గుండెకు గాయం… ఇక మాయం!

హృద్రోగం… కోట్లాది జీవితాలను నరకంగా మార్చిన మహమ్మారి. సమస్య తీవ్రమై గుండెలో కొంతభాగం దెబ్బతిన్నప్పుడు, వారికి ఇతరుల గుండెను అమర్చడమో, యంత్రాల ద్వారా రక్త ప్రసరణ కొనసాగించడమో చేస్తారు. ఈ రెండు పద్ధతులూ ఖరీదైనవి, సంక్లిష్టమైనవి. పోనీ దెబ్బతిన్న గుండెను సరిచేద్దామా అంటే, ఇప్పటివరకూ అది అసాధ్యంగా ఉండేది. ఎందుకంటే గుండెలో కొంతభాగం దెబ్బతిన్నాక, దాన్ని తిరిగి బాగుచేయడం కుదిరేది కాదు. ఓ గాయంలా శాశ్వతంగా ఉండిపోయేది. గతంలోనే, చిన్నచిన్న జంతువుల్లో దెబ్బతిన్న శరీరభాగాలు తిరిగి పనిచేసేలా.. ఆయా కణాలను ప్రభావితం చేయగలిగారు. కానీ మనుషుల మీద ఈ తరహా ప్రయోగాలు ఫలించలేదు. ఇప్పుడా సమస్య తీరిపోయింది. టెక్సాస్‌కు చెందిన బేలర్‌ కాలేజ్‌ ఆఫ్‌ మెడిసిన్‌ నిపుణులు ఈ ఘనత సాధించారు. మన రక్తనాళాల్లో ఉండే ‘ఎండోథీలియల్‌’ కణాలు తమ సూచనలకు స్పందిస్తున్నాయని గ్రహించి, వాటి ద్వారా గుండె కండరాలను సరిదిద్దే ప్రయత్నం చేశారు. ఇప్పటికిప్పుడు కాకపోయినా… భవిష్యత్తులో ఈ ప్రక్రియ ద్వారా గుండెవ్యాధులను సరిదిద్దవచ్చని చెబుతున్నారు.