రెండేండ్ల పాలన.. సంక్షేమ ఆక్రందన.. మానవీయ పథకాలు ఆపివేయడమే మార్పు

ప్రజాస్వామ్యంలో పాలన మానవీయ కోణంలో జరగాలి. సమాజంలోని పేదలు, బడుగు, బలహీనవర్గాల ప్రజలకు చేయూతనిచ్చేలా సాగాలి. అభాగ్యులకు అండగా నిలిచేలా వ్యవహరించాలి. ఏ ప్రభుత్వమైనా ప్రజలకు అందించాల్సిన కనీస పాలన.. మానవీయ కోణంలో సాగాలి. చిన్నారులకు సంరక్షణ, చదువు, యువతకు ఉద్యోగ అవకాశాలు, వివిధ వర్గాలకు ఉపాధి మార్గాలు చూపించాలి. వృద్ధులకు భద్రత కల్పించాలి.

• కేసీఆర్‌ హయాంలో గొప్పగా అమలు చేసిన పథకాలు
• పసిగుడ్డు నుంచి పండుముసలికి అందిన సంక్షేమ ఫలాలు
• ప్రజాపాలన పేరిట గద్దెనెక్కి, పథకాలు నిలిపేసిన కాంగ్రెస్‌
• రెండేండ్లుగా గర్భిణులు, బాలింతలకు అందని స్కీములు
• బడిపిల్లల బ్రేక్‌ఫాస్ట్‌, సామాజికవర్గాలకు సాయం నిలిపివేత
• ఆనవాళ్లు చెరిపేసే ఆతృతలో మానవత్వం మరిచిన పాలన
• ఉన్న పథకాలు ఆపి, ఉత్తముచ్చట్లు చెప్తున్న కాంగ్రెస్‌ నేతలు
• పాలనలో రాజనీతిజ్ఞత కాదు.. కనీస విజ్ఞత కూడా కరువు
• కాంగ్రెస్‌ను నమ్మితే నట్టేట ముంచిందని ప్రజల ఆవేదన
• రిక్త హస్తం ప్రజలు పట్టని పాలన

ప్రజలకు మంచి చేసే పథకాన్ని ఏ ప్రభుత్వం ప్రవేశపెట్టినా స్వీకరిస్తం.. కొనసాగిస్తం..

-ఇది కేసీఆర్‌ మాట

కేసీఆర్‌ ఆనవాళ్లను తుడిచి వేస్తామని కక్షగట్టిన కాంగ్రెస్‌ సీఎం రేవంత్‌రెడ్డి.. బీఆర్‌ఎస్‌ అమలు చేసిన పథకాలను నిర్దాక్షిణ్యంగా పక్కనపెట్టారు.. కాంగ్రెస్‌ పాలకుల్లో రాజనీతిజ్ఞత లేకపోవడమే కాదు.. కనీస విజ్ఞత కూడా కనిపించడంలేదు..

– ఇది ప్రజానీకం మాట

సమైక్యరాష్ట్రంలో అరవై ఏండ్లపాటు ఉనికి కోల్పోయిన తెలంగాణకు.. ప్రత్యేక రాష్ట్రంలో ఊపిరులూదిన ఘనత కేసీఆర్‌ది. కుదేలైన ప్రతి రంగాన్ని వనరులు, శక్తిని కూడదీసుకొని ఆయన సగర్వంగా నిలబెట్టారు. తెలంగాణ ప్రత్యేక పరిస్థితులు, పల్లెలు, పట్టణాలు, సామాజిక, ఆర్థిక స్థితిగతులను అధ్యయనం చేసి, అందుకనుగుణంగా ఎన్నో పథకాలకు రూపకల్పన చేసి ఆచరణలోకి తెచ్చారు. కానీ కాంగ్రెస్‌ అధికారంలోకి వచ్చాక ప్రజాస్వామ్య స్ఫూర్తికి విరుద్ధంగా నిండు శాసనసభలో సీఎం రేవంత్‌రెడ్డి నియంతృత్వ మాటలు మాట్లాడారు. కేసీఆర్‌ ఆనవాళ్లను చెరిపివేస్తానంటూ ప్రగల్భాలు పలికారు. సబ్బండవర్ణాల పోరాటం, అమరుల త్యాగ ఫలితంగా తెచ్చుకున్న రాష్ట్రంలో చేపట్టిన పథకాలను రద్దు చేస్తామని శపథాలు చేశారు. కేసీఆర్‌ తెచ్చిన అనేక పథకాలను అటకెక్కించారు. కేసీఆర్‌పై ఉన్న వ్యతిరేకత, తెలంగాణ ముఖచిత్రం నుంచి కేసీఆర్‌ ఆనవాళ్లు తుడిచివేయాలన్న కక్షపూరిత ఆతృతలో కాంగ్రెస్‌ సర్కారు మానవత్వాన్నే మరిచిపోయిందని, ప్రజాసంక్షేమాన్ని పక్కనపెట్టి ప్రతీకారేచ్ఛతో పథకాలను ఆపేయడం దారుణమని ప్రజాస్వామికవాదులు ఆగ్రహం వ్యక్తంచేస్తున్నారు. పేదలు, రైతులు, చేనేత కార్మికులు, మహిళలకు ఉపయోగపడే అనేక పథకాలను కనికరం లేకుండా కనుమరుగుచేశారని మండిపడుతున్నారు.

