా కోకాపేటలోని 230, 240 సర్వే నంబర్లలో భారత రాష్ట్ర సమితి (బీఆర్‌ఎస్‌)కి కేటాయించిన 11 ఎకరాల భూమి లో నిర్మాణాలు చేపట్టకుండా ఉత్తర్వులు జారీ చేసేందుకు హైకోర్టు నిరాకరించింది. ఇప్పటికే ఆ భూమిలో బీఆర్‌ఎస్‌ ఏమైనా నిర్మాణాలను చేపట్టినట్టయితే తమ దృష్టికి తీసుకురావచ్చని పిటిషనర్లకు సూచించింది. ఆ భూమి తమకు వారసత్వంగా వచ్చిందని, దాన్ని బీఆర్‌ఎస్‌కు కేటాయించడం చెల్లదని పేర్కొంటూ కొందరు ప్రైవేట్‌ వ్యక్తులు దాఖలు చేసిన వ్యాజ్యాలపై జస్టిస్‌ కే లక్ష్మణ్‌ బుధవారం విచారణ జరిపారు. ఈ వ్యాజ్యాలపై కౌంటర్‌ దాఖలు చేయాలని బీఆర్‌ఎస్‌కు నోటీసులు జారీ చేశారు. ఈ వ్యవహారంలో ప్రభుత్వం కూడా వివరణ ఇవ్వాలని కోరుతూ.. తదుపరి విచారణను ఆగస్టు 2కు వాయిదా వేశారు.