మేఘం మీద కాలం

కాలం మింగింది మనల్ని ఏ అరణ్యాల మధ్య ఖాళీలో వదిలింది

కాలం మింగింది మనల్ని
ఏ అరణ్యాల మధ్య ఖాళీలో వదిలింది
గుర్తుగా ఒక ఈకను ఉంచి వెళ్లింది
గతం తాలూకు లెక్కలన్నీ కట్టాలి ఇప్పుడు
గడిపిన భారాన్ని తేల్చాలిఇప్పుడు
జ్ఞానసంద్రంలో నీటిమట్టం పెరిగింది
అజ్ఞానపు పలకలు కరిగి
కుప్పలు తెప్పలు పడుతున్నాయి
పక్షుల రెక్కల్లా వలస వచ్చిన మేఘం ఒకటి
నెత్తిన ఆవరించి చేరింది
విద్యుత్తు తరంగాలు నరాలకు తగిన
ఘాతాన్ని ఇస్తాయా
మార్పు ధ్వనులకు ఉరుములను చేరవేస్తూ..
ఇది ఒక రసాయన చర్య
చెత్త నుంచి చెరుకు గడలను తీసే ప్రక్రియ
బంగారుతీగలు అల్లుతూ
ముక్కుతో ఒక ఉష్ణపక్షి తీసుకెళ్తుంది
మోసుకుంటూ సిగ్నల్స్‌ని..
కాలం మళ్లీ విముక్తున్ని చేసే లోపు
ఎప్పుడు వస్తుంది అసలు?
వస్తుందా వెళ్లిందా అయిపోయిందా..
ఇక మిగలకుండా..!!

రఘు వగ్గు