Targeted Ads | అదేంటో మరి! చూసినా తప్పేనా అంటే.. మళ్లీ మళ్లీ చూసేలా చేస్తాయి.. నచ్చింది కొనాలా అంటే.. కొనేంత నచ్చేటట్టు చేస్తాయి ఒకసారి చూశాం అంటే సరిపోదు..కొనకుండా ఉంటే అస్సలు సరిపోదు.. బుట్టలో పడగొడుతుంది.. జేబుకు చిల్లు పెడుతుంది.. ప్రకటనల వల.. పడితే విలవిల. ఇదీ అంతర్జాల అంగడి మాయ!!
సురేశ్ తన ల్యాప్టాప్లో ఓసారి పోర్న్ వెబ్సైట్ ఓపెన్ చేశాడు. అంతే.. అప్పటి నుంచి బ్రౌజర్ ఓపెన్ చేస్తే చాలు సెక్స్ టాయ్స్/పోర్న్ సంబంధ యాడ్స్ కనిపిస్తున్నాయి. చిరాకు తెప్పించడమే కాదు పొరపాటున ఎవరైనా ఓపెన్ చేస్తే ఏంటి పరిస్థితి? అన్న దిగులు పట్టుకొన్నది. ఆ ల్యాప్టాప్ను వేరేవాళ్లకు ఇవ్వడమే మానేశాడు.
కొత్తగా వచ్చిన ఓ ఫోన్లో ఫీచర్స్ బాగున్నాయని చెప్పడంతో రాకేశ్.. తన మొబైల్ బ్రౌజర్లో ఆ ఫోన్ వివరాల కోసం సెర్చ్ చేశాడు. అప్పటి నుంచి ఫేస్బుక్, ట్విట్టర్తోపాటు ఏ వెబ్సైట్ ఓపెన్ చేసినా ఆ ఫోన్కు సంబంధించిన ప్రకటనే కనిపించింది. మొదట్లో ఫీచర్స్ చూసి వదిలేసిన అతడు.. పదే పదే ఆ యాడ్ కనిపించి ఊరించడంతో ఆ ఫోన్ను కొనేశాడు. అనవసరంగా రూ.40వేల ఖర్చు.
పదే పదే అవే యాడ్స్.. స్మార్ట్ ఫోన్ ఉన్న ప్రతి ఒక్కరి అనుభవం ఇది. గుండు పిన్ను దగ్గరి నుంచి కార్ల వరకు మనం ఏ వస్తువు గురించి సెర్చ్ చేసినా, అమెజాన్, ఫ్లిప్కార్ట్ వంటి యాప్లలో చూసినా మరు క్షణం నుంచి అవే ప్రకటనలు ప్రత్యక్షం అవుతాయి. ఫేస్బుక్, ట్విట్టర్, యూట్యూబ్ ఇతర యాప్స్తోపాటు ఏ వెబ్సైట్ చూసినా ఆ ప్రకటనలే కనిపిస్తాయి. ఒకటికి రెండు మూడు సార్లు కనిపిస్తూ ఆఫర్లతో ఆకర్షిస్తూ ఆ వస్తువును కొనేలా ప్రేరేపిస్తాయి. చివరికి దాని అవసరం లేకున్నా, కొనేస్తున్నాం. అంటే ఒక సాఫ్ట్వేర్ మన మనసుపై వల విసరి మన ఆలోచనలను ప్రభావితం చేస్తూ మన జేబుకు చిల్లు పెడుతున్నది.