ప్రజా సంక్షేమాన్ని సంక్షోభంలోకి నెట్టిన రెండేండ్ల కాంగ్రెస్‌ పాలనపై ప్రత్యేక కథనాలు నేటి నుంచి..

‘ఆరోగ్యశ్రీ పథకాన్ని దివంగత వైఎస్‌ రాజశేఖర్‌రెడ్డి ప్రారంభించారు. ఆ పథకం పేదలకు మంచి చేస్తుంది. నిరుపేదల దవాఖానల ఖర్చులను భరించే పథకం. తెలంగాణ ప్రభుత్వం ఆ పథకాన్ని కొనసాగిస్తున్నది. అవసరమైనన్ని నిధులను సమకూర్చుతాం. ఆ పథకాన్ని మరింత పటిష్టంగా అమలు చేస్తాం. మరిన్ని సేవలను పథకం పరిధిలోకి తీసుకువస్తాం. మంచి పథకం ఎవ్వరు తీసుకొచ్చిందైనా కొనసాగిస్తం’ ఇదీ తెలంగాణ రాష్ట్ర తొలి ముఖ్యమంత్రి కేసీఆర్‌ శాసనసభతోపాటు అనేక వేదికలపై చెప్పిన మాట.

ప్రజలకు మంచి చేసే పథకాన్ని ఏ ప్రభుత్వం ప్రవేశపెట్టిందైనా స్వీకరిస్తామని, కొనసాగిస్తామని చెప్పి తన విశాల హృదయాన్ని, ప్రజలకు మంచి చేయడమే తన లక్ష్యమనే సహృదయతను చాటుకున్నారు. ఉమ్మడి రాష్ట్రంలో ప్రభుత్వాలు తెచ్చిన పథకాలైనా ప్రజలకు మంచి చేసే పథకాలను తెలంగాణ రాష్ట్రంలో కొనసాగించారు. పథకాల పేర్లు కూడా మార్చకుండా అమలు చేశారు. ఇందులో ఆరోగ్యశ్రీ పథకంతోపాటు.. విద్యార్థుల ఫీజు రీయింబర్స్‌మెంట్‌ పథకం కూడా ఉన్నది.

ఉమ్మడి రాష్ట్రంలోని బకాయిలను కూడా తెలంగాణ ప్రభుత్వం చెల్లించింది. మీ బకాయిలు మా ప్రభుత్వంలోనివి కావనో.. అప్పటి ముఖ్యమంత్రిని అడగండి అనో అనలేదు. అధికారం పార్టీల చేతులు మారినా ప్రభుత్వం.. శాశ్వతం అని, ప్రజల సంక్షేమం పాలకుల ధర్మబద్ధమైన బాధ్యత అని భావించడం… రాజనీతిజ్ఙత.

కానీ సీఎం రేవంత్‌రెడ్డి నేతృత్వంలోని కాంగ్రెస్‌ పాలకులకు రాజనీతిజ్ఞత లేదని చెప్పడమూ బహుదూరపు మాటే.. కనీస విజ్ఞత కూడా కనిపించడంలేదని ప్రజానీకం మాట.

