డెడికేటెడ్‌ కమిషన్‌ రిపోర్టు ఉండేది ఇలాగేనా?.. హైకోర్టు తీవ్ర అసంతృప్తి

రాష్ట్రంలో బీసీలపై అధ్యయనం చేసిన డెడికేటెడ్‌ కమిషన్‌ ఇచ్చిన నివేదికపై రాష్ట్ర హైకోర్టు తీవ్ర అసంతృప్తి వ్యక్తంచేసింది. ఇది రిపోర్టేనా అని నిలదీసింది. దీనికి కనీసం కవరింగ్‌ లెటర్‌ కూడా లేదని, రిపోర్టు సారాంశం ఏమిటో కూడా లేదని తప్పు పట్టింది.

హైదరాబాద్‌, నవంబర్‌ 28 (నమస్తే తెలంగాణ): రాష్ట్రంలో బీసీలపై అధ్యయనం చేసిన డెడికేటెడ్‌ కమిషన్‌ ఇచ్చిన నివేదికపై రాష్ట్ర హైకోర్టు తీవ్ర అసంతృప్తి వ్యక్తంచేసింది. ఇది రిపోర్టేనా అని నిలదీసింది. దీనికి కనీసం కవరింగ్‌ లెటర్‌ కూడా లేదని, రిపోర్టు సారాంశం ఏమిటో కూడా లేదని తప్పు పట్టింది. రిపోర్టు పేరుతో గణాంకాలు ఇచ్చారని ఆగ్రహం వ్యక్తంచేసింది. గ్రామ పంచాయతీ పదవులకు రిజర్వేషన్లు ఖరారు చేస్తూ రాష్ట్ర ప్రభుత్వం జారీచేసిన జీవో 46ను సవాల్‌ చేస్తూ వికారాబాద్‌ జిల్లా నవాబ్‌పేట మండలం అత్తాపూర్‌ గ్రామానికి చెందిన జీ రమేశ్‌గౌడ్‌ మరొకరు వేర్వేరుగా దాఖలు చేసిన రెండు అత్యవసర లంచ్‌మోషన్‌ పిటిషన్లపై జస్టిస్‌ టీ మాధవీదేవి శుక్రవారం విచారణ జరిపారు.

ఈ సందర్భంగా ఆమె బీసీలపై అధ్యయనం చేసిన డెడికేటెడ్‌ కమిషన్‌ సమర్పించిన నివేదికను ఎందుకు బహిర్గతం చేయలేదని ప్రభుత్వాన్ని నిలదీశారు. నివేదికను బహిర్గతం చేస్తే వచ్చే నష్టమేమిటని ప్రశ్నించారు. నివేదికను తమకు సమర్పించాల్సిందేనని, దానిని పరిశీలించాకే తగిన నిర్ణయం తీసుకుంటామని తేల్చి చెప్పారు. దీంతో ప్రభుత్వం సాయంత్రం సీల్డ్‌ కవర్‌లో మూడు వాల్యూమ్‌లతో కూడిన నివేదికను కోర్టుకు సమర్పించింది. వాటిని పరిశీలించిన హైకోర్టు తీవ్ర అసంతృప్తి వ్యక్తంచేసింది. రిపోర్టుపై తేదీ కూడా లేదని, ఆఖరికి సంతకం కూడా లేదని ఆక్షేపించింది. అసలు ఇది రిపోర్టే కాదని వ్యాఖ్యానించింది. రిపోర్టు పేరుతో డాటా ఇచ్చారని మండిపడింది. ఈ నెల 20వ తేదీ అని చెప్పి ఇచ్చిన రిపోర్టు పాతదేనని తెలిపింది. ఒకటి, రెండు వాల్యూమ్స్‌ రెండూ ఫిబ్రవరి 25వ తేదీ నాటివని, ఈ రెండింటినీ క్రోడీకరించి ఈ నెల 25వ తేదీ వేసి రిపోర్టు పేరుతో సమర్పించారని ఆక్షేపించింది. ఇక పంచాయతీ ఎన్నికల ప్రక్రియ ప్రారంభమైనందున జీవో 46పై స్టే ఇవ్వడం లేదని స్పష్టం చేసింది. తదుపరి విచారణను న్యాయమూర్తి నాలుగు వారాలకు వాయిదా వేశారు.