కుకీ అనేది చిన్న డాటా స్టోరేజ్ ఫైల్. మనం ఏదైనా బ్రౌజర్, వెబ్సైట్, యాప్ను ఓపెన్ చేసి, ఏదైనా యాక్టివిటీ చేసినప్పుడు ఆ సమాచారం భవిష్యత్తులో ఉపయోగపడేలా సంక్షిప్తంగా ఒక ఫైల్ రూపంలో సేవ్ అవుతుంది. దీనినే కుకీ అంటాం. ఒక వ్యక్తి దేనికోసం వెతుకుతున్నాడు? ఏ అంశంపై ఎక్కువ ఆసక్తి చూపిస్తున్నాడు? వంటివి గమనించేవి ట్రాకింగ్ కుకీస్. దాదాపు అన్ని బ్రౌజర్లు, యాప్లలో ట్రాకింగ్ కుకీస్ ఉంటాయి. వీటిని రెండు విధాలుగా వినియోగిస్తుంటాయి. ఓవైపు.. ఆ యాప్/వెబ్సైట్ను ఎంతమంది ఓపెన్ చేశారు. ఎన్ని వ్యూస్ లేదా క్లిక్స్ వచ్చాయి. ఎంత సమయం చూశారు. వంటి వివరాలను సేకరిస్తాయి. మరోవైపు.. మనం మొబైల్/ల్యాప్టాప్/కంప్యూటర్లో ఏ వెబ్సైట్లను ఓపెన్ చేస్తున్నాం? ఏ అంశాల గురించి సెర్చ్ చేస్తున్నాం? ఏ ఉత్పత్తుల గురించి తెలుసుకొంటున్నాం? వేటిపై మనం ఆసక్తి చూపుతున్నాం? ఎంతసేపు వెబ్సైట్ను చూస్తున్నాం? వంటి సమాచారాన్ని నమోదు చేస్తాయి. గూగుల్ యాడ్స్ ఏజెన్సీ ఈ వివరాలను సేకరిస్తుంది. ఈ సమాచారం మొత్తాన్ని విశ్లేషిస్తుంది. యూజర్ వెతికిన వస్తువు తమ యాడ్ డాటాబేస్లో ఉంటే వెంటనే.. ఆ వస్తువుకు సంబంధించిన ప్రకటనను బ్రౌజర్, వెబ్సైట్లో కనిపించేలా చేస్తుంది. ఇదంతా మిల్లీ సెకండ్లలో ఆటోమెటిక్గా జరిగిపోతుంది.
పత్రికల్లో, టీవీల్లో/వెబ్సైట్లలో ఒక వస్తువుకు సంబంధించిన యాడ్ ఇస్తే చూసేవారికి, చదివే ప్రతి ఒక్కరికీ ఆ యాడ్ కనిపిస్తుంది. పత్రికల్లో రాష్ట్రస్థాయి, జిల్లాస్థాయి, నియోజకవర్గ స్థాయిలో ప్రకటనలు ఇచ్చే అవకాశం ఉన్నది. కానీ.. డిజిటల్ ప్రపంచంలో ప్రకటనల స్వరూపమే మారిపోయింది. ఇప్పుడంతా టార్గెటెడ్ యాడ్స్. అంటే ఎవరిని లక్ష్యంగా చేసుకోవాలో ముందే నిర్దేశించుకొని ప్రకటనలు ఇవ్వడం అన్నమాట. యాడ్ ఇచ్చే సమయంలోనే ఏ దేశవాసులకు, ఏ ప్రాంతవాసులకు, ఏ భాష వారికి, ఏ వయసులో ఉన్నవారికి ఆ ప్రకటన కనిపించాలో ముందే నిర్ణయించవచ్చు. అంతేకాదు.. స్త్రీ, పురుషుల్లో ఎవరికి కనిపించాలో కూడా నిర్దేశించవచ్చు. గూగుల్ యాడ్స్లో ఈ సౌకర్యాలన్నీ ఉంటాయి. మనం మొబైల్లో, వివిధ వెబ్సైట్లలో లాగిన్ అయ్యే సమయంలో ఇచ్చిన వివరాల ఆధారంగా, మనం ఉన్న లొకేషన్ ఆధారంగా గూగుల్ విశ్లేషించి మనకు ఏ ప్రకటనలు కనిపించాలో నిర్దేశిస్తుంది. మనకు బ్రెయిన్వాష్ చేస్తుంది. మొదట్లో ఆ వస్తువు కొనేందుకు ఆసక్తి చూపకపోయినా ఒకటికి రెండు సార్లు కనిపించడం, పైగా పెద్ద పెద్ద అక్షరాలతో ఆఫర్లు కనిపించడం వల్ల చివరికి దాన్ని కొనేలా చేస్తారు.
