కరెంట్‌పె పూటకో లెక్క!

విద్యుత్తుకు సంబంధించి డిప్యూటీ సీఎం, ఆర్థిక, విద్యుత్తు శాఖల మంత్రి భట్టి విక్రమార్క ఒక్కోసారి ఒక్కోలా తప్పుడు లెక్కలు చెప్తున్నారని మాజీ మంత్రి హరీశ్‌రావు ఆగ్రహం వ్యక్తంచేశారు.

• శ్వేతపత్రంలో ఒకలా.. క్లీన్‌ అండ్‌ గ్రీన్‌
• పాలసీలో మరోలా.. పీపీటీలో ఇంకోలా
• ఆర్థికమంత్రీ.. మీ అవగాహన ఇంతేనా?
• ఇంకా శాఖపై మీకు అవగాహన రాలేదు
• ఇతరులను అన్‌ఫిట్‌ ఫర్‌ పాలిటిక్స్‌ అంటరా?
• కమీషన్లపై ఉన్న శ్రద్ధ పాలసీపై ఉంటే
• ఇలాంటి పొరపాట్లు జరిగేవి కావు
• మాజీ మంత్రి హరీశ్‌రావు మండిపాటు

బీఆర్‌ఎస్‌ ప్రభుత్వం చేపట్టిన యాదాద్రి థర్మల్‌ పవర్‌ ప్లాంటును తప్పుబట్టి, ఇప్పుడు మక్తల్‌ వద్ద థర్మల్‌ ప్లాంటు ఏర్పాటు చేస్తామని ప్రకటించింది మీరు కాదా? నాడు యాదాద్రి తప్పు అయితే, నేడు మక్తల్‌ ఒప్పు అవుతుందా? మక్తల్‌లో పెట్టబోయేది థర్మలా, సోలారా, విండ్‌ ప్రాజెక్టా? అనేది చర్చిస్తున్నామని భట్టి విక్రమార్క చెప్పడం హాస్యాస్పదం.-హరీశ్‌రావు

హైదరాబాద్‌, నవంబర్‌ 29 (నమస్తే తెలంగాణ): విద్యుత్తుకు సంబంధించి డిప్యూటీ సీఎం, ఆర్థిక, విద్యుత్తు శాఖల మంత్రి భట్టి విక్రమార్క ఒక్కోసారి ఒక్కోలా తప్పుడు లెక్కలు చెప్తున్నారని మాజీ మంత్రి హరీశ్‌రావు ఆగ్రహం వ్యక్తంచేశారు. ‘అసలు మీ శాఖపై మీకు అవగాహన ఉన్నదా?’ అని ప్రశ్నించారు. విద్యుత్తు శాఖ మంత్రిగా బాధ్యతలు చేపట్టి రెండేండ్లవుతున్నా శాఖపై అవగాహన రాలేదన్న విషయం స్పష్టమవుతున్నదని ఎద్దేవా చేశారు. ప్రభుత్వం చేపడుతున్న థర్మల్‌ ప్లాంట్ల నిర్మాణం, విద్యుత్తు కొనుగోళ్లలో రూ.50 వేల కోట్ల కుంభకోణం దాగి ఉన్నదని హరీశ్‌రావు ఆరోపించిన నేపథ్యంలో.. భట్టి విక్రమార్క మంత్రి శ్రీధర్‌బాబుతో కలిసి శనివారం ప్రత్యేకంగా విద్యుత్తు అంశాలపై పవర్‌ పాయింట్‌ ప్రజెంటేషన్‌ (పీపీటీ) ఇచ్చారు. ఈ నేపథ్యంలో పీపీటీలోని లొసుగులను ఎత్తిచూపుతూ హరీశ్‌రావు మరోసారి డిప్యూటీ సీఎంపై ఆగ్రహం వ్యక్తంచేశారు. ఈ మేరకు పత్రికా ప్రకటన విడుదల చేశారు. అధికారులు మీకు పూటకో లెక్కలు చెప్తూ, మీతోనే ఆ నివేదికలను ఆవిష్కరిస్తున్నా మీకు అర్థం కావడంలేదా? అని మండిపడ్డారు. ‘మీ శాఖపైనే అవగాహనలేని మీరు.. ఇతరులను అన్‌ఫిట్‌ ఫర్‌ పాలిటిక్స్‌ అని కామెంట్‌ చేయడం తగునా?’ అని ప్రశ్నించారు. కమీషన్లపై ఉన్న శ్రద్ధ, పాలసీపై ఉండి ఉంటే ఈ పొరపాట్లు జరిగేవికావని చురకలంటించారు. పీపీటీలోని లోపాలను సవివరంగా ఎత్తిచూపారు.

