ఎమార్‌ వివాదాల పరిష్కారానికి మరో కమిటీ

ఎమార్‌ ప్రాపర్టీస్‌ వ్యవహారాన్ని పరిషరించేందుకు న్యాయ నిపుణులతో కూడిన మరో కమిటీని ఏర్పాటుచేయాలని ముఖ్యమంత్రి రేవంత్‌రెడ్డి ఆదేశించారు. వివిధ దర్యాప్తు ఏజెన్సీల కేసులు, చార్జీషీట్లు, న్యాయపరమైన అంశాలతో ముడిపడి ఉన్నందున ఎమార్‌ ఒప్పందాల డాక్యుమెంట్లు, కోర్టు కేసుల వివరాలతో పాటు కేంద్ర ప్రభుత్వ సూచనలన్నీ క్షుణ్ణంగా పరిశీలించాలని ఆయన అధికారులను కోరారు.

• సంస్థ ప్రతినిధులతో సీఎం రేవంత్‌ సమావేశం

హైదరాబాద్‌, ఫిబ్రవరి 27 (నమస్తే తెలంగాణ): ఎమార్‌ ప్రాపర్టీస్‌ వ్యవహారాన్ని పరిషరించేందుకు న్యాయ నిపుణులతో కూడిన మరో కమిటీని ఏర్పాటుచేయాలని ముఖ్యమంత్రి రేవంత్‌రెడ్డి ఆదేశించారు. వివిధ దర్యాప్తు ఏజెన్సీల కేసులు, చార్జీషీట్లు, న్యాయపరమైన అంశాలతో ముడిపడి ఉన్నందున ఎమార్‌ ఒప్పందాల డాక్యుమెంట్లు, కోర్టు కేసుల వివరాలతో పాటు కేంద్ర ప్రభుత్వ సూచనలన్నీ క్షుణ్ణంగా పరిశీలించాలని ఆయన అధికారులను కోరారు. వివిధ కేసుల కారణంగా పెండింగ్‌లో ఉన్న తమ ప్రాజెక్టుల వివాదాలను పరిషరించాలని కోరుతూ ఎమార్‌ ప్రాపర్టీస్‌ సంస్థ రాష్ట్ర ప్రభుత్వాన్ని ఆశ్రయించింది. ఈ నేపథ్యంలో గురువారం సచివాలయంలో సీఎం రేవంత్‌రెడ్డి, పరిశ్రమలశాఖ మంత్రి శ్రీధర్‌బాబు సంస్థ ప్రతినిధులతో సమావేశమయ్యారు. చర్చల సందర్భంగా ఎమ్మార్‌ వ్యవహారానికి సంబంధించిన అంశాలన్నింటినీ అధికారులు ముఖ్యమంత్రికి నివేదించారు. 2003లో దుబాయ్‌కి చెందిన ఎమార్‌ ప్రాపర్టీస్‌ హైదరాబాద్‌లో కన్వెన్షన్‌ సెంటర్‌, హోటల్‌, గోల్ఫ్‌ కోర్సు, విల్లాలు తదితర ప్రాజెక్టుల్లో పెట్టుబడులు పెట్టేందుకు అప్పటి ప్రభుత్వంతో ఒప్పందాలు చేసుకున్నట్టు వివరించారు. ఏపీఐఐసీతో ఆ సంస్థ చేసుకున్న ఒప్పందాల్లో అక్రమాలు జరిగాయని అప్పట్లో సీబీఐ, ఈడీ కేసులు నమోదు చేశాయని తెలిపారు. 2015 అక్టోబర్‌లో అప్పటి బీఆర్‌ఎస్‌ ప్రభుత్వం ఎమార్‌ ప్రాపర్టీస్‌కు సంబంధించిన ప్రాజెక్టుల వివాదాల పరిషారానికి చీఫ్‌ సెక్రటరీ సారథ్యంలో అయిదుగురు సెక్రటరీల కమిటీని ఏర్పాటు చేసిందని చెప్పారు.

ఎమార్‌ ప్రతిపాదనకు సీఎం ఓకే

న్యాయ వివాదాలను అధ్యయనం చేయడానికి, సామరస్యంగా పరిష్కరించుకోవడానికి యూఏఈ ప్రభుత్వ ఆమోదంతో ఒక లీగల్‌ ఏజెన్సీని ఏర్పాటు చేస్తామని సంస్థ ప్రతినిధులు చేసిన ప్రతిపాదనను సీఎం అమోదించారు. ప్రభుత్వం ఏర్పాటు చేసే కమిటీ వారితో సంప్రదింపులు జరిపి తదుపరి సూచనలు, సలహాలు అందిస్తుందని చెప్పారు. ఎమార్‌ వ్యవస్థాపకుడు, మేనేజింగ్‌ డైరెక్టర్‌ మహమ్మద్‌ అలబ్బర్‌, భారత్‌లో యూఏఈ మాజీ రాయబారి డాక్టర్‌ అహ్మద్‌ అల్‌ బన్నా, ఎమార్‌ గ్రూప్‌ సీఈవో అమిత్‌ జైన్‌, ఆ కంపెనీ ఇంటర్నేషనల్‌ అఫైర్స్‌ హెడ్‌ ముస్తఫా అక్రమ్‌, ప్రభుత్వ ప్రధానకార్యదర్శి శాంతికుమారి, అడ్వకేట్‌ జనరల్‌ సుదర్శన్‌రెడ్డి, పరిశ్రమలశాఖ ప్రత్యేక ప్రధాన కార్యదర్శి జయేశ్‌రంజన్‌, ఆర్థికశాఖ ప్రత్యేక ప్రధాన కార్యదర్శి రామకృష్ణారావు, సీఎంవో ముఖ్యకార్యదర్శి శేషాద్రి, సీఎం ప్రత్యేక కార్యదర్శి అజిత్‌రెడ్డి, టీజీఐఐసీ ఎండీ విష్ణువర్ధన్‌రెడ్డి, న్యాయశాఖ కార్యదర్శి తిరుపతి తదితరులు ఈ సమావేశంలో పాల్గొన్నారు.