PV Sindhu : భారత స్టార్ షట్లర్, రెండుసార్లు ఒలింపిక్ విజేత పీవీ సింధు(PV Sindhu) ఈ ఏడాది టైటిల్ కోసం నిరీక్షిస్తోంది. ఈ సీజన్లో పలు టోర్నీల్లో సెమీస్లోనే ఇంటిదారి పట్టిన సింధు వచ్చే ఏడాది ప్యారిస్లో జరిగే ఒలింపిక్స్(Paris Olympics)లో పతకంపై గురిపెట్టింది. అందకని బ్యాడ్మింటన్ లెజెండ్ ప్రకాశ్ పదుకొనే (Prakash Padukone)ను మెంటార్గా నియమించుకున్న ఈ తెలుగుతేజం.. గత కొన్ని రోజులుగా కోర్టులో చెమటోడ్చుతుంది. అయితే.. ఈమధ్య ఒక పోడ్కాస్ట్లో సింధుకు ఊహించని ప్రశ్న ఎదురైంది.
వ్యక్తిగత విషయాల్ని చాలా గోప్యంగా ఉండేలా చూసుకొనే ఆమెను ఎవరితోనైనా డేటింగ్ చేశారా? అని అడిగారు. అందుకు సింధు తాను సింగిల్గానే ఉన్నానని బదులిచ్చింది. సింధు పోడ్కాస్ట్లో మాట్లాడిన వీడియో టీఆర్ఎస్ క్లిప్స్(TRS Clips) అనే యూట్యూబ్ ఛానెల్లో పెట్టారు. ప్రస్తుతం ఆ వీడియో వైరల్ అవుతోంది.ఆ వీడియోలో డేటింగ్ చేశారా? అనే ప్రశ్నకు సింధు.. ‘లేదు. నేను ఎవరితోనూ డేటింగ్ చేయలేదు. డేటింగ్ చేయడంలో తప్పేమీ లేదు. ఒకవేళ ఆ టైమ్ వస్తే అది జరుగుతుంది. ఇప్పటికైతే నేను సింగిల్గానే ఉన్నాన’ని చెప్పింది.
రిలేషన్షిప్పై సింధు మాట్లాడిన వీడియో
‘ప్రస్తుతానికి నా ఫోకసంతా బ్యాడ్మింటన్ మీదే. ఒలింపిక్స్లో పతకం గెలవడమే నా అంతిమ లక్ష్యం’ అని ఆమె చెప్పుకొచ్చింది. మీకు భాగస్వామి కావాలని అనుకుంటున్నారా? అనే ప్రశ్నకు సింధు.. ‘ఆ విషయం గురించి నేను అసలు ఆలోచించడం లేదు. అయితే.. నాకు పార్ట్నర్ కావాలి. కానీ, విధి ఏం నిర్ణయించిందో. నుదిటి మీద ఏం రాసుంటే అదే జరుగుతుంది’ అంటూ తెలివిగా సమాధానం చెప్పింది.
కామన్వెల్త్ క్రీడల అనంతరం గాయం కారణంగా సింధు దాదాపు 5 నెలల పాటు ఆటకి దూరమైంది. కోలుకుని బరిలోకి దిగిన ఆమె మునుపటి జోరు కనబర్చలేకపోతోంది. ఈ సీజన్లో మ్యాడ్రిడ్ స్పెయిన్ మాస్టర్స్(Madrid Spain Masters) ఫైనల్కు చేరడమే సింధు అత్యుత్తమ ప్రదర్శన. ఆతర్వాత ఆడిన అన్ని టోర్నీల్లోనూ సెమీస్ అడ్డంకిని దాట లేకపోయింది. యూఎస్ ఓపెన్, కెనడా ఓపెన్లలో సింధు క్వార్టర్ ఫైనల్లో ఓడింది.