Visit:
హైదరాబాద్‌, నవంబర్‌ 28 (నమస్తే తెలంగాణ): మాడల్‌ స్కూల్‌ టీచర్ల సుదీర్ఘ పోరాటం ఫలించింది. పూర్వ ఉపాధ్యాయులతో సమానంగా సర్వీస్‌, వేతనం అందనున్నది. శుక్రవారం ముఖ్యమంత్రి రేవంత్‌రెడ్డి నోషనల్‌ సర్వీస్‌ ఫైల్‌పై సంతకం చేయడంతో మార్గం సుగమమైంది. తద్వారా 757 పీజీటీ, 417 మంది టీజీటీలకు లబ్ధి చేకూరనున్నది. బడుగు, బలహీనవర్గాల పిల్లలకు ఆంగ్ల విద్య అందించాలనే సంకల్పంతో 2012లో అప్పటి యూపీఏ ప్రభుత్వం ఉమ్మడి ఏపీలో 1,194 మాడల్‌ స్కూళ్లను ఏర్పాటు చేసింది. 2013లో ఉపాధ్యాయ నియామకాలు చేపట్టింది.
పరీక్ష నిర్వహించి తుది జాబితా విడుదల చేసింది. వీరిలో 757 మంది పీజీటీ, 417 మంది పీజీటీలకు 2014లో నియామకపత్రాలు అందించింది. దీంతో వారు సర్వీస్‌, వేతనాలు కోల్పోయారు. నాటి నుంచి న్యాయం కోసం పోరాడుతున్నారు. ముఖ్యమంత్రి నోషనల్‌ సర్వీస్‌ ఫైల్‌పై సంతకం చేయడంతో వీరికి మేలు జరుగనున్నది. కాగా ప్రభుత్వ నిర్ణయంపై ప్రోగ్రెసివ్‌ మాడల్‌ స్కూల్స్‌ టీచర్స్‌ అసోసియేషన్‌ ఆఫ్‌ తెలంగాణ రాష్ట్ర అధ్యక్షుడు తరాల జగదీశ్‌ కృతజ్ఞతలు తెలిపారు.
