విద్యావంతుల మౌనం సమాజానికి చేటు.. ఎమ్మెల్సీ దాసోజు శ్రవణ్‌

చరిత్రలో ఏ గొప్ప విప్లవాత్మక మార్పు అయినా యువత భాగస్వామ్యంతోనే సాధ్యమైందని బీఆర్‌ఎస్‌ సీనియర్‌ నేత, ఎమ్మెల్సీ డాక్టర్‌ దాసోజు శ్రవణ్‌ అన్నారు. హైదరాబాద్‌-రంగారెడ్డి-మహబూబ్‌నగర్‌ జిల్లాల పట్టభద్రుల ఎమ్మెల్సీ ఎన్నికల నేపథ్యంలో ఆదివారం సోమాజిగూడలో పట్టభద్రుల సన్నాహక సమావేశం జరిగింది.

హైదరాబాద్‌, అక్టోబర్‌ 11 (నమస్తే తెలంగాణ) : చరిత్రలో ఏ గొప్ప విప్లవాత్మక మార్పు అయినా యువత భాగస్వామ్యంతోనే సాధ్యమైందని బీఆర్‌ఎస్‌ సీనియర్‌ నేత, ఎమ్మెల్సీ డాక్టర్‌ దాసోజు శ్రవణ్‌ అన్నారు. హైదరాబాద్‌-రంగారెడ్డి-మహబూబ్‌నగర్‌ జిల్లాల పట్టభద్రుల ఎమ్మెల్సీ ఎన్నికల నేపథ్యంలో ఆదివారం సోమాజిగూడలో పట్టభద్రుల సన్నాహక సమావేశం జరిగింది. మాజీ కార్పొరేటర్‌ మహేశ్‌యాదవ్‌, బీఆర్‌ఎస్వీ నేత మధుకర్‌యాదవ్‌ ఆధ్వర్యంలో నిర్వహించిన ఈ సదస్సుకు శ్రవణ్‌ ముఖ్యఅతిథిగా హాజరయ్యారు.

ఈ సందర్భంగా ఆయన మాట్లాడుతూ సమాజంలో మార్పు యువతతోనే సాధ్యమని పేరొన్నారు. ప్రస్తుత విద్యావంతులు, యువతలో రాజకీయాలు, ఓటింగ్‌పై ఉన్న నిర్లిప్తత సమాజానికి ఎంతో నష్టదాయకమని ఆయన ఆందోళన వ్యక్తం చేశారు. గత ఎన్నికల్లో ఖైరతాబాద్‌ వంటి కీలక నియోజకవర్గంలో కేవలం 8 వేల ఓట్లు మాత్రమే నమోదు కావడం విచారకరమని అన్నారు. చదువుకున్నవారు ఎన్నికల రోజును కేవలం ఒక సెలవుదినంగా భావిస్తే అనర్హులు అందలమెకుతారని హెచ్చరించారు.