Visit:
అరవై ఏండ్లు దాటగానే కృష్ణా రామా అనుకుంటూ మూలన కూర్చోవాలి అనుకొనే తత్వం చాలామందిది. కొందరైతే అసలు ఈ వయసు వరకూ పని చేయడానికి కూడా బద్ధకిస్తారు. పంజాబ్‌కు చెందిన హర్భజన్‌ కౌర్‌ మాత్రం దీనికి పూర్తిగా భిన్నం. ఆమె వృద్ధాప్యంలో కూడా కుర్రాళ్లలా ఉత్సాహంగా ఉన్నారు. 90 ఏండ్ల వయసులో కొత్తగా వ్యాపారాన్ని ప్రారంభించి 99 ఏండ్లకూ ఇంకా దాన్ని కొనసాగిస్తూ… కుర్ర ఆంత్రప్రెన్యూర్లకు సవాలు విసురుతున్నారు.
ఇప్పటి దాకా మనం వేలకోట్ల రూపాయలు సంపాదించిన ఎందరో పారిశ్రామికవేత్తల విజయ గాథలు చదివి ఉంటాం. వేల మందికి ఉపాధి చూపిన వ్యాపార వేత్తల గురించి తెలుసుకొని ఉంటాం. తిండి లేని స్థితి నుంచి వ్యాపార సామ్రాజ్యాలు నిర్మించిన వారి గురించీ ఎరిగి ఉంటాం. కానీ హర్భజన్‌ కౌర్‌ వేలకోట్ల నెట్‌ వర్త్‌ ఉన్న పారిశ్రామిక వేత్త కాదు. వేలమందికి ఉపాధి చూపిన వారూ కాదు. అయినా ఆమె ప్రస్థానం ఎంతో మందికి స్ఫూర్తిని ఇస్తున్నది. కారణం, ఆమె వయసు ఇప్పుడు 99 సంవత్సరాలు. ఇంతకాలం బతకడం అరుదే కావచ్చు కానీ అసాధ్యం ఏమీ కాదు. ఈ వయసు వారిని అక్కడక్కడ మనం చూసి కూడా ఉంటాం. అయితే, తన కాళ్ల మీద తాను నిలబడి, సొంత రూపాయి అంటూ ఒక్కటైనా సంపాదించాలన్న కోరికను తీర్చుకోవాలన్న ప్రయత్నం 90 ఏండ్ల వయసులో చేయడం, ఇప్పటికీ ఆ పనిని కొనసాగిస్తూ ఉండటం ఆమెను గుంపు బయట నిలబెడుతుంది. తనకు బాగా చేతనైన బేసన్‌ బర్ఫీ తయారీనే ఆమె బిజినెస్‌ ఐడియా. ఆ స్వీట్‌ను ఆమె స్వయంగా తయారు చేసి ఆన్‌లైన్‌లోనూ విక్రయిస్తుంది కూడా.
1926లో పంజాబ్‌లోని తర్‌ తరన్‌ లో జన్మించిన హర్భజన్‌ జీవితం 90 ఏండ్ల వయసు వరకు అందరిలానే సామాన్యంగా గడిచిపోయింది. ఆమె తల్లిదండ్రులు ఇంట్లోనే మిఠాయిలు తయారు చేసేవారు. చిన్నప్పటి నుంచి ఆమె కూడా స్వీట్స్‌ ఇష్టంగా చేసేది. ముఖ్యంగా బేసన్‌కీ బర్ఫీ బాగా చేసేది. ఆమె భర్త పంజాబ్‌లో ప్రభుత్వ అధికారిగా పని చేశారు. రిటైర్‌ అయిన తరువాత చండీఘడ్‌లో స్థిరపడ్డారు. కుటుంబాన్ని చూసుకోవడంలోనే ఆమె జీవితం గడిచిపోయింది. ఆమె సొంత ఇష్టాయిష్టాల గురించి ఎవరూ పట్టించుకోలేదు, అడగలేదు. ఆమె కూడా అవన్నీ మరచిపోయింది. 90 ఏండ్ల వయసుకు చేరుకున్నాక ఒక రోజు హర్భజన్‌ కౌర్‌ కుమార్తె రవీనా తల్లితో యేవో ముచ్చట్లు చెబుతూ ‘అమ్మా 90 ఏండ్ల నిండైన జీవితం గడిపావు కదా? నీ జీవితంలో తీరని కోరిక ఏమైనా ఉందా?’ అని సరదాగా అడిగింది. దానికి హర్భజన్‌ కౌర్‌ మాత్రం సీరియస్‌గానే ఆలోచించి ‘జీవితమంతా కుటుంబం కోసం బతికాను. ఇంటి పని చేశాను. కానీ నేనూ అంటూ సొంతంగా ఒక్క రూపాయి కూడా సంపాదించలేదు. నా జీవితంలో ఇదొక్కటే తీరని కోరిక. అసంతృప్తి కలిగించే విషయం’ అని మనసులోని మాట చెప్పింది.
