బీఆర్‌ఎస్‌ నేతలపైనే ఉల్టా కేసులు

బీఆర్‌ఎస్‌ మేయర్‌, కార్పొరేటర్ల కిడ్నాప్‌కు సినీ ఫక్కీలో ప్రయత్నించిన కాంగ్రెస్‌ నాయకులపై ఫిర్యాదు చేస్తే బాధిత నాయకులపైనే పోలీసులు కేసు నమోదు చేశారు. అధికార పార్టీ ఒత్తిడితోనే పోలీసులు ఈ కేసు నమోదు చేశారనే విమర్శలు వస్తున్నాయి.

• ఓఆర్‌ఆర్‌ దాడి ఘటనలో ముందుగా బీఆర్‌ఎస్‌ ఫిర్యాదు
• అయినా, కాంగ్రెస్‌ ఫిర్యాదుపైనే పోలీసుల తొలి కేసు

ఘట్‌కేసర్‌, మే 22: బీఆర్‌ఎస్‌ మేయర్‌, కార్పొరేటర్ల కిడ్నాప్‌కు సినీ ఫక్కీలో ప్రయత్నించిన కాంగ్రెస్‌ నాయకులపై ఫిర్యాదు చేస్తే బాధిత నాయకులపైనే పోలీసులు కేసు నమోదు చేశారు. అధికార పార్టీ ఒత్తిడితోనే పోలీసులు ఈ కేసు నమోదు చేశారనే విమర్శలు వస్తున్నాయి. ఈ నెల 19న పీర్జాదిగూడ మేయర్‌ జక్క వెంకట్‌రెడ్డి, మరికొందరు బీఆర్‌ఎస్‌ కార్పొరేటర్ల కిడ్నాప్‌నకు కాంగ్రెస్‌ నాయకులు యత్నించారు. ఓఆర్‌ఆర్‌పై కార్లను ఛేజ్‌ చేస్తూ నానా హంగామా సృష్టించారు. ఈ ఘటనపై ముందుగా బీఆర్‌ఎస్‌ ఫిర్యాదు చేసింది. కానీ, పోలీసులు కేసు నమోదు చేయలేదు. కాగా, పెద్దఅంబర్‌పేట్‌లో ఒక ఫంక్షన్‌కు హాజరై ఓఆర్‌ఆర్‌పై అంబర్‌పేట్‌ నుంచి పీర్జాదిగూడకు డిప్యూటీ మేయర్‌ శివకుమార్‌, శ్రీధర్‌రెడ్డి, చంద్రారెడ్డి మరో 10 మందితో కలిసి తిరిగి వెళ్తుండగా తమను బీఆర్‌ఎస్‌ నాయకులు అడ్డగించి, తమపై దాడికి ప్రయత్నించారని కార్పొరేటర్‌ అమర్‌సింగ్‌ ఘట్‌కేసర్‌ పోలీసులకు ఫిర్యాదు ఇవ్వడంతో వెంటనే మేయర్‌ వెంకట్‌రెడ్డితోపాటు హరిశంకర్‌రెడ్డి, అనంతరెడ్డి, వెంకట్‌రెడ్డి తదితరులపై వెంటనే కేసు నమోదు చేశారు. ఆ తర్వాత ఓఆర్‌ఆర్‌పై పీర్జాదిగూడ మేయర్‌, కార్పొరేటర్ల్లను కిడ్నాప్‌ ఘటనపై బీఆర్‌ఎస్‌ నేత రఘువర్ధన్‌రెడ్డి ఫిర్యాదు చేయడంతో కాంగ్రెస్‌ నాయకులైన అమర్‌సింగ్‌, శ్రీధర్‌రెడ్డి, నవీన్‌రెడ్డి, చంద్రారెడ్డి తదితరులపై పోలీసులు కేసు నమోదు చేశారు. కాగా, పరస్పర ఫిర్యాదులు రావడంతో ఇరువర్గాలపై కేసులు నమోదు చేశామని ఘట్‌కేసర్‌ ఇన్‌స్పెక్టర్‌ సైదులు తెలిపారు.