Whatsapp | సోషల్ మీడియా దిగ్గజం వాట్సాప్ తన యూజర్ల కోసం పాత ఫీచర్ తిరిగి అందుబాటులోకి తెస్తున్నది. ఇందులో వచ్చే మెసేజ్ల్లో ఒకటి కంటే ఎక్కువ సందేశాలను ఒకేసారి ఎంపిక చేసి ఇతరులకు పంపడానికి గానీ, పూర్తిగా తొలగించడానికి గానీ మల్టీపుల్ చాట్ సెలక్షన్ ఫీచర్ వినియోగించేవారు. గతంలో డెస్క్టాప్ యాప్ నుంచి వాట్సాప్ ఈ ఫీచర్ తొలగించింది. యూజర్ల నుంచి అభ్యర్థనలు రావడంతో తిరిగి ఈ ఫీచర్ అందుబాటులోకి తేనున్నది.
ప్రస్తుతం మొబైల్ యాప్, వెబ్ వర్షన్ యూజర్లు మాత్రమే ఈ మల్టీపుల్ చాట్ సెలక్షన్ ఫీచర్ వినియోగిస్తున్నారు. ఇది ప్రస్తుతం ప్రయోగాత్మక దశలో ఉందని సమాచారం. త్వరలో సాధారణ యూజర్లకు సెలెక్ట్ చాట్స్ అందుబాటులోకి రానున్నది. అదే జరిగితే వాట్సాప్ యూజర్లు ఒకేసారి ఒకటికంటే ఎక్కువ మెసేజ్లు ఎంపిక చేసి ఫార్వర్డ్ / డిలిట్/ మ్యూట్ చేయొచ్చు.
ఇంకా వాట్సాప్ యూజర్లు తమకు నచ్చిన టెక్ట్స్, మీడియా ఫైల్స్, వెబ్ లింక్లు ఇతరులు చూసేలా తమ స్టేటస్లో పెడుతుంటారు. అలా పెట్టే స్టేటస్లపై అభ్యంతరాలు ఉన్న యూజర్లు ఇక నుంచి వాట్సాప్కు ఫిర్యాదు చేయొచ్చు. ఇందుకోసం స్టేటస్ అప్డేట్ అనే ఫీచర్ను వాట్సాప్ పరిచయం చేయబోతున్నది. ప్రస్తుతం టెస్టింగ్ దశలో ఉన్న ఈ ఫీచర్ త్వరలో అందరికీ అందుబాటులోకి రానున్నదని తెలుస్తున్నది.