Madhya Pradesh: మ‌ధ్య‌ప్ర‌దేశ్‌లో దీపావ‌ళి విషాదం.. 2 ప్ర‌మాదాల్లో 12 మంది మృతి.. రెండు కుటుంబాలు బుగ్గి

Madhya Pradesh: మ‌ధ్య‌ప్ర‌దేశ్‌లో దీపావ‌ళి రాత్రి పెను విషాదం చోటుచేసుకున్న‌ది. రెండు వేర్వేరు అగ్నిప్ర‌మాద ఘ‌ట‌న‌లు జ‌రిగాయి. ఆ ప్ర‌మాదాల్లో 12 మంది మృతిచెందారు. రెండు కుటుంబాలు పూర్తిగా అగ్నికి ఆహుత‌య్యాయి.

భోపాల్‌: మ‌ధ్య‌ప్ర‌దేశ్‌లో దీపావ‌ళి రాత్రి పెను విషాదం చోటుచేసుకున్న‌ది. రెండు వేర్వేరు అగ్నిప్ర‌మాద ఘ‌ట‌న‌లు జ‌రిగాయి. ఆ ప్ర‌మాదాల్లో 12 మంది మృతిచెందారు. రెండు కుటుంబాలు పూర్తిగా అగ్నికి ఆహుత‌య్యాయి. క‌ట్నీ, సియోని జిల్లాల్లో ఆదివారం రాత్రి ఈ ప్ర‌మాదాలు జ‌రిగాయి. క‌ట్ని జిల్లాలోని బ‌ర్హి ప‌ట్ట‌ణంలో ఓ అగ‌ర్వాల్ కుటుంబానికి చెందిన ఆరుగురు అగ్నిప్ర‌మాదానికి బ‌ల‌య్యారు. మూడు అంత‌స్తుల భ‌వ‌నంలో కింద క్రాక‌ర్ షాపు ఉన్న‌ది. అయితే పైఅంత‌స్తులో ఓ కుటుంబం నివ‌సిస్తోంది. రాత్రి ప్ర‌మాదం జ‌ర‌గ‌డంతో మంట‌లు పైకి వ్యాపించాయి. నిద్రిస్తున్న స‌మ‌యంలో ప్ర‌మాదం జ‌ర‌గ‌డంతో ఆరుగురు కాలి బూడిద‌య్యారు. మృతుల‌ను పూర‌న్ అగ‌ర్వాల్‌, చంద్ర‌క‌ళ‌, పూన‌మ్‌, ఆర్యా, అన్వీగా గుర్తించారు. ఇద్ద‌రు ప్రాణాల‌తో బ‌య‌ట‌ప‌డ్డారు. తెల్ల‌వారుజామున మృత‌దేహాల‌ను వెలికితీశారు. షార్ట్ స‌ర్క్యూట్ లేదా దీపాల వ‌ల్ల ప్ర‌మాదం జ‌రిగి ఉంటుంద‌ని భావిస్తున్నారు.

ఇక సియోనీ జిల్లాలోని చాపారా ప‌ట్ట‌ణంలో మ‌రో ప్ర‌మాదం జ‌రిగింది. ఓ న‌గ‌ల వ్యాపారి ఇంట్లో ప్ర‌మాదం జ‌ర‌గ‌డంతో ఆరుగురు మృతిచెందారు. మృతుల‌ను కుంద‌న్ లాల్ సోనీ, రాజ్‌కుమారి సోనీ, రీతూ సోనీ, స్మృతి సోనీ, సూర్య సోనీ, ఆదిత్య సోనీగా గుర్తించారు. మ‌రో న‌లుగురు ప్ర‌మాదం నుంచి త‌ప్పించుకున్నారు. అగ్నిప్ర‌మాద స‌మ‌యంలో ఇంట్లో ప‌ది మంది ఉన్నారు. గాఢ నిద్ర‌లో ఉన‌ప్పుడు ప్ర‌మాదం జ‌రిగింద‌ని పోలీసులు చెబుతున్నారు. రెండు ఘ‌ట‌న‌లు మ‌ధ్య‌ప్ర‌దేశ్‌లో తీవ్ర విషాదాన్ని నింపాయి.