అడవి పంది దాడిలో రైతు మృతి

అడవి పంది దాడిలో రైతు మృతి చెందాడు. ఈ ఘటన ములుగు జిల్లా దేవగిరిపట్నంలో బుధవారం ఉదయం జరిగింది. దేవగిరిపట్నం గ్రామానికి చెందిన రైతు వెంకట్‌రెడ్డి(65) కార్తిక పౌర్ణమి సందర్భంగా తన భార్య ధనమ్మను బైక్‌పై తీసుకెళ్లి శివాలయం వద్ద దింపాడు. అక్కడి నుంచి నేరుగా తన పత్తి చేను వద్దకు వెళ్లాడు.

• ములుగు జిల్లా దేవగిరిపట్నంలో ఘటన

ములుగురూరల్‌, నవంబర్‌ 5 : అడవి పంది దాడిలో రైతు మృతి చెందాడు. ఈ ఘటన ములుగు జిల్లా దేవగిరిపట్నంలో బుధవారం ఉదయం జరిగింది. దేవగిరిపట్నం గ్రామానికి చెందిన రైతు వెంకట్‌రెడ్డి(65) కార్తిక పౌర్ణమి సందర్భంగా తన భార్య ధనమ్మను బైక్‌పై తీసుకెళ్లి శివాలయం వద్ద దింపాడు. అక్కడి నుంచి నేరుగా తన పత్తి చేను వద్దకు వెళ్లాడు. పంటను పరిశీలిస్తున్న క్రమంలో వెంకట్‌రెడ్డిపై అడవి పంది దాడి చేసింది.

కింద పడిన వెంకట్‌రెడ్డిని ఎడమచేయి భుజం, చేతులు కొరికి తీవ్రంగా గాయపర్చింది. వెంటనే లేచి పరుగెత్తుతుండగా మళ్లీ దాడి చేయగా, తప్పించుకునే క్రమంలో పక్కనే ఉన్న నీటికుంటలో పడిపోయాడు. ఈత రాకపోవడంతో అందులో మునిగి మృతిచెందాడు. సమాచారం అందుకున్న పోలీసులు ఘటనా స్థలాన్ని పరిశీలించి మృతదేహాన్ని పోస్టుమార్టం నిమిత్తం ములుగు ప్రభుత్వ దవాఖానకు తరలించారు.