మూడు చోట్ల.. మూడు రకాలుగా
విద్యుత్తుపై డిప్యూటీ సీఎం ఇప్పటివరకు మూడుచోట్ల వివరాలు వెల్లడించగా, ఏ ఒక్కటీ ఒకేవిధంగా లేవని హరీశ్‌రావు ఆరోపించారు. ‘విద్యుత్తుపై అసెంబ్లీ సాక్షిగా మీరు విడుదలచేసిన స్టేట్‌ పవర్‌ సెక్టార్‌ శ్వేతపత్రం, ఇటీవల విడుదలచేసిన క్లీన్‌ అండ్‌ గ్రీన్‌ ఎనర్జీ పాలసీ-2025, శనివారం పీపీటీలో చెప్పిన విద్యుత్తు గణాంకాలు ఒకదానికి మరొకటి పొంతన లేవన్న కనీస అవగాహన మీకు ఉన్నదా?’ అని భట్టి విక్రమార్కను హరీశ్‌రావు ప్రశ్నించారు. ఈ మేరకు కొన్ని ఆధారాలను వివరించారు.

‘శ్వేతపత్రం పేజీ నంబర్‌ 7లో 01-12-2023 నాటికి సోలార్‌ కెపాసిటీ 6,123 మెగావాట్లు అని చెప్పారు. మొత్తం కాం ట్రాక్టెడ్‌ కెపాసిటీ 19,475 మెగావాట్లు అని చెప్పారు. ఆ తర్వాత 11-01-2025 నాడు మీరు విడుదలచేసిన క్లీన్‌ అండ్‌ గ్రీన్‌ ఎనర్జీ పాలసీలోని పేజీ నెంబర్‌ 8లో ప్రస్తుత స్థాపిత విద్యుత్తు సామర్థ్యం 5,415 మెగావాట్లు అని అన్నారు. మరో 2,474 మెగావాట్లు రాబోతున్నదని, మొ త్తం 7,889 మెగావాట్లు అని పేర్కొన్నా రు. 2023లో 6,123 మెగావాట్లు ఉం టే, 2025 నాటికి 5,415 మెగావాట్లు ఎట్ల అయ్యింది? పెరుగుతుందా? తగ్గుతుందా? ఈరోజు మీరు ప్రదర్శించిన పీపీటీలో ఏం లెక చెప్పారో మీకు తెలుసా? గతంలో ప్రకటించిన పాలసీ, శ్వేతపత్రంతో పోల్చి చూసుకున్నారా?

మీ క్లీన్‌ అండ్‌ గ్రీన్‌ ఎనర్జీ పాలసీ పేజీ నంబర్‌ 8లో తెలంగాణ కరెంట్‌ కాంట్రాక్టెడ్‌ కెపాసిటీ 26,212 మెగావాట్లు అని తెలిపారు. అదే పాలసీ పేజీ నంబర్‌ 10లో 2029-30 నాటికి 49,104 మెగావాట్లు అని అన్నారు. అదేవిధంగా 2034-35 నాటికి 66,694 మెగావాట్లు అని చెప్పారు. అంటే మీరు పెట్టుకున్న లక్ష్యంలో 2029-30 నాటికి 1,729 (15,893-14,164) మెగావాట్ల థర్మల్‌ పవర్‌ ఉత్పత్తి లక్ష్యంగా పెట్టుకున్నారు. కానీ, మొన్న మీరిచ్చిన క్యాబినెట్‌ నోట్‌ ప్రకారం 2,400 మెగావాట్ల థర్మల్‌ పవర్‌ప్లాంట్ల నిర్మాణం లక్ష్యంగా పెట్టుకున్నారు. మీరే ఇచ్చిన క్లీన్‌ అండ్‌ గ్రీన్‌ ఎనర్జీ పాలసీని ఎందుకు తుంగలో తొకారు?

