Visit:
BCCI : భారత క్రికెట్ నియంత్రణ మండలి ఎన్నికలపై ఉత్కంఠ కొనసాగుతోంది. అధ్యక్షుడి పదవి సహా కార్యదర్శి, కోశాధికారి పోస్ట్‌లకు ఎలక్షన్స్ జరుగనున్న నేపథ్యంలో పలువురు పేర్లు తెరపైకి వస్తున్నాయి. ప్రెసిడెంట్ పదవి కోసం టీమిండియా దిగ్గజం సచిన్ టెండూల్కర్ (Sachin Tendulkar) పోటీ చేస్తారనే కథనాలు వినిపించాయి. కానీ, మాస్టర్ బ్లాస్టర్ విముఖత చూపినట్టు సమాచారం. తాజాగా బీసీసీఐ అధ్యక్షుడి రేసులో ఉన్నాడంటూ మరో వెటరన్ పేరు ఇప్పుడు నెట్టింట వైరలవుతోంది. అతడు ఎవరో కాదు.. మాజీ స్పిన్నర్ హర్భజన్ సింగ్ (Harbhajan Singh).
అంతర్జాతీయ క్రికెట్‌లో సుదీర్ఘ అనుభవం కలిగిన హర్భజన్ సింగ్ ప్రస్తుతం కామెంటేటర్‌గా కొనసాగుతున్నారు. పాకిస్థాన్‌తో క్రికెట్ మ్యాచ్‌లను తీవ్రంగా వ్యతిరేకిస్తున్న భజ్జీ బీసీసీఐ అధ్యక్ష పదవిపై ఆసక్తితో ఉన్నాడని టాక్. టీమిండియా లెజెండరీ స్పిన్నర్ అయిన అతడిని ఈసారి బరిలోకి దింపాలని పంజాబ్ క్రికెట్ సంఘం భావిస్తోంది. సెప్టెంబర్ 28న జరుగబోయే ఎన్నికలకు భజ్జీని నామినేట్ చేయాలని పీసీఏ పావులు కదుపుతోంది.
🚨 𝑹𝑬𝑷𝑶𝑹𝑻𝑺 🚨
Harbhajan Singh has reportedly been nominated by the Punjab Cricket Association as their representative, putting him in contention to become one of BCCI’s office-bearers. 🙌🏼#Cricket #HarbhajanSingh #BCCI #Sportskeeda pic.twitter.com/yFu7c8o9BO
— Sportskeeda (@Sportskeeda) September 12, 2025
ప్రతి రాష్ట్రం ఒక మాజీ ఆటగాడిని నామినేట్ చేసేందుకు వీలుంటుంది. సెప్టెంబర్ 20-21 తేదీల్లో నామినేషన్లను స్వీకరిస్తామని బీసీసీఐ ఎన్నికల అధికారి ఏకే జోటి తెలిపాడు. సో.. వచ్చే వారంలో ఆసక్తిగల అభ్యర్థుల జాబితా రానుంది. దాంతో.. అప్పుడుగానీ ప్రెసిడెంట్ పోటీలో ఉండేది ఎవరు? అనే విషయంపై స్పష్టత వస్తుంది. అయితే.. తాను బీసీసీఐ అధ్యక్ష పదవి రేసులో ఉన్నాననే విషయాన్ని హర్భజన్ ఇంకా ధ్రువీకరించలేదు.
బీసీసీఐ కొత్త అధ్యక్షుడి పదవికి నామినేషన్‌కు సెప్టెంబర్ 12 తుది గడువు. ఓటు హక్కు కలిగిన రాష్ట్ర క్రికెట్ సంఘాలు తమ అభ్యర్థి పేరును తెలియజేయాల్సి ఉంటుంది. ఎన్నికల ప్రక్రియ విషయానికొస్తే.. సెప్టెంబర్ 22 నుంచి దరఖాస్తుల పరిశీలన, వడబోత మొదలవుతుంది. సెప్టెంబర్ 23 వరకూ అభ్యర్థులు నామినేషన్‌ను వెనక్కి తీసుకోవచ్చు. ఆ తర్వాత పోటీలో ఉన్నవారి తుది జాబితాను ప్రకటిస్తారు. సెప్టెంబర్ 28న ఎన్నికలు జరుగుతాయి.