ప్రజాస్వామ్యంలో పాలన మానవీయ కోణంలో జరగాలి. సమాజంలోని పేదలు, బడుగు, బలహీనవర్గాల ప్రజలకు చేయూతనిచ్చేలా సాగాలి. అభాగ్యులకు అండగా నిలిచేలా వ్యవహరించాలి. ఏ ప్రభుత్వమైనా ప్రజలకు అందించాల్సిన కనీస పాలన.. మానవీయ కోణంలో సాగాలి. చిన్నారులకు సంరక్షణ, చదువు, యువతకు ఉద్యోగ అవకాశాలు, వివిధ వర్గాలకు ఉపాధి మార్గాలు చూపించాలి. వృద్ధులకు భద్రత కల్పించాలి. దివ్యాంగులను చేయి పట్టి నడిపించాలి. ఇలాంటి వాటిని ఉచితాల పంపిణీగా పేర్కొనడం అనాలోచితమే అవుతుంది. వాటిని సామాజిక భద్రతగా, సమాజ బాధ్యతగా పరిగణలోకి తీసుకోవాలి. సరిగ్గా ఇదే మానవీయ దృక్పథంతో తెలంగాణ తొలి ముఖ్యమంత్రి కేసీఆర్‌ సంక్షేమాన్ని, అభివృద్ధిని ప్రాధాన్యతగా తీసుకున్నారు.

విప్లవాత్మక పథకాలకు రూపకల్పన చేశారు. ఇవే పథకాలను మరింత పెంచి ఇస్తామని ఎన్నికల వేళ నమ్మబలికిన కాంగ్రెస్‌.. అధికారంలోకి రాగానే పెంచడం కాదు కదా… ఉన్న పథకాలనే ఊడగొట్టింది. సామాజిక భద్రతా పథకాలను కూడా రాజకీయ కోణంలోనే చూస్తూ, అవి కేసీఆర్‌ మార్క్‌ స్కీమ్స్‌ అంటూ పక్కన పెట్టడడంతో నిరుపేదలు, అభాగ్యులు అవస్థలు పడుతున్నారు. బంగారు తెలంగాణ నిర్మాణంలో భాగంగా భావిభారత పౌరులను ఆరోగ్యంగా తీర్చిదిద్దేందుకు కేసీఆర్‌ హయాంలో.. గర్భిణులకు న్యూట్రిషన్‌ కిట్‌, బాలింతలకు కేసీఆర్‌ కిట్‌, బడికిపోయే పిల్లలకు బ్రేక్‌ఫాస్ట్‌ అందించారు. అసమానతలు కలిగిన సమాజం.. సమష్టిగా పురోగతి సాధించాలంటే, ఒక తరానికి మరొక తరానికి మెరుగైన మార్పు కనిపించాలంటే పాలకులు దీర్ఘకాలిక లక్ష్యాలతో పనిచేయాలి. కానీ కేసీఆర్‌ తీసుకొచ్చిన పథకాలు తొలగిస్తాం.. చెరిపేస్తామంటూ.. రాచరికపు… దండయాత్రల కాలం నాటి ప్రగల్భాలతో కాంగ్రెస్‌ సర్కారు ప్రజాస్వామ్యాన్ని అపహాస్యం చేస్తున్నది.

పల్లె.. పట్టణ ప్రగతులేవి?

గ్రామాలు, పట్టణాలను ఆర్థికంగా బలోపేతం చేయడం, అభివృద్ధి కార్యక్రమాలను చేపట్టడమే లక్ష్యంగా కేసీఆర్‌ సర్కారు పల్లెప్రగతి, పట్టణ ప్రగతి కార్యక్రమాలను ప్రవేశపెట్టింది. ప్రతి నెలా నిధులు మంజూరు చేసి, అభివృద్ధి కార్యక్రమాలను నిర్వహించింది. ఈ కార్యక్రమంతో గ్రామాలు, పట్టణాలు అభివృద్ధిలో పోటీపడ్డాయి.

పారిశుధ్యం మెరుగుపడి, సీజనల్‌ వ్యాధులు, డెంగీ జ్వరాలు తగ్గాయి. వృక్ష సంరక్షణ పెరిగింది. చెత్తాచెదారాలతో నిండిన రోడ్లు ఎప్పటికప్పుడు శుభ్రమయ్యేవి. ఈ క్రమంలో కేంద్ర ప్రభుత్వం జాతీయ స్థాయిలో 20 ఉత్తమ గ్రామ పంచాయతీలను ఎంపిక చేస్తే అందులో తెలంగాణకు చెందినవి 19 ఉన్నాయంటే ఆ పథకం స్ఫూర్తి, సాధించిన ప్రగతిని అర్థం చేసుకోవచ్చు. కానీ ఇప్పుడు పరిస్థితులు తలకిందులయ్యాయి. పల్లె, పట్టణ ప్రగతి కార్యక్రమాలను కాంగ్రెస్‌ సర్కారు పక్కకు పెట్టింది. బీఆర్‌ఎస్‌పై కక్షపూరిత రాజకీయాల కారణంగానే కాంగ్రెస్‌ ప్రభుత్వం పల్లె, పట్టణ ప్రగతి కార్యక్రమాలను అటకెక్కించిందని ప్రజలు, ప్రజాసంఘాల నేతలు మండిపడుతున్నారు.

