Shaheen Afridi : దాయాదుల మధ్య నిన్న జరిగిన మ్యాచ్లో పాకిస్థాన్ స్పీడ్స్టర్ షాహీన్ ఆఫ్రీదీ(Shaheen Afridi) మరో రికార్డు సృష్టించాడు. శ్రీలంకలోని పల్లెకెల్ స్టేడియంలో నిప్పులు చెరిగిన షాహీన్ వరుస ఓవర్లలో భారత స్టార్ ఆటగాళ్లు రోహిత్ శర్మ(11), విరాట్ కోహ్లీ(4)లను సూపర్ డెలివరీతో బౌల్డ్ చేశాడు. దాంతో, ఒకే ఇన్నింగ్స్లో విరాట్, రోహిత్ను బౌల్డ్ చేసిన తొలి బౌలర్గా సరికొత్త రికార్డు నెలకొల్పాడు. తన రెండో స్పెల్లోనూ ఆఫ్రీదీ బెల్లెట్ లాంటి బంతులతో విరుచుకుపడ్డాడు. అప్పటికే హాఫ్ సెంచరీ బాది జోరు మీదున్న హార్దిక్ పాండ్యా(87), ఆల్రౌండర్ రవీంద్ర జడేజా(14)లను ఔట్ చేసి పాక్కు బ్రేక్ ఇచ్చాడు.
ఈ మ్యాచ్లో ఈ ఎడమ చేతివాటం పేసర్ మరో రికార్డు ఖాతాలో వేసుకున్నాడు. టీమిండియాపై షాహీన్ అత్యుత్తమ గణాంకాలు నమోదు చేశాడు. దాంతో, భారత జట్టుపై ఈ ఫీట్ సాధించిన మూడో పాక్ బౌలర్గా మరో రికార్డు ఖాతాలో వేసుకున్నాడు. 10 ఓవర్లలో 35 పరుగులు మాత్రమే ఇచ్చి నాలుగు వికెట్లు తీశాడు. అందులోనూ రెండు మెయిడెన్ ఓవర్లు ఉండడం గమనార్హం.
The Shaheen Afridi magic was on show in the #AsiaCup2023 clash against India 🪄#INDvPAK pic.twitter.com/P3ijOudIYW
— ICC (@ICC) September 2, 2023
ఒకదశలో 66 పరుగులకే 4 వికెట్లు కోల్పోయిన భారత్ను ఇషాన్ కిషన్(82), పాండ్యా ఆదుకున్నారు. పాక్ పేసర్లను ఉతికి ఆరేసిన వీళ్లు తమ మెరపు బ్యాటింగ్తో జట్టుకు పోరాడగలిగే స్కోర్ అందించారు. అయితే.. చివర్లో యువ పేసర్ నసీం షా, హ్యారీస్ రౌఫ్ చెలరేగడంతో భారత్ 266 పరుగులకే ఆలౌటయ్యింది. కానీ, పాక్ ఇన్నింగ్స్ మొదలవుతుందనగా వర్షం మళ్లీ మొదలైంది. ఎంతసేపటికీ వరుణుడు శాంతించకపోవడంతో అంపైర్లు మ్యాచ్ను నిలిపివేశారు. దాంతో మ్యాచ్ రిఫరీ ఇరుజట్లకు చెరొక పాయింట్ కేటాయించారు.