తిరుమలగిరిసాగర్‌ తహసీల్దార్‌కు అరెస్ట్‌ వారెంట్‌ ?

తిరుమలగిరిసాగర్‌ మండల తహసీల్దార్‌ అనిల్‌ను అరెస్ట్‌ చేసి తమ ముందు హాజరుపర్చాలని నల్లగొండ ఎస్పీకి తెలంగాణ మానవహక్కుల కమిషన్‌ ఉత్తర్వులు జారీచేసిన విషయం ఆదివారం ఆలస్యంగా వెలుగుచూసింది.

హాలియా, మార్చి 8: తిరుమలగిరిసాగర్‌ మండల తహసీల్దార్‌ అనిల్‌ను అరెస్ట్‌ చేసి తమ ముందు హాజరుపర్చాలని నల్లగొండ ఎస్పీకి తెలంగాణ మానవహక్కుల కమిషన్‌ ఉత్తర్వులు జారీచేసిన విషయం ఆదివారం ఆలస్యంగా వెలుగుచూసింది. మండలంలోని ఓ విషయమై 18 ఫిబ్రవరి 2026 ఉదయం 11 గంటలకు కమిషన్‌ ముందు నివేదిక సమర్పించాలని తిరుమలగిరి సాగర్‌ తహసీల్దార్‌కు గత ఏడాది డిసెంబర్‌ 9న షరతులతో కూడిన ఉత్తర్వులను హెచ్‌ఆర్‌సీ జారీచేసింది.

కమిషన్‌ పేర్కొన్న సమయానికి నివేదిక సమర్పించడంలో తహసీల్దార్‌ విఫలమయ్యారు. దీంతో 13 ఏప్రిల్‌ 2026 ఉదయం 11 గంటలకు తహసీల్దార్‌ను అరెస్ట్‌ చేసి కమిషన్‌ ముందు హాజరుపరచాలని హెచ్‌ఆర్‌సీ నల్లగొండ జిల్లా ఎస్పీని ఆదేశిస్తూ ఉత్తర్వులు జారీ చేసింది. హెచ్‌ఆర్‌సీ అరెస్ట్‌ వారెంట్‌ జారీతో మండలంలోని ప్రభుత్వ అధికారులు ఒక్కసారిగా ఉలిక్కిపడ్డారు.

మండలంలోని ఏ వ్యక్తి ..ఏ అంశంపై.. ఎందుకు ఫిర్యాదు చేశాడు, కమిషన్‌కు ఏ నివేదిక అందజేయాలి అనే విషయంలో స్పష్టతలేదని రెవెన్యూశాఖలో పనిచేసే ఉద్యోగి ఒకరు పేర్కొన్నారు. మానవ హక్కుల కమిషన్‌ ఆదేశానుసారంగా ఎస్పీ తహసీల్దార్‌ను అరెస్ట్‌ చేసి కమిషన్‌ ముందు హాజరుపరుస్తారా లేక వ్యక్తిగత పూచీకత్తుపై కమిషన్‌కు నివేదిక అందజేస్తారా అన్న విషయం నెలరోజుల్లో తేలనుంది.