ఆర్టీసీ బస్సు దగ్ధం.. ఇద్దరి పరిస్థితి విషమం

ఆర్టీసీ బస్సును డీసీఎం ఢీకొట్టిన ప్రమాదంలో బస్సు దగ్ధమైన ఘటన మహబూబ్‌నగర్‌ జిల్లా జడ్చర్ల మండలం బూరెడ్డిపల్లి సమీపంలోని ఎన్‌హెచ్‌-44పై ఆదివారం రాత్రి 2 గంటల సమయంలో చోటుచేసుకున్నది.

జడ్చర్ల, జూలై 15 : ఆర్టీసీ బస్సును డీసీఎం ఢీకొట్టిన ప్రమాదంలో బస్సు దగ్ధమైన ఘటన మహబూబ్‌నగర్‌ జిల్లా జడ్చర్ల మండలం బూరెడ్డిపల్లి సమీపంలోని ఎన్‌హెచ్‌-44పై ఆదివారం రాత్రి 2 గంటల సమయంలో చోటుచేసుకున్నది. పోలీసులు, స్థానికుల కథనం మేరకు.. ఏపీలోని సత్యసాయి జిల్లా ధర్మవరం డిపోకు చెందిన ఆర్టీసీ బస్సు ఆదివారం రాత్రి హైదరాబాద్‌ ఎంజీబీఎస్‌ నుంచి ధర్మవరానికి బయలుదేరింది.

ఈ క్రమంలో బూరెడ్డిపల్లి సమీపంలో హైవేపై యూటర్న్‌ తీసుకుంటున్న డీసీఎం ఆర్టీసీ బస్సును ఢీకొట్టడంతో అదుపుతప్పి కుడివైపున రోడ్డును దాటి కిందకు వెళ్లగా బస్సులో మంటలు చెలరేగాయి. అప్రమత్తమైన ప్రయాణికులు అద్దాలను పగులగొట్టుకొని బయటపడ్డారు. జడ్చర్ల సీఐ ఆదిరెడ్డి, ఎస్సై శివానందం, పోలీసులు ఘటనా స్థలానికి చేరుకొని సహాయక చర్యలు చేపట్టారు.

డ్రైవర్‌ సహా బస్సులో 37 మంది ప్రయాణిస్తుండగా.. 15 మందికి గాయాలయ్యాయి. క్షతగాత్రులను అంబులెన్స్‌లో మహబూబ్‌నగర్‌ దవాఖానకు తరలించారు. వారిలో మైథిలి, లక్ష్మీదేవి పరిస్థితి విషమంగా ఉండడంతో హైదరాబాద్‌కు తరలించారు. ఘటనా స్థలాన్ని ఎస్పీ జానకి ముడావత్‌, డీఎస్పీ వెంకటేశ్వర్లు పరిశీలించారు. జడ్చర్ల పోలీసులు కేసు నమోదు చేశారు.