కేసీఆర్‌ బీసీబంధు.. కాంగ్రెస్‌ పాలనలో బంద్‌

బీఆర్‌ఎస్‌ అధికారంలో ఉన్నపుడు బలహీనవర్గాలకు చేయూత అందించేందుకు బీసీ బంధు పేరుతో పథకాన్ని అమలు చేసింది. చేతివృత్తులను ప్రోత్సహించేందుకు, నైపుణ్యత సాధించేందుకు, బీసీ వర్గాలను ఆదుకునేందుకు, ఆధునిక పరికరాలను కొనుగోలు చేసేందుకు బీసీ బంధు పథకాన్ని తీసుకువచ్చింది.

రాష్ట్ర వ్యాప్తంగా ఐదు లక్షల మంది దరఖాస్తు చేసుకున్నారు. 4.16 లక్షల మంది అర్హులుగా ఎంపికయ్యారు. వీరిలో 40 వేల మందికి యూనిట్ల గ్రౌండింగ్‌ కూడా పూర్తయ్యింది. చెక్కులు కూడా అందాయి. మరో మూడు లక్షల మందికిపైగా లబ్ధిదారులకు చెక్కులు జారీ కావాల్సింది. కానీ ఎన్నికల కోడ్‌, ఎన్నికలు, కాంగ్రెస్‌ గద్దెనెక్కడం.. ఆ తర్వాత బీసీ బంధు అటకెక్కడం చకచకా జరిగిపోయాయి. కానీ కాంగ్రెస్‌ ప్రభుత్వం బీసీల సంక్షేమాన్ని నిర్వీర్యం చేసేందుకు ప్రయత్నిస్తున్నది. అధికారంలోకి వచ్చి రెండేండ్లయినా ఒక్క పథకాన్ని కూడా బీసీల కోసం అమలు చేయలేదు. మిగిలిన మూడేండ్లలో అమలు చేయాలన్న ఆలోచన, చిత్తశుద్ధి కాంగ్రెస్‌ సర్కారులో కనిపించడంలేదని బీసీలు, బీసీ సంఘాల నేతలు విమర్శలు గుప్పిస్తున్నారు.

అందని వైద్యం.. బస్తీ పేదల దైన్యం

బస్తీల్లో ఉండే పేద ప్రజలు.. ఏదైనా ఆరోగ్య సమస్య ఎదురైతే ప్రైవేటు దవాఖానలకు వెళ్లలేరు. ప్రభుత్వ దవాఖానలు కూడా అన్ని ప్రాంతాల్లో అందుబాటులో ఉండవు. సమీప ప్రాంతంలో దవాఖాన లేకపోవడం వల్ల.. సకాలంలో అందదు. ఫలితంగా చిన్న అనారోగ్యాల వల్ల కూడా కొన్నిసార్లు ప్రాణాలమీదకు వచ్చే ప్రమాదం ఉంటుంది.

ఈ నేపథ్యంలో బస్తీల్లో నివసించే పేద ప్రజల కోసం హైదరాబాద్‌తోపాటు రాష్ట్రంలోని పట్టణాలు, నగరాల్లో కేసీఆర్‌ ప్రభుత్వం బస్తీ దవాఖానలను ఏర్పాటు చేసింది. ప్రతి బస్తీ దవాఖానలో వైద్యులు అందుబాటులో ఉండేలా చూస్తూ.. రోగులకు అవసరమైన మందులను ఉచితంగా అందించింది. చాలా వైద్యపరీక్షలను అందుబాటులోకి తీసుకొచ్చింది. వైద్యారోగ్యశాఖ పర్యవేక్షణలో విజయవంతంగా నడిచాయి. ఇవి అద్భుతమైన ఫలితాన్ని ఇచ్చాయి. కాంగ్రెస్‌ అధికారం చేపట్టిన వెంటనే బస్తీ దవాఖానలను పట్టించుకోవడం మానేసింది. నిధులు విడుదల చేయకుండా నిర్వీర్యం చేసింది.

