సుమోటోగా స్వీకరించిన ఎస్‌హెచ్చార్సీ

ఈ నెల 21న ఆదిలాబాద్‌ రిమ్స్‌(రాజీవ్‌గాంధీ ఇన్‌స్టిట్యూట్‌ ఆఫ్‌ మెడికల్‌ సైన్సెస్‌)లో జరిగిన అగ్నిప్రమాదంలో నవజాత శిశువుల మృతిపై రాష్ట్ర మానవ హక్కుల కమిషన్‌(ఎస్‌హెచ్చార్సీ) స్పందించింది. ఈ ఘటనపై ‘నమస్తే తెలంగాణ’ ప్రచురించిన కథనంపై స్పందించిన కమిషన్‌, కేసును సుమోటోగా స్వీకరించింది.

• రిమ్స్‌పై వైద్యారోగ్యశాఖ నుంచి నివేదిక కోరిన కమిషన్‌

సుల్తాన్‌బజార్‌, సెప్టెంబర్‌ 23 : ఈ నెల 21న ఆదిలాబాద్‌ రిమ్స్‌(రాజీవ్‌గాంధీ ఇన్‌స్టిట్యూట్‌ ఆఫ్‌ మెడికల్‌ సైన్సెస్‌)లో జరిగిన అగ్నిప్రమాదంలో నవజాత శిశువుల మృతిపై రాష్ట్ర మానవ హక్కుల కమిషన్‌(ఎస్‌హెచ్చార్సీ) స్పందించింది. ఈ ఘటనపై ‘నమస్తే తెలంగాణ’ ప్రచురించిన కథనంపై స్పందించిన కమిషన్‌, కేసును సుమోటోగా స్వీకరించింది.

ఘటనకు దారితీసిన వాస్తవ పరిస్థితులు, శిశువుల మృతికి కారణాలు, ఎస్‌ఎన్‌సీయూలో భద్రత, నిర్వహణ, ప్రమాద సమయంలో చేపట్టిన రక్షణ చర్యలు, ఘటనపై విచారణకు సంబంధించిన అంశాలను నిర్ధారించుకోవడం అవసరమని భావించిన కమిషన్‌, ఘటనకు సంబంధించిన సమగ్ర నివేదికను సమర్పించాలని రాష్ట్ర వైద్యారోగ్య, కుటుంబ సంక్షేమశాఖ ముఖ్యకార్యదర్శిని ఆదేశించింది.

అగ్నిప్రమాదానికి దారితీసిన పరిస్థితులు, ఎస్‌ఎన్‌సీయూలో భద్రత, నిర్వహణ, శిశువుల రక్షణ, చికిత్సకు తీసుకున్న చర్యలు, ఘటనపై నిర్వహించిన విచారణలో వెలువడిన అంశాలను నివేదికలో పొందుపర్చాలని కమిషన్‌ సూచించింది. ఈ వ్యవహారంపై తదుపరి విచారణను అక్టోబర్‌ 27కు వాయిదా వేసింది.