చౌరస్తా

ఆర్థిక గాలాలకు చిక్కి
ఆగమౌతున్న ఆధునికుడు
అసలు మూలాలు మరిచి
ఆదిమానవుడై చరిస్తూ…

ఆత్మీయతా వాకిళ్లలో
ఆరని చిచ్చులు పెడుతూ
ఆప్యాయతా పుప్పొడులపై
పగల సెగల బుసలు కొడుతూ…

పోలికల పోటీలలో
పసిడి గోడలే శాశ్వతమని
బంధాల చలువ పందిరి పీకేసి
నవ్వుల తీగలు తెంపేస్తూ…

ఈర్ష్యా వీధులే బలమంటూ
అలజడి రథంపై ఊరేగుతూ
స్వార్థపు పాతాళం చీకట్లలో
గల్లంతై, లోహపు మరమనిషై …

కుళ్ళు కళ్ళతో కపట నటనతో
మమతల మేడలు చూర్ణించి
బంధం తెగిన గాలి పటంలా
పల్టీలు కొట్టే లోక సంచారి…

అసూయ అడ్డుగోడలు దాటి
అహం పొరలు చీల్చి
మానవ చౌరస్తాకి చేరువై
త్యాగ చరిత్రను తడిమేదెన్నడో..

డాక్టర్‌ మండల స్వామి 9177607603