ఏపీ పునర్వ్యవస్థీకరణ చట్టం ప్రకారం 1,600 మెగావాట్ల ఎన్టీపీసీ పవర్‌ అందుబాటులో ఉండగా, ఎన్టీపీసీతో ఒప్పందం చేసుకోకుండా ఎందుకు హడావుడిగా 2,400 మెగావాట్ల థర్మల్‌ పవర్‌ ప్లాంట్స్‌ నిర్మాణానికి వెళ్తున్నారు? ఎందుకంటే ఇది రూ.50 వేల కోట్ల బడా సాం కాబట్టి.

ఎనర్జీ పాలసీ-2025లోని పేజీ నంబర్‌ 10లో 2034-35 వరకు థర్మల్‌ విద్యుత్తు ఉత్పత్తి లక్ష్యం 16,966 మెగావాట్ల్లుగా మాత్రమే పెట్టుకున్నారు. మరి ఈరోజు 5,000-6,000 మెగావాట్ల థర్మల్‌ విద్యుత్తు లోటు ఉండబోతున్నదని ఎట్లా అన్నారు? నేటికి 14,164 మెగావాట్ల థర్మల్‌ విద్యుత్తు అందుబాటులో ఉన్నదని మీ పాలసీలోనే చెప్పారు. 2034-35కు 16,966 మెగావాట్లు లక్ష్యంగా పెట్టుకున్నారు. అంటే మీ లెక ప్రకారం లోటు 2,802 మెగావాట్లు ఉండాలి. కానీ ఈరోజు మాత్రం 5,000-6,000 మెగావాట్ల లోటు ఉన్నదని అంటున్నారు. ఇదంతా ఎట్లా సాధ్యం? మీ పాలసీ తప్పా? ఈరోజు ప్రదర్శించిన పీపీటీ తప్పా?

మీరే సంతకం పెట్టిన గ్రీన్‌ఎనర్జీ పాలసీ-2025 పేజీ నంబర్‌ 3 ప్రకారం 2030 నాటికి 20 వేల మెగావాట్ల రెన్యువబుల్‌ ఎనర్జీ తీసుకొస్తున్నామని పేర్కొన్నారు. రాబోయే ఐదేండ్లలో మీరు సాధించవలసింది 13,000 మెగావాట్ల సోలార్‌ ఎనర్జీ ఉండగా, ఎందుకు థర్మల్‌ ప్లాంట్లంటూ ముందుకెళ్తున్నారు? ఆగమేఘాల మీద క్యాబినెట్‌ ఎందుకు నిర్ణయం తీసుకున్న ది? 2,400 మెగావాట్ల ప్లాంట్ల నిర్మాణం కోసం చేసే రూ.50 వేల కోట్ల ఖర్చులో 30-40% కమీషన్‌ పొందడానికే కాదా?’ అని హరీశ్‌రావు ప్రశ్నించారు.

