ప్లాటినం కొత్త మెరుపులు
బంగారంలోని వన్నె లేదు. వజ్రాల్లోని ధగధగల్లేవు. వెండిలోని దర్జా కనిపించదు. అయితేనేం, యువత ప్లాటినం అంటే పడిచస్తుంది. తళుకుబెళుకులకు తలవంచని నిరాడంబరతే దాని విజయ రహస్యం. ప్లాటినం ఉమెన్.. అనిపించుకోవాలని కార్పొరేట్ మహిళల తహతహ!
అందాన్ని రెట్టించడంలో బంగారానికి నూటికి నూరు మార్కులైతే, ప్లాటినంకు నూటికి రెండొందల మార్కులు! కాబట్టే, ప్రపంచవ్యాప్తంగా అంత డిమాండ్. ఒకప్పుడు రాజవంశీయులు మాత్రమే ప్లాటినం ధరించేవారు. ప్రస్తుతం, ఎగువ మధ్య తరగతి కూడా ఇష్టంగా అలంకరించుకుంటున్నది.
ప్లాటినం వెండిని పోలి ఉంటుంది. కానీ మెరుపులో తేడా కనిపిస్తుంది. ఎన్నేండ్లయినా వన్నె తగ్గదు. మెరుగు పెట్టే పని కూడా లేదు. నిత్యం కాంతులీనుతూ ఉంటుంది.అరుగూ తరుగూ ఉండదు. ప్లాటినం ఉంగరాలు, బ్రేస్లెట్స్, గొలుసులు, గడియారం చెయిన్లు, నెక్లెస్లు,
చెవి ఆభరణాలు, ఉంగరాలు, గాజులు మార్కెట్ను ఏలేస్తున్నాయి.
స్వర్ణంతో పోలిస్తే ప్లాటినం ఖరీదైనదే. బంగారం ధరలో ఉన్నన్ని హెచ్చుతగ్గులూ ఉండవు. ఆ స్థిరత్వం కూడా ప్లాటినం గ్లామర్కు ఓ కారణమే కావచ్చు. సంప్రదాయ దుస్తులకైనా, ఫ్యాషన్వేర్ మీదైనా చక్కగా నప్పుతాయి. బంగారానికి హాల్ మార్క్లా ప్లాటినం నగలపై‘పీటీ950’ అనే నాణ్యతా
ముద్ర ఉంటుంది.
సామాజిక మాధ్యమాలు కూడా ప్లాటినం వైభవానికి ఓ కారణమే. యువతీ యువకులు అంతర్జాతీయ ట్రెండ్కు అనుగుణంగా వీటిపై మోజుపడుతున్నారు. ప్లాటినంలో నిరాడంబరత ఉంటుంది. అదే, చాలామందిని ఆకట్టుకుంటుంది. బంగారు నగలు ధరించడానికి పెద్దగా ఇష్టపడని ఉన్నతోద్యోగులు
సైతం, ‘ఆఫీస్ వేర్’గా ప్లాటినంపై ఆసక్తి చూపుతున్నారు. వజ్రాలు పొదిగిన ప్లాటినం చోకర్ నెక్లెస్లు, గొలుసులు, పెండెంట్లు, ఉంగరాలకు మార్కెట్లో మంచి గిరాకీ ఉంది.
ప్రేమికులు ఇచ్చిపుచ్చుకునే బహుమతుల్లో రోజాపూల తర్వాతి స్థానంలో ఉంది ప్లాటినం. పేర్లు, ప్రేమ చిహ్నాలు, పేరులోని తొలి అక్షరాలతో సరికొత్తగా డిజైన్ చేస్తారు. వజ్రాలు పొదిగిన హృదయాకార ప్లాటినం పెండెంట్లు ప్రేమ కానుకలుగా పాపులర్ అయ్యాయి. గతంతో పోలిస్తే
ప్లాటినం నగలపై కొనుగోలుదారులకు అవగాహన పెరిగింది. ‘ప్లాటినం గిల్డ్ ఇంటర్నేషనల్’ (పీజీఐ) చేపట్టిన ప్రచారం ఇందుకు దోహదం చేసింది.