దళితబంధుకు మంగళం

దేశంలోనే దళితజాతిని ఉన్నతంగా నిలబెట్టాలన్న లక్ష్యంతో తెలంగాణ తొలి ముఖ్యమంత్రి కేసీఆర్‌ ‘దళిత బంధు’ పేరుతో గొప్ప పథకాన్ని తీసుకువచ్చారు. ప్రతి దళిత కుటుంబానికి రూ.10 లక్షలు ఇచ్చే ఆశయంతో అద్భుత పథకం అమలు చేసింది. రాష్ట్రంలోని 40 వేల కుటుంబాలకు దళిత బంధును మంజూరు చేశారు.

మరో లక్షా 30వేల మందికి ప్రొసీడింగ్స్‌ ఇచ్చింది. అద్భుతంగా సాగుతున్న ఈ పథకం నిలిచిపోయింది. రాష్ట్రంలో ఎన్నికలు జరిగే సమయంలో దళిత బంధు పథకాన్ని కొనసాగిస్తామని కాంగ్రెస్‌ పార్టీ, రేవంత్‌రెడ్డి నమ్మించారు. బీఆర్‌ఎస్‌ సర్కారు రూ.10 లక్షలు ఇస్తున్నదని, తాము అధికారంలోకి వస్తే రూ.12 లక్షలు ఇస్తామని ప్రగల్భాలు పలికింది. చివరకు ఇప్పుడు కాంగ్రెస్‌ అధికారం చేపట్టిన రెండేండ్లలో దళితబంధు కింద నయాపైసా విడుదల చేయలేదు. ఒక్క దళితుడికి కూడా లబ్ధి చేకూరలేదు. కేవలం కేసీఆర్‌కు మంచి పేరు వస్తుందన్న ఆలోచనతోనే దళితబంధు పథకాన్ని అటకెక్కించారు.

బడి పిల్లల బ్రేక్‌ఫాస్ట్‌ పథకం బంద్‌

కాంగ్రెస్‌ రెండేండ్ల పాలనలో మూలనపడ్డ మరో మంచి పథకం స్కూల్‌ విద్యార్థులకు బ్రేక్‌ఫాస్ట్‌. రాష్ట్రంలోని 27,147 ప్రభుత్వ పాఠశాలల్లో సుమారు 23 లక్షల మంది విద్యార్థులకు ఉదయం ఆకలిని తీర్చేందుకు బ్రేక్‌ఫాస్ట్‌ పథకాన్ని కేసీఆర్‌ ప్రభుత్వం ప్రవేశపెట్టింది. ఇందుకు రూ.672 కోట్లను కేటాయించింది.

రాష్ట్రంలో అధికారం మారిన తర్వాత కాంగ్రెస్‌ ప్రభుత్వం ఈ పథకాన్ని పూర్తిగా నిలిపివేసింది. ఎందుకు నిలిపివేసిందో చెప్పలేదు. కానీ తమిళనాడు పర్యటనలో.. అక్కడి బడుల్లో ఇదే పథకాన్ని చూసి.. ఉబ్బితబ్బిబ్బయినట్టు ఆ రాష్ట్ర సీఎం స్టాలిన్‌ ముందు.. రేవంత్‌రెడ్డి చెప్పుకున్నారు. తెలంగాణలోనూ అమలు చేస్తామని చెప్పి వచ్చారు. రేవంత్‌ మాటలు విమర్శలకు గురయ్యాయి. తెలంగాణలో కేసీఆర్‌ మొదలుపెట్టిన బ్రేక్‌ఫాస్ట్‌ పథకాన్ని ఆపిందే రేవంత్‌రెడ్డి అని, తమిళనాడులో చూసి స్ఫూర్తి పొందినట్టు చెప్పుకోవడమేంటని ప్రశ్నలు వ్యక్తమయ్యాయి.

కాటగల్సిన గొర్రెల పథకం

రాష్ట్రంలో యాదవులకు ఆర్థిక స్వావలంబన కల్పించడమే ధ్యేయంగా కేసీఆర్‌ ప్రభుత్వం గొర్రెల పంపిణీ చేసింది. ఒక్కో లబ్ధిదారుకు 21 గొర్రెలను అందజేసింది. తొలి విడుతలో ప్రత్యేకంగా రూ.5 వేల కోట్లు ఖర్చు చేసి నాలుగు లక్షల ఇరవై వేల గొర్రెల యూనిట్లను అర్హులైన
యాదవ కుటుంబాలకు పంపిణీ చేసింది. మొత్తం ఖర్చును ప్రభుత్వమే భరించింది.