స్టే ఇస్తే ఎన్నికల ప్రక్రియ ఆగిపోతుంది

జీవో 46 అమలును నిలిపివేస్తూ మధ్యంతర స్టే ఉత్తర్వులు ఇవ్వబోమని హైకోర్టు స్పష్టం చేసింది. స్టే ఉత్తర్వులు ఇస్తే పంచాయతీ ఎన్నికల ప్రక్రియ నిలిచిపోతుందని పేర్కొంది. జీవో 46పై స్టే కోరడమే పిటిషనర్ల అభ్యర్థన అయితే అది ఎన్నికలను నిలిపివేయాలని కోరడమేనని అభిప్రాయపడింది. ఇందుకు కోర్టు ఎంతమాత్రం సుముఖంగా లేదని తేల్చిచెప్పింది. ఎన్నికల ప్రక్రియను కోర్టు నిలిపివేయబోదని స్పష్టంచేసింది. ఇదే తరహా అభ్యర్థనలతో ప్రధాన న్యాయమూర్తి బెంచ్‌ ముందు కూడా మరో పిటిషన్‌ పెండింగ్‌లో ఉన్నందున తాము ఎలాంటి ఉత్తర్వులు ఇవ్వబోమని చెప్పింది.

ఎన్నికలు వాయిదా వేయండి: బీఎస్‌ప్రసాద్‌

ఈ దశలో పిటిషనర్‌ తరఫు సీనియర్‌ న్యాయవాది బీఎస్‌ ప్రసాద్‌ కల్పించుకుంటూ.. జీవో 46 ప్రకారం రిజర్వేషన్ల ప్రక్రియ లోపభూయిష్టంగా ఉన్నందున ఎన్నికలు వాయిదా వేసేందుకు వీలుగా మధ్యంతర ఉత్తర్వులు జారీ చేయాలని కోరారు. రిజర్వేషన్ల ప్రక్రియ రాజ్యాంగబద్ధంగా లేదని చెప్పారు. గతంలో కూడా బీసీలకు 42 శాతం రిజర్వేషన్లు కల్పిస్తూ ప్రభుత్వం జీవో జారీచేసిందని తెలిపారు. అప్పుడు కూడా ఎన్నికల నోటిఫికేషన్‌ జారీ అయినప్పటికీ ఇదే హైకోర్టు జీవోను రద్దు చేసిందని గుర్తుచేశారు. ఎన్నికలు వాయిదా వేయని పక్షంలో జీవో 46 ప్రకారం ఖరారుచేసిన రిజర్వేషన్లకు అనుగుణంగా వార్డులు, సర్పంచ్‌ పదవులకు ఎన్నికలు జరిగిపోతాయని చెప్పారు. ఈ ఎన్నికలకు డెడికేటెడ్‌ కమిషన్‌ సిఫారసులు కూడా చాలా కీలకమని తెలిపారు. ఈ దశలో ఎన్నికల ప్రక్రియపై స్టే జారీకి బదులుగా ఎన్నికలు వాయిదా వేస్తూ ఉత్తర్వులు జారీచేయాలని కోరారు.

ఎన్నికల ప్రక్రియలో జోక్యం తగదు: ఏజీ

రాష్ట్ర ప్రభుత్వం తరఫున అడ్వకేట్‌ జనరల్‌ ఏ సుదర్శన్‌రెడ్డి స్పందిస్తూ.. ఎన్నికల ప్రక్రియ మొదలైన తర్వాత కోర్జులు జోక్యం చేసుకోవడానికి వీల్లేదని చెప్పారు. సుప్రీంకోర్టు వెలువరించిన పలు తీర్పుల ప్రకారం ఎన్నికల నోటిఫికేషన్‌ తర్వాత లేవనెత్తే అంశాలు ఎన్నికల పిటిషన్లు అవుతాయని, రిట్‌ పిటిషన్లపై విచారణ చేయాల్సిన అవసరం లేదని అన్నారు. గతంలో రిజర్వేషన్లు 50 శాతం దాటడంతో దానికి సంబంధించిన జీవోను కోర్టు కొట్టివేసిందని చెప్పారు. రిజర్వేషన్లను కొట్టివేసినా మిగిలిన సీట్లను ఓపెన్‌ క్యాటగిరీ కింద పరిగణించి ఎన్నికలు నిర్వహించేందుకు అనుమతించిందని గుర్తుచేశారు. తాము డెడికేటెడ్‌ కమిషన్‌ రిపోర్టును చదవలేదని, కోర్టు కోరిన వెంటనే అందజేశామని ప్రభుత్వ న్యాయవాది చెప్పారు.

