Whatsapp Pay | వాట్సాప్‌లో ‘₹’ సింబ‌ల్‌.. ఇక ఈజీగా పేమెంట్స్‌

ప్ర‌ముఖ మెసేజింగ్ యాప్ అయిన వాట్సాప్ గ‌తేడాది వాట్సాప్ పే ( Whatsapp Pay ) సేవ‌ల‌ను ప్రారంభించిన విష‌యం తెలుసు క‌దా.

న్యూఢిల్లీ: ప్ర‌ముఖ మెసేజింగ్ యాప్ అయిన వాట్సాప్ గ‌తేడాది వాట్సాప్ పే ( Whatsapp Pay ) సేవ‌ల‌ను ప్రారంభించిన విష‌యం తెలుసు క‌దా. అయితే తాజాగా ఈ సేవ‌ల‌ను యూజ‌ర్ల‌కు మ‌రింత చేరువ చేయ‌డానికి, సులువుగా పేమెంట్స్ జ‌రిగిపోవ‌డానికి వీలుగా ఇండియ‌న్ రూపీ(₹) సింబ‌ల్‌ను వాట్సాప్ చాట్ బాక్స్‌లో యాడ్ చేసింది.

ప్ర‌స్తుతం పేమెంట్స్ చేయ‌డానికి రెండు ద‌శ‌లు దాటాల్సి ఉండ‌గా.. ఈ తాజా అప్‌డేట్‌తో ఆ ప‌ని మ‌రింత సులువుగా జ‌రిగిపోనుంది. వాట్సాప్‌లో పేమెంట్స్‌ను ఈజీగా మార్చ‌డంలో భాగంగా ఈ కీల‌క నిర్ణ‌యం తీసుకుంది. అంతేకాదు ఇక నుంచి పేమెంట్స్ కోసం కెమెరా యాప్ అన్ని మేజ‌ర్ క్యూఆర్ కోడ్స్‌ను గుర్తించ‌నుంది. యూజ‌ర్లు డ‌బ్బు బ‌దిలీ చేయ‌డానికి, ఆఫ్‌లైన్ పేమెంట్స్ చేయ‌డానికి ఇది ఉప‌యోగ‌ప‌డ‌నుంది.

ఈ అప్‌డేట్స్‌తో ఇండియాలో వాట్సాప్ పే సేవ‌ల వినియోగం పెరుగుతుంద‌ని ఆ సంస్థ భావిస్తోంది. వాట్సాప్ చాట్‌లో ఉంటూనే పేమెంట్లు చేసే వీలు ఇక నుంచి యూజ‌ర్ల‌కు క‌ల‌గ‌నుంది. ఇండియాలో గూగుల్‌పే, ఫోన్‌పెలాంటి డిజిట‌ల్ పేమెంట్స్ స‌ర్వీసులు 35 శాతం, 45 శాతం యూపీఐ ట్రాన్సాక్ష‌న్ల వాటా క‌లిగి ఉండ‌గా.. వాట్సాప్ పే చాలా త‌క్కువ వాటాకే ప‌రిమిత‌మైంది.