Kalyana Lakshmi | కల్యాణలక్ష్మి తులం బంగారం తరుగు!.. బడ్జెట్‌లో కానరాని కేటాయింపులు

కల్యాణలక్ష్మి పథకం కింద పేదింటి ఆడబిడ్డల పెండ్లికి రూ.1,00,016 నగదుతోపాటు తులం బంగారం ఇస్తామన్న కాంగ్రెస్‌ హామీ అటకెక్కింది. అందుకు తాజా బడ్జెట్‌లో చేసిన కేటాయింపులే నిదర్శనం. కల్యాణలక్ష్మిపై పథకంపై అధికారులు ప్రభుత్వానికి ఇప్పటికే నివేదిక అందజేశారు. కానీ, ప్రస్తుత బడ్జెట్‌లో తులం బంగారాన్ని అందించేందుకు సరిపడా నిధులు కేటాయించలేదు.

• పెండ్లినాడే అందిస్తామని నాడు హామీ
• పెండింగ్‌లో 82 వేల దరఖాస్తులు

Kalyana Lakshmi | హైదరాబాద్‌, జూలై 25 (నమస్తే తెలంగాణ): కల్యాణలక్ష్మి పథకం కింద పేదింటి ఆడబిడ్డల పెండ్లికి రూ.1,00,016 నగదుతోపాటు తులం బంగారం ఇస్తామన్న కాంగ్రెస్‌ హామీ అటకెక్కింది. అందుకు తాజా బడ్జెట్‌లో చేసిన కేటాయింపులే నిదర్శనం. కల్యాణలక్ష్మిపై పథకంపై అధికారులు ప్రభుత్వానికి ఇప్పటికే నివేదిక అందజేశారు. కానీ, ప్రస్తుత బడ్జెట్‌లో తులం బంగారాన్ని అందించేందుకు సరిపడా నిధులు కేటాయించలేదు. బీఆర్‌ఎస్‌ ప్రభుత్వం కేటాయించిన తరహాలోనే కల్యాణలక్ష్మి పథకం అమలు కోసం ఎస్సీలకు రూ.500 కోట్లు, ఎస్టీలకు రూ.260 కోట్లు, మైనార్టీలకు రూ.450 కోట్లు కేటాయించింది.

బీసీలకు గతంలో రూ.2వేల కోట్లు కేటాయించగా, కాంగ్రెస్‌ ప్రభుత్వం స్వల్పంగా రూ.175 కోట్లు పెంచి రూ.2,175 కోట్లు కేటాయించింది. కల్యాణలక్ష్మి, షాదీముబారక్‌ పథకాల కింద ఏటా దాదాపు 1.50 నుంచి 2 లక్షల మంది ఆడబిడ్డలు ఆర్థిక సాయాన్ని అందుకుంటున్నారు. ఇప్పటికే కల్యాణలక్ష్మి, షాదీముబారక్‌ పథకాలకు సంబంధించి 82 వేలకుపైగా దరఖాస్తులు పెండింగ్‌లో ఉన్నాయి. అందులో ఈ ఆర్థిక సంవత్సరంలో వచ్చినవే 30 వేలకుపైగా ఉన్నాయి. ఈ నేపథ్యంలో ప్రస్తుతం కాంగ్రెస్‌ ప్రభుత్వం బడ్జెట్‌లో కేటాయించిన నిధులు నగదు సాయానికే సరిపోతాయి. తులం బంగారం హామీ అమలు అటకెక్కినట్టేనని అర్థమవుతున్నది.