కుకీస్, ట్రాకింగ్ కుకీస్ అన్నీ చెడ్డవి కాదు. కొన్ని మనకు ఇంటర్నెట్లో వెతుకులాటను సులభం చేస్తాయి. బ్రౌజింగ్ హిస్టరీ, లాగిన్ వివరాలు సేవ్ చేయడం ద్వారా ప్రతిసారి టైప్ చేయాల్సిన అవసరం తప్పుతుంది. మరికొన్ని మాత్రం డివైజ్లోని వ్యక్తిగత వివరాలు, సున్నిత సమాచారం, లొకేషన్ను సేకరిస్తాయి. ఇలాంటివాటి నుంచి దూరంగా ఉండాలి.
దేశంలో డిజిటల్ యాడ్స్లో ప్రస్తుతం గూగుల్, ఫేస్బుక్ అగ్రస్థానంలో ఉన్నాయి. మీడియా ఆర్జించే ప్రకటనల ఆదాయంలో ఫేస్బుక్ ఇండియా, గూగుల్ ఇండియా 80 శాతం చేజిక్కించుకొంటున్నట్టు ఇటీవలే ఓ జాతీయ పత్రిక స్పష్టం చేసింది. స్టాక్ ఎక్సేంజీల్లో లిస్టయిన టాప్ -10 టెలివిజన్ /డిజిటల్ కంపెనీలు 2020-21లో ప్రకటనల ద్వారా రూ.8,396 కోట్ల ఆదాయం సంపాదించగా, ఫేస్బుక్ , గూగుల్ ఏకంగా రూ.23,213 కోట్లు ఆర్జించాయి. అంటే దాదాపు మూడు రెట్లు ఎక్కువ. దీనికి ఆయా కంపెనీల విస్తృతితోపాటు టార్గెటెడ్ యాడ్స్ కూడా ఒక కారణమని నిపుణులు చెప్తున్నారు.
బ్రౌజర్లో ఏదైనా వస్తువు గురించి ఆసక్తిగా చూసినప్పుడు మన మెదడులో దానిపట్ల ఒక సానుకూల భావన ఏర్పడుతుంది. ఆ తర్వాత మనం ఆ వస్తువుకు సంబంధించిన ప్రకటనలు చూసినప్పుడు అది ఆసక్తిగా మారుతుంది. ఏ వెబ్సైట్ ఓపెన్ చేసినా, యాప్లో చూసినా ఆ వస్తువుకు సంబంధించిన ప్రకటనలు పదే పదే కనిపిస్తుండటంతో ఆసక్తి కాస్తా బలీయమైన కోరికగా మారి కొనుగోలు చేసేలా పురిగొల్పుతుంది. అంటే టార్గెటెడ్ యాడ్స్ మన ఆలోచనను హైజాక్ చేస్తున్నాయన్నమాట. వెబ్సైట్లు, యాప్లకు ప్రకటనలే ఆయువుపట్టు. యాడ్స్లేని వెబ్సైట్లను చూడటం సాధ్యం కాదు. కాబట్టి మనకు కనిపించే ప్రకటనలకు ఆకర్షితులు కాకుండా ఏ వస్తువు అవసరమో గుర్తించి కొనుగోలు చేయాలి. – నల్లమోతు శ్రీధర్, ఐటీ నిపుణుడు
టార్గెటెడ్ యాడ్స్ నుంచి, మోసపూరిత ట్రాకింగ్ కుకీస్ నుంచి తప్పించుకోవడం మన చేతుల్లోనే ఉన్నదని నిపుణులు చెప్తున్నారు.
లోకల్ టు గ్లోబల్ వార్తల కోసం.. నమస్తే తెలంగాణ ఫేస్బుక్, ట్విటర్ పేజీలను ఫాలో అవ్వండి
Safe Online Transactions | ఈ టిప్స్ పాటిస్తే మీ ఆన్లైన్ ట్రాన్సాక్షన్స్ సేఫ్.. లేదంటే గోవిందా..?
Fake PAN Card | నకిలీ పాన్కార్డును గుర్తించడం ఎలా? స్మార్ట్ఫోన్ ఉంటే చాలు.. ఇదిగో స్టెప్స్
Facebook : ఫేస్బుక్ అకౌంట్ను పర్మినెంట్గా డిలీట్ చేయడం ఎలా? ఇదిగో సింపుల్ స్టెప్స్