MBBS Seats | దేశంలో ఏటా ఎంత మంది డాక్టర్లు తయారవుతున్నారో తెలుసా?

దేశంలో ఏటా ఎంత మంది డాక్టర్లు తయారవుతున్నారో తెలుసా.. అక్షరాలా లక్షకుపైనే. దేశవ్యాప్తంగా మెడికల్‌ కాలేజీల సంఖ్య విపరీతంగా పెరగటంతో క్రమంగా డాక్టర్ల కార్ఖానాగా తయారవుతున్నది.

• దేశవ్యాప్తంగా అన్ని కళాశాలల్లో కలిపి 1,08,940 ఎంబీబీఎస్‌ సీట్లు
• పదేండ్లలో 82 శాతం మేర పెరిగిన మెడికల్‌ కాలేజీల సంఖ్య
• ప్రస్తుతం దేశంలో ఉన్న డాక్టర్ల సంఖ్య18.73 లక్షల మంది
• సేవలందిస్తున్న నర్సుల సంఖ్య 36.14 లక్షల మంది

MBBS Seats | హైదరాబాద్‌, డిసెంబర్‌ 6 (నమస్తే తెలంగాణ): దేశంలో ఏటా ఎంత మంది డాక్టర్లు తయారవుతున్నారో తెలుసా.. అక్షరాలా లక్షకుపైనే. దేశవ్యాప్తంగా మెడికల్‌ కాలేజీల సంఖ్య విపరీతంగా పెరగటంతో క్రమంగా డాక్టర్ల కార్ఖానాగా తయారవుతున్నది. కేంద్ర ప్రభుత్వం తాజాగా లోక్‌ సభకు వెల్లడించిన వివరాల ప్రకారం దేశంలో ప్రస్తుతం ప్రభుత్వ, ప్రైవేట్‌ కలిపి 706 మెడికల్‌ కాలేజీలు ఉన్నాయి. వీటిల్లో 1,08,940 ఎంబీబీఎస్‌ సీట్లు అందుబాటులో ఉన్నాయి.

2014తో పోల్చితే మెడికల్‌ కాలేజీల సంఖ్య 82 శాతం పెరిగింది. పదేండ్ల కింద 387 కాలేజీలు మాత్రమే ఉండేవి. 51,348 ఎంబీబీఎస్‌ సీట్లు అందుబాటులో ఉండగా.. ఇప్పుడు 112 శాతం పెరిగింది. పీజీ సీట్లు 31,185 నుంచి 70,674కు పెరిగాయి. 127 శాతం పెరుగుదల నమోదైంది.

• ప్రస్తుతం దేశంలోని అన్ని రాష్ర్టాల మెడికల్‌ కౌన్సిళ్లలో కలిపి 18.73 లక్షల మంది వైద్యులు నమోదైనట్టు కేంద్రం తెలిపింది. ఇందులో 13.08 లక్షల మంది అలోపతిక్‌ వైద్యులు కాగా, 5.65 లక్షల మంది ఆయుష్‌ వైద్యులు ఉన్నారు.
• ప్రస్తుతం దేశంలో ప్రతి 834 మంది జనాభాకు ఒక వైద్యుడు అందుబాటులో ఉన్నారు. ప్రతి వెయ్యి జనాభాకు ఒక వైద్యుడు ఉండాలని ప్రపంచ ఆరోగ్య సంస్థ చెప్తున్నది. అంటే.. అంతకన్నా మించే డాక్టర్లు ఉన్నారన్నమాట.
• ప్రస్తుతం దేశవ్యాప్తంగా 2,268 నర్సింగ్‌ కాలేజీలు ఉన్నాయి. వీటిల్లో 1,20,585 నర్సింగ్‌ సీట్లు అందుబాటులో ఉన్నాయి.
• ప్రస్తుతం దేశంలో 36.14 లక్షల మంది రిజిస్టర్డ్‌ నర్సులు సేవలు అందిస్తున్నారు. ప్రతి వెయ్యి మంది జనాభాకు ఇద్దరు నర్సులు ఉన్నారు.