తల్లి రుచికరమైన బేసిన్‌ బర్ఫీ చేస్తుందని తెలిసిన రవీనా, అంత సంపూర్ణ జీవితం గడిపిన ఆమెకు ఈ ఒక్క అసంతృప్తి ఎందుకు మిగిలిపోవాలి అని ఆలోచించి, అదే బేసిన్‌ బర్ఫీ తయారు చేసి అమ్మే వ్యాపారం మొదలు పెట్టమని సలహా ఇచ్చింది. దాంతో హర్భజన్‌ కౌర్‌ బర్ఫీ తయారు చేసి అమ్మడం మొదలు పెట్టింది. ఆ నోటా ఈ నోటా ఈ విషయం బాగా ప్రచారం అయి అమ్మకాలు పెరిగాయి. స్థానిక పత్రికల్లో, యూట్యూబ్‌లో హర్భజన్‌ కౌర్‌ బేసన్‌ బర్ఫీ గురించి బాగా ప్రచారం జరిగింది. పలు ప్రముఖ పత్రికల్లోనూ వార్త వచ్చాక దీనికి ఆన్‌లైన్‌లో ఆర్డర్స్‌ వస్తున్నాయి. ఏదో సరదాగా వ్యాపారం ప్రారంభించి, మీడియాలో వార్తలు రాగానే వ్యాపారం ముగించలేదు కౌర్‌. గత తొమ్మిదేండ్లుగా దీన్ని కొనసాగిస్తున్నారు.
కౌర్‌ అమ్మే స్వీట్లకు ‘హర్భజన్స్‌… మేడ్‌ విత్‌ లవ్‌’ అని పేరు పెట్టారు. మొదట ఆర్డర్ల మీద తయారు చేసి ఇచ్చేవారు. తరువాత కుటుంబ సభ్యుల సహకారంతో చండీఘడ్‌లోని మార్కెట్‌కు వెళ్లి బర్ఫీ అమ్ముతున్నారు. బర్ఫీతో పాటు బెల్లం, సొరకాయ హల్వాలు, మసాలాలు, టమాటా, ఆవకాయలాంటి పచ్చళ్లు కూడా తయారు చేస్తున్నారు. మహీంద్రా సంస్థల చైర్మన్‌ ఆనంద్‌ మహీంద్రా, మాజీ పంజాబ్‌ సీఎం అమరీందర్‌ సింగ్‌ సహా పలువురు ప్రముఖులు ఆమె వంటకాలకు అభిమానులు. అయితే ఈ వ్యాపారంలో ఈ పెద్దావిడ కోట్లు సంపాదించి ఉండక పోవచ్చు. కానీ, ఏ వయసులోనైనా మనసుకు నచ్చిన పని ప్రారంభించవచ్చు అని నిరూపిస్తూ కోట్లాది మందికి స్ఫూర్తిగా నిలిచారు. నిజానికి రిటైర్మెంట్‌ తరువాత ఖాళీగా ఇంట్లో కూర్చొని విసుగ్గా కాలాన్ని గడిపే బదులు, శరీరం సహకరించినంత కాలం ఏదో ఒక నచ్చిన పని చేయడం ఆరోగ్యానికి మంచిది. ఏ పనీ చేయకుండా ఉండేవారి కన్నా పని చేసేవారు ఆరోగ్య వంతులుగా ఉంటారన్నది మనందరికీ తెలిసిన విషయమే!
