భార‌త్‌కు వినోద్ ఖోస్లా 10 మిలియ‌న్ డాల‌ర్ల సాయం

భారత సంతతికి చెందిన వ్యాపారవేత్త వినోద్ ఖోస్లా భారత్‌కు 10 మిలియన్ డాల‌ర్ల సాయం ప్ర‌క‌టించారు

May 3, 2021 / 09:47 PM IST

భార‌త్‌కు వినోద్ ఖోస్లా 10 మిలియ‌న్ డాల‌ర్ల సాయం

హ్యూస్టన్ : భారత సంతతికి చెందిన వ్యాపారవేత్త వినోద్ ఖోస్లా భారత్‌కు 10 మిలియన్ డాల‌ర్ల సాయం ప్ర‌క‌టించారు. క‌రోనా సెకండ్ వేవ్‌తో పోరాడుతున్న భారతదేశంలోని ద‌వాఖాన‌ల‌కు ఆక్సిజన్ సరఫరా కోసం భారతీయ సంతతికి చెందిన వ్యాపారవేత్త వినోద్ ఖోస్లా 10 మిలియన్ డాలర్లు (భార‌త క‌రెన్సీలో దాదాపు రూ. 73.88 కోట్లు) అందిస్తున్నట్లు ప్రకటించారు.

క‌రోనా వ్యాప్తి పెరుగుతున్న ఈ సమయంలో ప్రజల ప్రాణాలను రక్షించాల్సిన అవసరం ఉన్న‌ద‌ని వినోద్ ఖోస్లా అన్నారు. మ‌రింత ఆలస్యం చేస్తే ఇంకా ఎక్కువ మంది మరణాలకు దారితీయవచ్చు అని ఆయ‌న పేర్కొన్నారు. ‘గివ్ ఇండియాకు ఇది చాలా ఎక్కువ కాదు’ అని వినోద్ ఖోస్లా ట్వీట్ చేశారు. భారతదేశంలోని ప్రభుత్వేతర సంస్థలు, ద‌వాఖాన‌ల‌ నుంచి నిత్యం 20,000 ఆక్సిజన్ కాన్స‌న్‌ట్రేట‌ర్లు, 15,000 ఆక్సిజ‌న్‌ సిలిండర్లు, 500 ఐసీయూ పడకలు, 100 వెంటిలేటర్లు, 10,000 పడకల కోసం ప్ర‌జ‌ల నుంచి అభ్యర్థనలు అందుతున్నాయి. గ‌తంలో ఇచ్చిన వాగ్దానం ప్రకారం త‌మ‌ కుటుంబం 10 మిలియన్ డాలర్లు భార‌త్‌కు సాయంగా అందిస్తున్న‌దని ఆయన చెప్పారు. ఈ స‌మ‌యంలో ఆప‌న్నుల‌ను ఆదుకునేందుకు ఇతర వ్యక్తులు కూడా ముందుకు వస్తారని ఆశిస్తున్న‌ట్లు ఆయ‌న తెలిపారు.