సముద్ర సందేశం

బయట జోరు గాలులు లోన అలల హోరులు నేనున్నాను అని చాటడానికో తీరాన్ని దాటడానికో

బయట జోరు గాలులు
లోన అలల హోరులు
నేనున్నాను అని చాటడానికో
తీరాన్ని దాటడానికో!

అలుపు లేకుండా అలల్లాగా
మళ్ళీ మళ్ళీ ప్రయత్నిస్తున్న మత్స్యకారులు
ఒళ్లంతా కళ్ళు చేసుకున్న వల
చేపలను పట్టడానికి ఆశల దోసిలిలా!

పిల్లలూ పెద్దలూ అలుపెరగకుండా
నీళ్ళల్లో మునుగుతూ తేలుతూ
బ్రతుకునిచ్చే మత్స్య దర్శనం!
ఆశతో జీవించుమని గొప్ప సందేశం!

ఆటుపోట్లు కష్టసుఖాలు
అలలు అవిరామ ప్రయత్నాలు
తీరం సేద తీరే కేంద్రం
నీటి నురుగలు గెలుపు నవ్వులు!

విశాలం హృదయమంతా
లోతు మనిషి మనసంతా
సూర్య చంద్రులు తనలోనే
పుట్టినట్లు ఉట్టిపడే నమ్మకం!

నీటి తరంగాల గలగలలు
అందరికీ ఆత్మీయ స్వాగతంలా
బోధిచెట్టు కింద జ్ఞానోదయం
సముద్రపు ఒడ్డున జీవితోదయం!!

జి. జగ్గయ్య
98495 25802