కీర్తి, ప్రతిష్ఠలతో కోహ్లీ మారిపోయాడు: మిశ్రా

భారత స్టార్‌ క్రికెటర్‌ విరాట్‌కోహ్లీపై మాజీ ప్లేయర్‌ అమిత్‌మిశ్రా సంచలన వ్యాఖ్యలు చేశాడు. కోహ్లీ, రోహిత్‌శర్మ వ్యవహారశైలిలో చాలా వైరుధ్యం ఉందని చెప్పుకొచ్చాడు.

ఢిల్లీ: భారత స్టార్‌ క్రికెటర్‌ విరాట్‌కోహ్లీపై మాజీ ప్లేయర్‌ అమిత్‌మిశ్రా సంచలన వ్యాఖ్యలు చేశాడు. కోహ్లీ, రోహిత్‌శర్మ వ్యవహారశైలిలో చాలా వైరుధ్యం ఉందని చెప్పుకొచ్చాడు. ఒక యూట్యూబర్‌కు ఇచ్చిన ఇంటర్వ్యూలో ఆసక్తికర విషయాలను పంచుకున్నాడు. ‘విరాట్‌, రోహిత్‌ను చాలా ఏండ్లుగా చూస్తున్నాను. వారిద్దరి వ్యవహార శైలి చాలా భిన్నంగా ఉంటుంది.

కెరీర్‌ మొదట్లో అణుకువగా ఉన్న కోహ్లీ ప్రస్తుతం చాలా మారిపోయాడు. స్టార్‌ క్రికెటర్‌గా ఎదిగిన తర్వాత మేము మాట్లాడుకోవడం తగ్గిపోయింది. ఒకసారి కీర్తి, ప్రతిష్ఠలు వచ్చిన తర్వాత కొంతమంది ఏదో ఒక రకంగా దగ్గరయ్యేందుకు ప్రయత్నిస్తారని అనుకుంటారు. 14 ఏండ్ల వయసు నుంచే చీకూ(కోహ్లీ ముద్దుపేరు) తెలుసు. చీకూకు కోహ్లీకి తేడా బాగా ఉంది. అదే రోహిత్‌శర్మ ఎప్పుడు కనిపించినా నవ్వుతూ జోక్‌లు చేస్తూ సరదాగా ఉంటాడు. కోహ్లీ, రోహిత్‌కు ఉన్న తేడా అదే’ అని అన్నాడు.