దేశంలో ఈ తరహా పథకం ఎక్కడా లేదు. అనేక రాష్ర్టాల ప్రతినిధులు పథకాన్ని అధ్యయనం చేసి వెళ్లారు. ఈ పథకంతో రాష్ట్రంలో పెరుగుతున్న అవసరాలకు అనుగుణంగా మాంసం ఉత్పత్తిని పెంచడంతోపాటు, యాదవులకు ఆర్థిక చేయూతను అందించింది. అలాంటి గొప్ప పథకాన్ని కాంగ్రెస్‌ సర్కారు నిలిపివేసింది. రెండో విడత పంపిణీ కార్యక్రమాన్ని అటకెక్కించింది. ఈ పథకంపై కేసులు పెట్టి లబ్ధిదారులను, అధికారులను భయపెట్టే ప్రయత్నం చేసింది. సాకులు చెప్తూ, కుట్రలు చేస్తూ మొత్తానికి రెండేండ్లలో గొర్రెల పంపిణీ పథకాన్ని నిలిపివేయడం దారుణమని యాదవ సంఘాలు ఆగ్రహం వ్యక్తంచేస్తున్నాయి.

బ్రాహ్మణ పరిషత్తుకు తాళం

కేసీఆర్‌ ప్రభుత్వం నిరుపేద బ్రాహ్మణ కుటుంబాలను ఆదుకోవాలని, రాష్ట్రంలో వేదాధ్యయనాన్ని ప్రోత్సహించేందుకు బ్రాహ్మణ సంక్షేమ పరిషత్తును ఏర్పాటు చేసింది. బ్రాహ్మణుల వైద్య అవసరాలకు నిధులు ఇవ్వడం, పరిశ్రమలు స్థాపించేవారికి రాయితీలు కల్పించడం, నైపుణ్య శిక్షణ అందించడం, విదేశీ విద్యాపథకంతో విద్యార్థులను ప్రోత్సహించడం, ఫీజులు కట్టలేని బ్రాహ్మణ విద్యార్థులకు ఫీజులు కట్టడం వంటి చర్యలతో ఆదుకున్నది.

హైదరాబాద్‌లోని గోపన్‌పల్లిలో ఐదెకరాల స్థలం ఇవ్వడంతోపాటు బ్రాహ్మణ సంక్షేమానికి భవనాన్ని కూడా నిర్మించారు. కాంగ్రెస్‌ సర్కా రు బ్రాహ్మణ సంక్షేమ పరిషత్తుకు పాలక మండలిని కూడా నియమించలేదు… ఎస్సీ, ఎస్టీ, బీసీలకు విదేశీ విద్య కోసం కేసీఆర్‌ ప్రభుత్వం ఏటా ప్రత్యేకంగా అంబేద్కర్‌, పూలే ఓవర్సీస్‌ స్కాలర్‌షిప్స్‌ ఇచ్చేది. కాంగ్రెస్‌ ప్రభుత్వం ఆ పథకాలన్నింటిలో కోత పెట్టింది. పథకంలో లబ్ధిదారులుగా ఎంపికైనా.. పభుత్వం నిధులు ఇస్తుందో లేదోనని విద్యార్థులు, తల్లిదండ్రుల్లో ఆందోళన నెలకొన్నది.

కేసీఆర్‌ ఇచ్చింది.. ఏదీ ఇవ్వొద్దు.. ఆపేయండి!

ప్రజల జీవన ప్రమాణాలు మెరుగుపర్చడమే లక్ష్యంగా విద్య, వైద్య, ఆరోగ్య, వ్యవసాయ, ఆర్థిక, సామాజిక, సంక్షేమ, అభివృద్ధి రంగాల్లో కేసీఆర్‌ దార్శనికతతో ప్రవేశపెట్టిన పథకాలు ఏవైనా సరే తీసేయాలని కంకణం కట్టుకున్నట్టుగా రేవంత్‌రెడ్డి పాలన సాగిస్తున్నారని ప్రజల్లో విమర్శలు వినిపిస్తున్నాయి. పశ్రమల ఏర్పాటులో మధ్యవర్తుల ప్రమేయం లేకుండా, పారదర్శకతకు పెద్దపీట వేస్తూ కేసీఆర్‌ టీఎస్‌ఐపాస్‌ తీసుకొచ్చారు. ఐపాస్‌తో అద్భుత ఫలితాలు వచ్చాయి.

