Brooklyn Curry Project | నేతి వాసనలు, దోసె ఘుమఘుమలు, సాంబారు పొగలు.. పిజ్జాబర్గర్ల ప్రియులు పార్టీ ఫిరాయించేలా చేస్తున్నాయి. తొమ్మిదేండ్ల క్రితం బెంగళూరు నుంచి అమెరికాలోని బ్రూక్లిన్ స్ట్రీట్కు వలస వెళ్లిన శ్వేత, వెంకట్రాజు దంపతులు దక్షిణాది రుచులతో వేడివేడి ఫలహారాలు వడ్డిస్తున్నారు. ధర కూడా తక్కువే. వెంకట్ వృత్తిరీత్యా లాయర్. తొలి రోజుల్లో కమ్మని మసాలా దోసె కోసం ఊరంతా వెతికినా ఫలితం ఉండేది కాదు. దీంతో చచ్చినట్టు ఇంట్లోనే చేసుకునేవారు. స్కూల్ ఫెస్ట్లో కూతురు నడిపిన లెమనాయిడ్ స్టాల్ తమకు కొత్త వ్యాపార ఆలోచన ఇచ్చిందని చెబుతారు ఆ దంపతులు. ఉదయం పదిన్నరకు బ్రూక్లిన్ కర్రీ ప్రాజెక్ట్ (బీసీపీ) తలుపులు తెరుచుకుంటాయి.
స్టాక్ ఉన్నంతసేపు వ్యాపారం నడుస్తుంది. స్థానికంగా జరిగే వివిధ ఫిల్మ్ ఫెస్టివల్స్లోనూ దక్షిణాది రుచుల స్టాల్స్ ఏర్పాటు చేస్తారు శ్వేత, రాజు. ‘కస్టమర్లు మెచ్చుకున్నప్పుడు సంతోషంగా ఉంటుంది. మీ రుచులు ఇండియాలోని అమ్మానాన్నల్ని గుర్తుకు తెచ్చాయి.. అని ఎవరైనా చెప్పినప్పుడు ప్రపంచాన్ని గెలిచినంత ఆనందంగా ఉంటుంది’ అంటారు ఆ ఆలూ మగలు. దాంతోపాటే, భారతీయ రుచులు అంటే టిక్కా మసాలా మాత్రమే కాదని అమెరికాలో చాటి చెప్పడమే బ్రూక్లిన్ కర్రీ ప్రాజెక్ట్ (బీసీపీ) లక్ష్యమని ప్రకటిస్తారు కూడా. ఇడ్లీ, వడ, కిచిడీ, ఊతప్పం, ఉప్మా.. ఎన్ని రుచులున్నా మసాలా దోసె కోసమే జనం కిలోమీటర్ల దూరం నుంచీ వస్తారని సంబురంగా చెబుతూ మనకూ ఓ కడక్ దోసె వడ్డిస్తారు.