జీవో 46 వల్ల బీసీలకు తీరని అన్యాయం

ప్రభుత్వం సమర్పించిన రిపోర్టులో ఏమీ లేదని న్యాయవాది బీఎస్‌ ప్రసాద్‌ చెప్పారు. బీసీలకు తీరని అన్యాయం జరిగేలా జీవో 46 ఉన్నదని తెలిపారు. జీవో 46లోని లోపాలను సవరించాక ఎన్నికలు జరిపేందుకు వీలుగా ఆదేశాలివ్వాలని కోరారు. రిజర్వేషన్ల ఖరారు తప్పుల తడకగా ఉన్నదని చెప్పారు. జీవో ద్వారా గైడ్‌లైన్స్‌ జారీచేసి రిజర్వేషన్లు ఖరారు చేయడం చట్టవ్యతిరేకమని అన్నారు. ఇది రాజ్యాంగంలోని అధికరణ 243డీ, పంచాయతీరాజ్‌ చట్టంలోని సెక్షన్‌ 9, 17లకు వ్యతిరేకమని తెలిపారు. బీసీలకు రిజర్వేషన్లు పెంచాలన్న లక్ష్యంతో ప్రభుత్వం ఏర్పాటుచేసిన ప్రత్యేక కమిషన్‌ 2000 సంవత్సరంలోనే రిపోర్టు ఇచ్చిందని తెలిపారు. ఆ రిపోర్టును ఇప్పటివరకు బహిర్గతం చేయలేదని చెప్పారు.

రాష్ట్ర ఎన్నికల సంఘం తరఫున సీనియర్‌ న్యాయవాది జీ విద్యాసాగర్‌ వాదనలు వినిపిస్తూ హైకోర్టు బీసీలకు 42 శాతం రిజర్వేషన్లను రద్దు చేయడంతో తాము జారీచేసిన ఎన్నికల నోటిఫికేషన్‌ అమలును నిలిపివేశామని తెలిపారు. అంతేగానీ రద్దు చేయలేదని చెప్పారు. వాదనలపై న్యాయమూర్తి స్పందిస్తూ ఎన్నికల ప్రక్రియపై హైకోర్టు డివిజన్‌ బెంచ్‌ స్టే ఇవ్వలేదని గుర్తుచేశారు. జీవో 46 అమలును నిలిపివేస్తూ స్టే ఆదేశాలు వెలువరిస్తే.. అది ఎన్నికల ప్రక్రియ నిలిపివేయడమే అవుతుందని కాబట్టి స్టే ఇవ్వబోమని తేల్చి చెప్పారు. ప్రస్తుతం తమ ముందు 285-ఏ, రిజర్వేషన్లను ఏ, బీ, సీ, డీలుగా వర్గీకరించాలన్న అంశాలు ఉన్నాయని చెప్పారు. ప్రతివాదులు తమ వాదనలతో కౌంటర్లు దాఖలు చేయాలని నోటీసులు జారీచేశారు. తదుపరి విచారణను నాలుగు వారాలకు వాయిదా వేశారు.

జోక్యానికి డివిజన్‌ బెంచ్‌ నిరాకరణ

పంచాయతీ ఎన్నికల ప్రక్రియలో జోక్యం చేసుకోబోమని ప్రధాన న్యాయమూర్తి జస్టిస్‌ అపరేశ్‌కుమార్‌సింగ్‌, జస్టిస్‌ జీఎం మొహియుద్దీన్‌తో కూడిన ధర్మాసనం తేల్చి చెప్పింది. పంచాయతీ పదవులకు రిజర్వేషన్ల కేటాయిం పు ప్రక్రియను సవాల్‌ చేస్తూ చీఫ్‌ జస్టిస్‌ ధర్మాసనం ముందు కూడా పలు పిటిషన్లు దాఖలయ్యాయి. వీటిపై శుక్రవారం విచారణ జరిపిన డివిజన్‌ బెంచ్‌ ఎన్నికల ప్రక్రియలో జోక్యం చేసుకోలేమని తేల్చి చెప్పింది. జనాభా ప్రాతిపదికన రిజర్వేషన్లు కేటాయించలేదని, ఎస్టీలు లేనిచోట ఆ వర్గానికి రిజర్వు చేశారంటూ దా ఖలైన పలు పిటిషన్లను హైకోర్టు విచారించింది. రాష్ట్ర ప్రభుత్వంతోపాటు ఎన్నికల సంఘానికి నోటీసులు జారీచేస్తూ విచారణను ఎనిమిది వారాలకు వాయిదా వేసింది. ఆరు వారాల్లో కౌంటర్లు దాఖలు చేయాలని, ఆ తరువాత 2 వారాల్లో పిటిషనర్‌ రిప్లయ్‌ కౌంటరు దాఖలు చేయాలని ఆదేశించింది.