ఉస్మానియాలో అరుదైన శస్త్రచికిత్స

పేదల ధర్మాసుపత్రిగా పేరుగాంచిన హైదరాబాద్‌ ఉస్మానియా దవాఖానలో వైద్యులు మరో అరుదైన శస్త్రచికిత్స చేశారు. మూడేండ్ల బాలుడికి తల్లి కాలేయాన్ని విజయవంతంగా అమర్చి ఘనతను చాటారు.

• బాలుడికి కాలేయ మార్పిడి 
• తల్లి కాలేయాన్ని అమర్చిన వైద్య బృందం

సుల్తాన్‌బజార్‌,జూలై 17: పేదల ధర్మాసుపత్రిగా పేరుగాంచిన హైదరాబాద్‌ ఉస్మానియా దవాఖానలో వైద్యులు మరో అరుదైన శస్త్రచికిత్స చేశారు. మూడేండ్ల బాలుడికి తల్లి కాలేయాన్ని విజయవంతంగా అమర్చి ఘనతను చాటారు. ఖమ్మం జిల్లా కొణిజెర్ల మండలం కొండవనమాల గ్రామానికి చెందిన మోదుగు గుణశేఖర్‌, అమల దంపతుల కుమారుడు మాస్టర్‌ చౌహాన్‌ ఆదిత్య (3) పుట్టుకతోనే పిత్తాశయ ధమని, కాలేయ సమస్యలతో బాధపడుతున్నాడు. ఈ క్రమంలో ఉస్మానియా దవాఖానకు తీసుకురాగా, సర్జికల్‌ గ్యాస్ట్రో ఎంటరాలజీ వైద్యుడు డాక్టర్‌ మధుసూదన్‌ నేతృత్వంలోని బృందం వైద్య పరీక్షలను నిర్వహించింది. ఆదిత్యకు కాలేయ మార్పిడి చేయాలని ఆ వైద్యులు నిర్ణయించారు.

అతని తల్లి అమల తన కాలేయాన్ని ఇవ్వడానికి ముందుకొచ్చారు. దీంతో ఈ నెల 3న ఆదిత్యకు తల్లి కాలేయం నుంచి కొంత భాగాన్ని తీసి కాలేయ మార్పిడి శస్త్ర చికిత్సను విజయవంతంగా నిర్వహించారు. ప్రస్తుతం తల్లి, కుమారులిద్దరూ క్షేమంగా ఉండటంతో బుధవారం డిశ్చార్జి చేశారు. వైద్య బృందాన్ని రాష్ట్ర వైద్య ఆరోగ్య శాఖ మంత్రి దామోదర రాజనర్సింహా, ఉస్మానియ దవాఖానా సూపరింటెండెంట్‌ డాక్టర్‌ బీ నాగేందర్‌ ప్రత్యేకంగా అభినందించారు.