మిత్రతరువు

ఒకానొక కాలపు రుతువుచెట్టు నీడలో చిటికెన వేలుకు అంటిన తడి స్నేహం తను ఆటలో కరిగిపోయిన క్షణాల రుచి మనసుకు అద్దిన మమకారుడు నా బాల్యం సంచిలో ఒదిగిన రెండో పావురం పాటల పతంగి.

ఒకానొక కాలపు రుతువుచెట్టు నీడలో
చిటికెన వేలుకు అంటిన తడి స్నేహం తను
ఆటలో కరిగిపోయిన క్షణాల రుచి
మనసుకు అద్దిన మమకారుడు
నా బాల్యం సంచిలో ఒదిగిన రెండో పావురం
పాటల పతంగి.. ఆటల ఝరీ

నీడలు జరిగినంత సులభంగా
వాడల ప్రేమత్వం జారిపోదు
మాతంగి వాగొడ్డు వానకాలంలో
లంగరేసిన చిట్టిపడవలో
ఒదిగిన జ్ఞాపకాల మాలలు
కలిసి తిరిగిన ఆ రోజులు
సైకిల్‌ రెండు పయ్యల ముద్రల సాక్షిగా
ఇంకా అక్కడే రాయిచెట్టు
ఆకుల మీద పదిలంగానే ఉన్నవి

పొలం గట్టు మీద గడ్డి చిలుకల పలకరింపుల
తన్మయత్వంలో మనిద్దరి బాల్యం
రెండు ఊహల సమ్మేళనమయ్యేది
గుడిలో వేసిన నాటకాల్లో గొంతెత్తి తీసిన రాగాలు
జీవితపు నడకలయ్యేవి

నాదొక కన్ను నీదొక కన్ను రెండూ జత కలిసి
చూపు తుణీరాల జాతరయ్యేది
రంగుల తెరల కథలు, నవలానాయకుల ‘షాడో’ల
ప్రతిధ్వనులు అన్నీ పరిచితం చేసిన
పెద్దబాలశిక్ష తను

ఇప్పుడు జిట్ట్రెగి శోభలో,
మోదుకువనంలో సంచరించే ఆరుద్ర తీరు
ఒక మెట్టు పైన ప్రజల వైపు

-వేముగంటి మురళి
96765 98465