ఎవరు చెప్పింది అబద్ధం?
‘బీఆర్‌ఎస్‌ ప్రభుత్వం చేపట్టిన యాదాద్రి థర్మల్‌ పవర్‌ ప్లాంటును తప్పుబట్టి, ఇప్పుడు మక్తల్‌ వద్ద థర్మల్‌ ప్లాంటు ఏర్పాటు చేస్తామని ప్రకటించింది మీరు కాదా? నాడు యాదాద్రి తప్పు అయితే, నేడు మక్తల్‌ ఒప్పు అవుతుందా? మక్తల్‌లో పెట్టబోయేది థర్మలా, సోలారా, విండ్‌ ప్రాజెక్టా? అనేది చర్చిస్తున్నామని భట్టి విక్రమార్క చెప్పడం హాస్యాస్పదం’ అని హరీశ్‌రావు మండిపడ్డారు. క్యాబినెట్‌లో చర్చించి మక్తల్‌ వద్ద 800 మెగావాట్ల థర్మల్‌ ప్లాంటు ఏర్పాటుచేస్తామని స్వయంగా మంత్రులే చెప్పింది అబద్ధమా? ఇప్పుడు భట్టి చెప్తున్నది అబద్ధమా? అని నిలదీశారు. ‘యాదాద్రి థర్మల్‌ పవర్‌ప్లాంట్‌లో ఒక మెగావాట్‌కు రూ.8.64 కోట్లు, ఎన్టీపీసీ రామగుండంలో రూ.7.63 కోట్లు ఖర్చు అయ్యిందని శ్వేతపత్రం పేజీ నంబర్‌ 11లో చెప్పారు. ఎన్టీపీసీ ఫేజ్‌-2లో 2023 డిసెంబర్‌ 1 నాటికి 3800 మెగావాట్ల పవర్‌ప్లాంట్‌ ఇంకా మొదలుపెట్టలేదని శ్వేతపత్రంలో నాడు మీరే ప్రకటించారన్న విషయం మీకు తెలుసా? అది క్లియర్‌గా ప్రకటించి బీఆర్‌ఎస్‌ మీద ఎందుకు నెపం నెడుతున్నారు?’ అని ప్రశ్నించారు. ‘రేవంత్‌రెడ్డి ప్రభుత్వం ఏర్పాటుచేశాక 800 మెగావాట్లకు మీరు అగ్రిమెంట్‌ చేసుకొని, మిగతా 1,600 మెగావాట్లు అకర్లేదని చెప్పింది నిజమా? అబద్ధమా? మీరు ఏర్పాటుచేసే రామగుండం పవర్‌ప్లాంట్‌లో పర్‌ మెగావాట్‌ తయారీకి రూ.14 కోట్లు ఖర్చు అవుతుందని క్యాబినెట్‌ అనంతరం విలేకరుల సమావేశంలో చెప్పారు. కానీ ఎన్టీపీసీ ఖర్చు రూ.12.3 కోట్లు. మెగావాట్‌కు దాదాపు రూ.2 కోట్లు అదనపు ఖర్చు ఎందుకు వచ్చింది? అనే విషయం చెప్పకుండా ఇంకా డీపీఆర్‌ కాలేదని బుకాయిస్తున్నారు’ అని హరీశ్‌రావు మండిపడ్డారు.

నాడు 803 కోట్లు.. నేడు 1,600 కోట్లా?
అధికారులు ఏదో రాసి ఇచ్చినదాన్ని మంత్రి శ్రీధర్‌బాబు గుడ్డిగా చదివినట్టున్నారని హరీశ్‌రావు విమర్శించారు. ‘మీరు అసెంబ్లీలో ప్రవేశపెట్టిన శ్వేతపత్రం పేజీ నంబర్‌ 11లో ఏమున్నదో ఒకసారి చూసుకోండి. యాదాద్రి థర్మల్‌ పవర్‌ ప్రాజెక్టు కోల్‌ ట్రాన్స్‌పోర్టుకు ఏడాదికి రూ.803 కోట్లు కావాలని శ్వేతపత్రంలో పెట్టింది మీరే కదా? క్యాబినెట్‌ మంత్రిగా ఉండి నేడు రూ.1,600 కోట్లు ఖర్చు అవుతుందని ఎలా మాట్లాడుతారు?’ అని ప్రశ్నించారు.