దేశంలోని చాలా రాష్ర్టాలు ఐపాస్‌ విధానంపై అధ్యయనం చేశాయి. పెద్ద పెద్ద పారిశ్రామికవేత్తలు ప్రశంసించారు. అలాంటి పథకాన్ని రేవంత్‌రెడ్డి ప్రభుత్వం నిలిపివేసింది. సాగునీటిరంగంలో కేసీఆర్‌ ముద్రను కడిగేయాలని రేవంత్‌ సర్కారు తీవ్రంగా యత్నిస్తున్నది. కాళేశ్వరం ప్రాజెక్టును పడావు పెట్టాలని చూస్తున్నది. పాలమూరు- రంగారెడ్డి ప్రాజెక్టు నిర్మాణం కేసీఆర్‌ హయాంలోనే 90 శాతం పూర్తయ్యింది. కానీ కాంగ్రెస్‌ సర్కారు నిధులు మంజూరు చేయడంలేదు. సంగమేశ్వర-బసవేశ్వర ప్రాజెక్టు ద్వారా జహీరాబాద్‌ ప్రాంత వాసులకు నీళ్లు ఇవ్వాలని కేసీఆర్‌ సంకల్పించి… అక్కడ నిర్మాణ పనులు మొదలుపెడితే కాంగ్రెస్‌ సర్కారు కూడా నిలిపివేసింది. ఇలా ఏ రంగం చూసినా ఎక్కడెక్కడ కేసీఆర్‌ ఆనవాళ్లు కనిపిస్తున్నాయో… అక్కడక్కడ కాంగ్రెస్‌ సర్కారు మరుగునపర్చే ప్రయత్నాలు కనిపిస్తూనే ఉన్నాయి.

ఆ పథకాల పరమార్థం తెలుసా అసలు!

ఒక పథకాన్ని ప్రారంభించాలన్నా.. నిలిపివేయాలన్నా ప్రభుత్వం శాస్త్రీయ అధ్యయనం నిర్వహించాలి. కానీ రేవంత్‌రెడ్డి సర్కారు సొంతంగా తెచ్చిన గొప్ప పథకమేమీ లేదు. పథకాలను ఎందుకు పక్కకు పెట్టిందో స్పష్టతనివ్వలేదు. ఉదాహరణకు కేసీఆర్‌ కిట్‌ పేరుతో మాతాశిశు సంరక్షణకు ప్రత్యేక కిట్‌ను రూపొందించి ఇచ్చే వారు. కేసీఆర్‌ సర్కారు ఉన్నపుడు 13 లక్షల 90 వేల మంది బాలింతలకు కిట్లను అందజేసింది. ఇందుకోసం రూ.1262 కోట్లను ఖర్చు చేసింది. ప్రసవం తర్వాత దవాఖానలోనే బాలింతకు కిట్‌ అందించేవారు. ఈ కిట్‌లో పుట్టిన బిడ్డకు అవసరమైన అన్ని వస్తువులను ఇచ్చేవారు. దేశంలోనే ఆదర్శవంతమైన పథకాల్లో కేసీఆర్‌ కిట్‌ కూడా ఒకటని, ఇదొక గొప్ప మానవీయ పథకమని పేరు వచ్చింది. చాలా రాష్ర్టాల ప్రభుత్వ ప్రతినిధులు తెలంగాణకు వచ్చి కేసీఆర్‌ కిట్‌ గురించి అధ్యయనం చేసి.. తమ రాష్ర్టాల్లో అమలు చేశారు.

అలాంటి గొప్ప పథకాన్ని రేవంత్‌ సర్కారు వచ్చిన వెంటనే పక్కకు పెట్టింది. కనీసం పేరు మార్చి అమలు చేసినా పేదలకు జరుగుతూ వచ్చిన మేలు ఆగకపోయేది కదా! కానీ ఆ పథకం కేసీఆర్‌ మానవత్వపు మార్క్‌. కాబట్టి కిట్‌ కొనసాగిస్తే కేసీఆర్‌కే పేరు వస్తుందనే ఆలోచనతో కాంగ్రెస్‌ సర్కారు నిలిపివేసింది. ప్రభుత్వ దవాఖానల్లో ప్రసవాలను ప్రోత్సహించాలన్న లక్ష్యంతోనే కేసీఆర్‌ కిట్‌ పథకాన్ని ప్రారంభించారు. గొప్ప ఫలితాలను సాధించి చూపారు. తెలంగాణలో మాతాశిశు మరణాల సంఖ్య తగ్గింది. దేశ సగటు ప్రతి వెయ్యిమందికి 25గా ఉంటే.. తెలంగాణలో 18గా నమోదయ్యింది. తెలంగాణ ఏర్పడే నాటికి శిశుమరణాల సంఖ్య ప్రతి వెయ్యికి 39 ఉండేది. అలాంటిది సగానికిపైగా తగ్గింది. ఈ విషయాన్ని కేంద్ర ఆరోగ్యశాఖ కూడా అభినందిస్తూ చాలా వేదికలపై ప్రస్తావించింది.

