ఉప్పొంగిన అభిమానం.. ఆదిలాబాద్‌ వైపు ఎన్‌హెచ్‌ 44 పొడవునా కేటీఆర్‌కు స్వాగతం

ఆదిలాబాద్‌లో ఆదివారం నిర్వహించిన రైతుగర్జన సభకు బయల్దేరిన బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌కు జా తీయ రహదారి 44పై అడుగడుగునా ఘన స్వాగతం లభించింది.

• హైదరాబాద్‌ నుంచి ఆదిలాబాద్‌ వరకు గులాబీ శ్రేణుల జోరు

నిజామాబాద్‌, నవంబర్‌ 1 (నమస్తే తెలంగాణ ప్రతినిధి) : ఆదిలాబాద్‌లో ఆదివారం నిర్వహించిన రైతుగర్జన సభకు బయల్దేరిన బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌కు జా తీయ రహదారి 44పై అడుగడుగునా ఘన స్వాగతం లభించింది. కేటీఆర్‌ కాన్వాయ్‌ కనిపించగానే కార్యకర్తలు ఉత్సాహంతో పూలమాలలు, పుష్పగుచ్ఛాలతో ఆహ్వానిస్తూ తమ అభిమాన నేతకు ఘన స్వాగతం పలికారు. జాతీయ రహదారి వెంటే పలుచోట్ల పార్టీ శ్రేణులు కేటీఆర్‌ రాక కోసం ఎదురు చూశారు. కాన్వాయ్‌ చేరుకోగానే జై బీఆర్‌ఎస్‌, జై కేసీఆర్‌, జై కేటీఆర్‌ అంటూ నినాదాలతో మార్మోగించగా.. కార్యకర్తలకు అభివాదం చేస్తూ కేటీఆర్‌ ముందుకు సాగారు.

దేశంలోనే అతిపెద్ద జాతీయ రహదారిగా గుర్తింపు పొందిన ఎన్‌హెచ్‌ 44పై కేటీఆర్‌ ప్రయాణం పార్టీ శ్రేణుల సందడితో సాగింది. నిజామాబాద్‌ జిల్లా ఆర్మూర్‌లో బీఆర్‌ఎస్‌ జిల్లా అధ్యక్షుడు, మాజీ ఎమ్మెల్యే ఆశన్నగారి జీవన్‌రెడ్డి నివాసానికి పార్టీ వర్కింగ్‌ ప్రెసిడెంట్‌ కేటీఆర్‌ చేరుకోగా.. మామిడిపల్లి చౌరస్తా వద్ద భారీ క్రేన్‌ను ఉపయోగించి గజమాలతో స్వాగతం పలికారు. శ్రేణులకు అభివాదం చేస్తూ కేటీఆర్‌ ముందుకు కదిలి ప్రతి ఒక్కరినీ ఉత్తేజపరిచారు.