World Cup Trophy : అంతర్జాతీయ క్రికెట్ మండలి (ఐసీసీ) నాలుగేండ్లకోసారి ప్రతిష్ఠాత్మక వన్డే ప్రపంచకప్(ODI World Cup)ను నిర్వహిస్తుంటుంది. విజేతగా నిలిచిన జట్టుకు ట్రోఫీ(World Cup Trophy)ని బహుకరిస్తుంది. ఈ ట్రోఫీ దాదాపు 11 కిలోల బరువు, 60 సెంటీమీటర్ల ఎత్తులో ఉంటుంది. దీన్ని బంగారం, వెండితో తయారు చేస్తారు. అయితే.. ప్రతిసారి ప్రపంచకప్ విజేత కోసం బంగారం, వెండితో ట్రోఫీని తయారు చేస్తారా? అనే అనుమానం ప్రతి ఒక్కరికీ వచ్చే ఉంటుంది. కానీ, అలా చేయరు.
ప్రస్తుతం ప్రపంచ చాంపియన్కు అందిస్తున్న ట్రోఫీని 1999లో రూపొందించారు. ఇక అప్పటి నుంచి 2003, 07, 11, 15, 19 విజేతలకు ఇదే ట్రోఫీని బహుకరించారు. అయితే.. బహుమతి ప్రదాన సమయంలో మాత్రమే ఒరిజినల్ ట్రోఫీని విజేత చేతికి అందిస్తారు. ఆ తర్వాత దాన్ని తిరిగి దుబాయ్లోని ఐసీసీ ప్రధాన కార్యాలయంలో భద్రపరుస్తారు. అనంతరం వరల్డ్ కప్ నమూనా ట్రోఫీని విజేతగా నిలిచిన జట్టుకు అందిస్తారు. వికెట్ల రూపంలో ఉన్న మూడు పిల్లర్ల మధ్య బంతిని పోలి ఉండే విశ్వం నమూనాతో ఉన్న ట్రోఫీని గత ఆరు పర్యాయాలు అందించారు.
తొలిసారి 1975లో వన్డే ప్రపంచకప్ నిర్వహించారు. తొలి మూడు ఎడిషన్లలో ప్రూడెన్షియల్ కప్ ట్రోఫీ (Prudential Cup Trophy)అని పిలిచేవారు. ఆ తర్వాత 1987 ప్రపంచకప్ పోటీలకు భారత్ ఆతిథ్యమివ్వగా.. రియలన్స్ స్పాన్సర్గా వ్యవహరించింది. దీంతో ప్రూడెన్షియల్ కప్ కాస్తా.. రిలయన్స్ ట్రోఫీగా రూపాంతరం చెందింది. ఆ తర్వాత 1992లో ‘బెన్సన్, హెడ్జెస్ ట్రోఫీ, 1996లో ‘విల్స్ కప్ ట్రోఫీ’గా దీన్ని పిలిచారు. 1999 నుంచి స్పాన్సర్ల పేర్ల మీద కాకుండా కేవలం ప్రపంచకప్ అని అభివర్ణిస్తున్నారు.