IPL 2023 | చెన్నై సూప‌ర్ కింగ్స్ టీమ్‌లో బ‌ర్త్ డే సందడి.. వీడియో చూశారా..?

IPL 2023 : ఐపీఎల్ 16వ సీజ‌న్‌కు తెర‌లేవ‌డానికి ఒక్క రోజు మాత్ర‌మే ఉంది. ప్రాక్టీస్ జోరు పెంచిన సీఎస్కే ఆట‌గాళ్లు ఈ రోజు కాసేపు స‌ర‌దాగా గ‌డిపారు. ఆల్‌రౌండ‌ర్ డ్వేన్ ప్రిటోరియ‌స్ (Dwaine Pretorius) పుట్టిన‌రోజు కావ‌డంతో ఫ్రూట్ కేకు తెప్పించి అత‌డిని ఆశ్చ‌ర్యానికి గురి చేశారు.

March 30, 2023 / 07:23 PM IST

IPL 2023 | చెన్నై సూప‌ర్ కింగ్స్ టీమ్‌లో బ‌ర్త్ డే సందడి.. వీడియో చూశారా..?

IPL 2023 : ఐపీఎల్ 16వ సీజ‌న్‌కు తెర‌లేవ‌డానికి ఒక్క రోజు మాత్ర‌మే ఉంది. ఆరంభ పోరులో డిఫెండింగ్ చాంపియ‌న్ గుజ‌రాత్ టైట‌న్స్‌(GT)ను చెన్నై సూప‌ర్ కింగ్స్(CSK) ఢీ కొన‌నుంది. ప్రాక్టీస్ జోరు పెంచిన సీఎస్కే ఆట‌గాళ్లు ఈ రోజు కాసేపు స‌ర‌దాగా గ‌డిపారు. కార‌ణం ఏంటంటే.. ఆల్‌రౌండ‌ర్ డ్వేన్ ప్రిటోరియ‌స్ (Dwaine Pretorius) పుట్టిన‌రోజు. దాంతో, ఫ్రూట్ కేకు తెప్పించి అత‌డిని ఆశ్చ‌ర్యానికి గురి చేశారు. ఊహించిన పరిణామంతో షాక్ తిన్న ప్రిటోరియ‌స్ భార్య, కొడుకుతో క‌లిసి కేకు క‌ట్ చేశాడు.

ఈ సంద‌ర్భంగా కెప్టెన్ మ‌హేంద్ర సింగ్ ధోనీ(MS Dhoni)తో పాటు జ‌ట్టు స‌భ్యులు, స‌పోర్టింగ్ స్టాఫ్ అంద‌రూ చ‌ప్ప‌ట్లు కొడుతూ ప్రిటోరియ‌స్‌కు బ‌ర్త్ డే విషెస్ తెలిపారు. ప్రిటోరియ‌స్ బ‌ర్త్ డే సెల‌బ్రేష‌న్ వీడియోను సీఎస్కే యూట్యూబ్‌లో పోస్ట్ చేసింది. మాజీ క్రికెట‌ర్లు డ్వేన్ బ్రావో, మైక్ హ‌సీ, స్పిన్న‌ర్ మిచెల్ శాంట్న‌ర్‌.. త‌దిత‌రులు ఈ ఆల్‌రౌండ‌ర్‌కు శుభాకాంక్ష‌లు చెప్పారు. ఈ సీజ‌న్‌లో అత‌డు అద్భుతంగా రాణించాల‌ని అంతా ఆకాంక్షించారు. 2022 మెగా వేలంలో సీఎస్కే ఈ దక్షిణాఫ్రికా క్రికెట‌ర్‌ను రూ.50 ల‌క్ష‌ల క‌నీస ధ‌ర‌కు సొంత చేసుకుంది. స‌ఫారీ జ‌ట్టుకు వ‌న్డేలు, టీ20ల్లో ప్రాతినిథ్యం వ‌హించిన ఈ ఆల్‌రౌండ‌ర్ ఈ ఏడాది జ‌న‌వ‌రి 9న అంత‌ర్జాతీయ క్రికెట్‌కు వీడ్కోలు ప‌లికాడు. టీ20 లీగ్స్‌లో మాత్ర‌మే ఆడుతున్నాడు.

ఆరంభం అదిరిపోయేలా..

అహ్మ‌దాబాద్‌లోని న‌రేంద్ర మోడీ స్టేడియంలో రేపు (మార్చి 31న) ఐపీఎల్ పండుగ షురూ కానుంది. సాయంత్ర 5ః30 గంట‌ల నుంచి ఓపెనింగ్ సెర‌మొనీ జ‌ర‌గ‌నుంది. బీసీసీఐ అధ్య‌క్షుడు రోజ‌ర్ బిన్ని, కార్య‌ద‌ర్శి జై షాతో పాటు ప‌లువురు అధికారులు టోర్నీ ప్రారంభ వేడుక‌ల‌కు హాజ‌రుకానున్నారు. ఇండియా క్ర‌ష్‌గా పేరొందిన క‌న్నడభామ ర‌ష్మిక మందాన‌ (Rashmika Mandanna), మిల్క్‌బ్యూటీ త‌మన్నా భాటియా (Tamanna Bhatia) ఆరంభ వేడుక‌ల్లో డాన్స్‌తో అల‌రించ‌నున్నారు. బాలీవుడ్ పాపుల‌ర్ సింగ‌ర్ అర్జిత్ సింగ్(Arjith Singh) త‌న గాత్రంతో అభిమానుల‌ను ఫిదా చేయ‌నున్నాడు. అనంత‌రం ప‌ది జ‌ట్ల కెప్టెన్లు ట్రోఫీని ఆవిష్క‌రించనున్నారు. తొలి మ్యాచ్‌లో డిఫెండింగ్ చాంపియ‌న్ గుజ‌రాత్ టైట‌న్స్, నాలుగుసార్లు చాంపియ‌న్ చెన్నై సూప‌ర్ కింగ్స్ త‌ల‌ప‌డ‌నున్నాయి.