ఏసీబీకి చిక్కిన ఏవో

ట్రేడర్స్‌ రెన్యూవల్‌ కోసం లంచం తీసుకుంటున్న మండల వ్యవసాయాధికారిని ఏసీబీ అధికారులు సోమవారం రెడ్‌హ్యాండెడ్‌గా పట్టుకున్నారు. ఈ మేరకు ఏబీసీ డీఎస్పీ రమణమూర్తి మీడియాకు వివరాలు వెల్లడించారు.

• మారుతి ట్రేడర్స్‌ రెన్యూవల్‌ కోసం లంచం డిమాండ్‌
• రూ.38 వేలు తీసుకుంటుండగా పట్టుకున్న అధికారులు

దహెగాం, మే 27: ట్రేడర్స్‌ రెన్యూవల్‌ కోసం లంచం తీసుకుంటున్న మండల వ్యవసాయాధికారిని ఏసీబీ అధికారులు సోమవారం రెడ్‌హ్యాండెడ్‌గా పట్టుకున్నారు. ఈ మేరకు ఏబీసీ డీఎస్పీ రమణమూర్తి మీడియాకు వివరాలు వెల్లడించారు. కుమ్రం భీం ఆసిఫాబాద్‌ జిల్లా దహెగాం మండలం అయినం గ్రామంలోని మారుతి ట్రేడర్స్‌ (ఫర్టిలైజర్‌ అండ్‌ సీడ్స్‌) దుకాణం రెన్యూవల్‌ కోసం యజమాని చౌదరి శ్యాంరావు గత నెల 27న ఆన్‌లైన్‌లో దరఖాస్తు చేసుకున్నాడు. రెన్యూవల్‌ కాకపోవడంతో మండల వ్యవసాయాధికారి వంశీకృష్ణను సంప్రదించాడు.

ఫర్టిలైజర్‌ దుకాణానికి రూ.20 వేలు, సీడ్స్‌ షాపునకు రూ.18 వేలు లంచం ఇస్తేనే రెన్యూవల్‌ చేస్తానని ఏవో చెప్పాడు. చేసేది లేక శ్యాంరావు ఏసీబీ అధికారులను సంప్రదించాడు. వారి ప్లాన్‌ ప్రకారం.. సోమవారం శ్యాంరావు ఏవోకు ఫోన్‌ చేసి డబ్బులు ఇస్తానని, ఎక్కడికి రమ్మంటారని అడిగాడు. దహెగాంలోని ఓ ఫర్టిలైజర్‌ దుకాణంలో ఉన్నానని చెప్పగా.. శ్యాంరావు డబ్బులతో అక్కడికి వెళ్లాడు. మొదట తన షాపు రెన్యూవల్‌కు సంబంధించిన రికార్డులపై సంతకాలు చేయించుకున్న తర్వాత ఏవోకు రూ.38 వేలు అందించాడు. ఆ డబ్బులతో తన కారులో వస్తున్న ఏవోను ఏసీబీ డీఎస్పీ రమణమూర్తి ఆధ్వర్యంలో అధికారులు అదుపులోకి తీసుకున్నారు. నగదును స్వాధీనం చేసుకున్నారు.