Visit:
TG Weather | తెలంగాణలో మరోమూడు రోజులు భారీ వర్షాలు కురిసే అవకాశం ఉందని హైదరాబాద్‌ వాతావరణ కేంద్రం హెచ్చరించింది. ఈ క్రమంలో ఆయా జిల్లాలకు ఎల్లో అలెర్ట్‌ జారీ చేసింది. బుధవారం ఆసిఫాబాద్‌, మంచిర్యాల జిల్లాల్లో భారీ వర్షాలకు పడే అవకాశం ఉందని పేర్కొంది. పలుచోట్ల తేలికపాటి నుంచి మోస్తరు వానలు పడుతాయని.. మరికొన్ని చోట్ల ఉరుములు, మెరుపులు, ఈదురుగాలులతో కూడిన వానలు పడే సూచనలున్నాయని పేర్కొంది.
గురువారం ఆదిలాబాద్‌, భద్రాద్రి కొత్తగూడెం, హైదరాబాద్‌, జగిత్యాల, భూపాలపల్లి, కరీంనగర్‌, ఆసిఫాబాద్‌, మహబూబాబాద్‌, మంచిర్యాల, మేడ్చల్‌ మల్కాజ్‌గిరి, ములుగు, నిర్మల్‌, నిజామాబాద్‌, పెద్దపల్లి, రాజన్న సిరిసిల్ల, రంగారెడ్డి, సంగారెడ్డి, వికారాబాద్‌ జిల్లాల్లో వర్షాలుంటాయని పేర్కొంది. శుక్రవారం కొత్తగూడెం, ఖమ్మం జిల్లాల్లో మోస్తరు వర్షపాతం రికార్డయ్యే సూచనలున్నాయని వివరించింది. గడిచి 24గంటల్లో రాష్ట్రవ్యాప్తంగా పలుచోట్ల తేలికపాటి నుంచి భారీ వర్షాలు కురిశాయి. జగిత్యాల, పెద్దపల్లి, సిద్దిపేట, మెదక్‌, ములుగు, వరంగల్‌, మహబూబాబాద్‌, కొత్తగూడెం, మహబూబ్‌నగర్‌, వనపర్తి, నాగర్‌కర్నూల్‌, వికారాబాద్‌, నారాయణపేట జిల్లాల్లో వర్షాలు నమోదయ్యాయి. అత్యధికంగా కొత్తగూడెం జిల్లా సీతారామపట్నం గ్రామంలో 9.3 సెంటీమీటర్ల వర్షాపాతం నమోదైంది.
