బొగొటా: కొలంబియాలో ఓ ఇల్లు స్థానికులను, అక్కడికి వెళ్తున్న పర్యాటకులను తెగ ఆకట్టుకుంటోంది. ఈ ఇంటిని చూసిన వారంతా ‘‘వావ్.. సూపర్’’ అంటూ ఆ ఇంటి యజమానిని ప్రశంసిస్తున్నారు. ఈ ఇంటికి సంబంధించిన ఫొటోలు కూడా సోషల్ మీడియాలో తెగ ట్రెండింగ్ అవుతున్నాయి.
అసలు అంతలా ఆకట్టుకోవడానికి ఈ ఇల్లు ప్రత్యేకతలు ఏంటంటే.. ఈ ఇంటి యజమాని తన ఇంటిని తలకిందులుగా నిర్మించుకున్నాడు. వినడానికి కొంచెం వెరైటీగా ఉన్నప్పటికీ.. ఇది నిజం. అందరిలా కాకుండా తాను వినూత్నంగా ఏదో ఒకటి చేయాలనుకునే ఫ్రిట్జ్ స్కాల్ అనే వ్యక్తి ఈ తలకిందుల ఇంటిని నిర్మించాడు.
ఇలాంటి ఇల్లు ఒకటి కట్టబోతున్నానని తాను ఎంతో మందికి చెప్పగా.. వారంతా తనను పిచ్చివాడిగా చూశారని ఫ్రిట్జ్ చెబుతున్నాడు. ఇప్పుడు అందరూ తన ఇంటి గురించే చర్చించుకోవడం తనకు ఎంతో ఆనందంగా ఉందని అన్నాడు. 2015లో తాను తన మనవళ్లతో కలిసి తన స్వస్థలమైన ఆస్ట్రియాకు వెళ్లానని, అక్కడ ఇటువంటి ఇంటినే తాను చూశానని ఫ్రిట్జ్ చెబుతున్నాడు.
ఆ ఇంటిని చూసిన తరువాతే తాను కూడా తలకిందులుగా ఒక ఇంటిని నిర్మించాలని అనుకున్నట్టు తెలిపాడు. కాగా.. ఈ ఇంటి లోపల ఎలా ఉంటుందో అని ఆసక్తిగా చూసేవారి సంఖ్య రోజురోజుకూ పెరిగిపోతోంది. సీలింగ్పై నడుస్తూ కింద ఉన్న ఫర్నీచర్ను చూడటం వింత అనుభూతని అందరూ అంటున్నారు.