మలయాళ అగ్ర నటుడు, జాతీయ అవార్డు గ్రహీత ఫహాద్ ఫాజిల్ తెలుగు చిత్రసీమలో ప్రతినాయకుడిగా అరంగేట్రం చేయబోతున్నారు. అల్లు అర్జున్ కథానాయకుడిగా ప్రముఖ దర్శకుడు సుకుమార్ రూపొందిస్తున్న ‘పుష్ప’ చిత్రంలో ఫహాద్ ఫాజిల్ విలన్గా నటించబోతున్నారని చిత్ర నిర్మాణ సంస్థ మైత్రీ మూవీ మేకర్స్ ఆదివారం ప్రకటించింది. ‘పుష్ప’ చిత్రంలో అల్లు అర్జున్ పాత్ర అత్యంత శక్తివంతంగా సాగుతుందని, ఆయన్ని ఢీ కొట్టే ధీటైన ప్రతినాయకుడిగా ఫహాద్ ఫాజిల్ పాత్ర చిత్రణ వైవిధ్యంగా ఉంటుందని చిత్ర బృందం తెలిపింది. తెలుగు, తమిళ, మలయాళ, కన్నడ, హిందీ భాషల్లో ఆగస్ట్ 13న ఈ చిత్రాన్ని విడుదల చేయబోతున్నారు.