ఇలాంటి మహోన్నతమైన మానవీయ పథకాన్ని రేవంత్‌రెడ్డి సర్కారు ఆపేసింది. ఎందుకు ఆపేసిందన్న దానిపై ప్రభుత్వం నుంచి సరైన సమాధానం గానీ, ప్రకటన గానీ లేదు. ‘కేసీఆర్‌ తెచ్చిన పథకం.. ఆపేశాం అంతే’ అన్నట్టుగా ఉంది.. కాంగ్రెస్‌ పాలకుల తీరు. గర్భిణుల్లో పోషకాహార లోపాన్ని సవరించేందుకు బీఆర్‌ఎస్‌ ప్రభుత్వం ‘కేసీఆర్‌ న్యూట్రిషన్‌ కిట్‌’ అందించింది. గర్భిణుల్ల్లో పోషకాహార లోపం అరికట్టడం, శిశుమరణాలను తగ్గించడంలో ఈ పథకం గణనీయమైన ఫలితాలను ఇచ్చింది. దీంతో పథకాన్ని రాష్ట్రవ్యాప్తంగా అన్ని జిల్లాలకు విస్తరించింది. ఏడు లక్షల మంది గర్భిణులు పథకాన్ని ఉపయోగించుకున్నారు. మహిళలకు మాయమాటలు చెప్పి గెలిచిన కాంగ్రెస్‌ పార్టీ… గద్దెనెక్కిన తర్వాత ఆఖరికి గర్భిణుల పథకాలను కూడా అమానవీయంగా నిలిపివేసింది.

కేసీఆర్‌ కిట్‌

లబ్ధిదారులు 13.90 లక్షల మంది

ఖర్చు పెట్టిన మొత్తం 1262కోట్లు

2014కు ముందు మాతాశిశు మరణాల రేటు 39/1000

కేసీఆర్‌ కిట్‌ ప్రవేశపెట్టిన తర్వాత 18/1000

కేసీఆర్‌ న్యూట్రిషన్‌ కిట్‌

ఉద్దేశం: గర్బిణుల్లో పోషకాహార లోపం అరికట్టడం, శిశుమరణాలను తగ్గించడం

లబ్ధిదారుల సంఖ్య 7 లక్షల మంది

దళిత బంధు

ఉద్దేశం: దళితజాతిని ఉన్నతంగా నిలబెట్టడం

లబ్ధిదారులకు ఇచ్చే సాయం రూ.10 లక్షలు

లబ్ధి పొందినవి: 40 వేల కుటుంబాలు, 1.30లక్షల మందికి ప్రొసీడింగ్స్‌

ఎన్నికల్లో కాంగ్రెస్‌ హామీ రూ.12లక్షలు

కాంగ్రెస్‌ సర్కారు ఇచ్చింది 0

బీసీ బంధు

ఉద్దేశం: ఉద్దేశం బలహీన వర్గాలకు చేయూత

దరఖాస్తులు 5 లక్షలు

ఎంపికైన అర్హులు 4.16 లక్షల మంది

గ్రౌండింగ్‌ పూర్తి 40 వేల యూనిట్లు

గొర్రెల పంపిణీ పథకం

ఉద్దేశం: యాదవులకు ఆర్థిక స్వావలంబన, మాంస ఉత్పత్తి పెంపు

ఒక్కో లబ్ధిదారుకు ఇచ్చిన గొర్రెలు 21 గొర్రెలు

ఖర్చు చేసిన మొత్తం రూ.5 వేల కోట్లు

మొత్తం పంపిణీ చేసిన గొర్రెలు 4.20 లక్షలు

సీఎం బ్రేక్‌ఫాస్ట్‌ స్కీమ్‌

ఉద్దేశం: ప్రభుత్వ పాఠశాలలో పిల్లలకు ఉదయం అల్పాహారం

పాఠశాలలు 27,147

విద్యార్థులు 23 లక్షల మంది

ఖర్చు చేసిన మొత్తం రూ.672 కోట్లు