AUS vs AFG: ఇబ్రహీం జద్రాన్ సరికొత్త చరిత్ర.. ప్రపంచకప్ లో అఫ్గాన్ తరఫున తొలి శతకం

AUS vs AFG: అఫ్గానిస్తాన్.. ఆస్ట్రేలియాతో ముంబైలోని వాంఖెడే వేదికగా జరుగుతున్న మ్యాచ్లో అఫ్గాన్ ఓపెనర్ ఇబ్రహీం జద్రాన్ సరికొత్త చరిత్ర సృష్టించాడు.

AUS vs AFG:  భారత్‌ వేదికగా జరుగుతున్న వన్డే ప్రపంచకప్‌లో సంచలన విజయాలతో దూసుకుపోతున్న అఫ్గానిస్తాన్‌.. ఆస్ట్రేలియాతో ముంబైలోని వాంఖెడే వేదికగా జరుగుతున్న మ్యాచ్‌లో కూడా  రాణిస్తోంది.  ఈ మ్యాచ్‌లో  అఫ్గాన్‌  ఓపెనర్‌ ఇబ్రహీం జద్రాన్‌ సరికొత్త చరిత్ర సృష్టించాడు. 2015 నుంచి వన్డే వరల్డ్‌ కప్‌ ఆడుతున్న అఫ్గానిస్తాన్‌ తరఫున ఇంతవరకూ (ఆసీస్‌తో మ్యాచ్‌కు ముందు) ఒక్క బ్యాటర్‌ కూడా సెంచరీ నమోదు చేయలేదు. తాజాగా జద్రాన్‌ ఆ కొరత తీర్చి చరిత్ర  పుస్తకాలలో తన పేరును  సువర్ణాక్షరాలతో లిఖించుకున్నాడు.

ఆసీస్‌తో జరుగుతున్న మ్యాచ్‌లో  ఓపెనర్‌గా బరిలోకి దిగిన  జద్రాన్‌.. కంగారూల  పేస్‌ త్రయం  కమిన్స్‌, స్టార్క్‌,  హెజిల్‌వుడ్‌లతో పాటు స్పిన్నర్‌  ఆడమ్‌ జంపా,  గ్లెన్‌ మ్యాక్స్‌వెల్‌లను సమర్థవంతంగా ఎదుర్కున్నాడు. 62 బంతుల్లో  అర్థ సెంచరీ చేసిన జద్రాన్‌..  131 బంతుల్లో మూడంకెల స్కోరుకు చేరుకున్నాడు.

జద్రాన్‌ కంటే  ముందు అఫ్గాన్‌ తరఫున వరల్డ్‌ కప్‌లో అత్యధిక స్కోరు చేసిన బ్యాటర్లలో   సమిఉల్లా  షిన్వారి ముందున్నాడు. షిన్వారి.. 2015లో స్కాట్లాండ్‌పై  96 పరుగులు చేశాడు.   ఈ జాబితాలో ఇబ్రహీం జద్రాన్‌ (2023లో  చెన్నైతో  జరిగిన మ్యాచ్‌లో 87), ఇక్రామ్‌ అలిఖిల్‌ (2019లో వెస్టిండీస్‌పై 86), హష్ముతుల్లా షాహిది  (2023లో ఢిల్లీలో భారత్‌పై జరిగిన మ్యాచ్‌లో 80) లు  టాప్‌-5లో ఉన్నారు.