Corrupt Congress | కరప్ట్‌ కాంగ్రెస్‌ మోడల్‌.. కరెక్ట్‌ బీఆర్‌ఎస్‌ మోడల్‌.. హైదరాబాద్‌ కూడళ్లలో వెలసిన పోస్టర్లు

హైదరాబాద్‌లో కాంగ్రెస్‌ పార్టీ వర్కింగ్‌ కమిటీ (CWC) సమావేశాలు జరుగుతున్న వేళ ఆ పార్టీ తీరుపై వాల్‌ పోస్టర్లు కలకలం రేపుతున్నాయి. కాంగ్రెస్ (Congress) పాలిత రాష్ట్రాల్లో ఉన్న స్కీములు, తెలంగాణలో (Telangana) బీఆర్‌ఎస్‌ (BRS) ప్రభుత్వం అమలుచేస్తున్న పథకాలను పోల్చుతూ ప్రధాన కూడళ్లలో పోస్టర్లు వెలిశాయి.

హైదరాబాద్‌: హైదరాబాద్‌లో కాంగ్రెస్‌ పార్టీ వర్కింగ్‌ కమిటీ (CWC) సమావేశాలు జరుగుతున్న వేళ ఆ పార్టీ తీరుపై వాల్‌ పోస్టర్లు కలకలం రేపుతున్నాయి. కాంగ్రెస్ (Congress) పాలిత రాష్ట్రాల్లో ఉన్న స్కీములు, తెలంగాణలో (Telangana) బీఆర్‌ఎస్‌ (BRS) ప్రభుత్వం అమలుచేస్తున్న పథకాలను పోల్చుతూ ప్రధాన కూడళ్లలో పోస్టర్లు వెలిశాయి. ‘కరప్ట్ కాంగ్రెస్ మోడల్.. కరెక్ట్ బీఆర్ఎస్ మోడల్’ అంటూ పలువురు వాల్‌పోస్టర్లు అంటించారు. రైతు బీమా, ఉచిత కరెంటు, వికలాంగుల పింఛన్లు, దళితబంధు, రైతు బంధు వంటి సంక్షేమ పథకాల్లో కాంగ్రెస్‌ పాలిత రాష్ట్రాలైన కర్ణాటక, హిమాచల్‌ప్రదేశ్‌, రాజస్థాన్‌, ఛత్తీస్‌గఢ్‌కు తెలంగాణకు మధ్య ఉన్న వ్యత్యాన్ని వాటిలో వివరించారు. తెలంగాణలో కాంగ్రెస్ పార్టీ ఇస్తున్న హామీలకు, ఆ పార్టీ అధికారంలో ఉన్న ఇతర రాష్ట్రాల్లో అమలు చేస్తున్న పథకాలకు పొంతన లేదని నిరూపించారు.

• తెలంగాణలో దళితులకు ఆర్థిక సాయంగా రూ.10 లక్షలు ఇస్తుండగా, హస్తం పార్టీ అధికారంలో ఉన్న ఛత్తీస్‌గఢ్‌, హిమాచల్‌ప్రదేశ్, కర్ణాటక, రాజస్థాన్‎లో గుండు సున్నా అని వెల్లడించారు.

• దివ్యాంగుల పెన్షన్ విషయంలో ఛత్తీస్‌గఢ్‌‎లో రూ. 500, హిమాచల్‌ప్రదేశ్‎లో రూ.1300, కర్ణాటకలో రూ. 1100, రాజస్థాన్‎లో రూ. 1250 ఇస్తుండగా.. తెలంగాణలో మాత్రం రూ.4116గా ఉందని తెలిపారు.

• వృద్ధాప్య పింఛన్‌.. ఛత్తీస్‌గఢ్‌ రూ.500, హిమాచల్‌ప్రదేశ్ రూ.750-1250, కర్ణాటక రూ.1000, రాజస్థాన్‌లో రూ.1000-1250 ఇస్తున్నారని, అదే తెలంగాణలో బీఆర్‌ఎస్‌ ప్రభుత్వం రూ.2016 ఇస్తున్నదని పేర్కొన్నారు.

• ఛత్తీస్‌గఢ్‌, హిమాచల్‌ప్రదేశ్, కర్ణాటక, రాజస్థాన్‎లో రైతు బీమా పథకమే లేదనీ, తెలంగాణలో రైతు చనిపోతే అతని కుటుంబానికి ప్రభుత్వం రూ.5 లక్షల ఆర్థికసాయం చేస్తుందన్నారు.

• రైతు బంధు పేరుతో రైతులకు పెట్టుబడి సాయంగా తెలంగాణలో ఎకరానికి ఏడాదికి రూ.10 వేలు ఇస్తుండగా, ఛత్తీస్‌గఢ్‌, హిమాచల్‌ప్రదేశ్, కర్ణాటక, రాజస్థాన్‎లో ఒక్క రూపాయి కూడా ఆర్థికసాయం చేయడం లేదన్నారు.

• ఇక తెలంగాణలో బీఆర్‌ఎస్‌ ప్రభుత్వం రైతులకు ఉచిత విద్యుత్ 24 గంటలకు నిరంతరాయంగా ఉచిత విద్యుత్‌ ఇస్తున్నదని, అదే ఛత్తీస్‌గఢ్‌, హిమాచల్‌ప్రదేశ్, కర్ణాటక, రాజస్థాన్‎లో ఉచిత విద్యుత్ ఇవ్వకపోగా.. కరెంట్ కోతలతో సతమతం చేస్తున్నారని పోస్టర్లలో పేర్కొన్నారు.