పంచాయ‌తీ విజ‌యం చూడ‌క‌ముందే ముగ్గుర్ని కాటేసిన క‌రోనా

ఉత్త‌ర‌ప్ర‌దేశ్‌లో ఇటీవ‌లి పంచాయ‌తీ ఎన్నిక‌ల్లో విజ‌యం సాధించిన ముగ్గురు అభ్య‌ర్థులు త‌మ విజ‌యాన్ని క‌ళ్లారా చూడ‌క‌ముందే క‌రోనా కాటేసింది.

May 3, 2021 / 08:51 PM IST

పంచాయ‌తీ విజ‌యం చూడ‌క‌ముందే ముగ్గుర్ని కాటేసిన క‌రోనా

ఆగ్రా : ఉత్త‌ర‌ప్ర‌దేశ్‌లో ఇటీవ‌లి పంచాయ‌తీ ఎన్నిక‌ల్లో విజ‌యం సాధించిన ముగ్గురు అభ్య‌ర్థులు త‌మ విజ‌యాన్ని క‌ళ్లారా చూడ‌క‌ముందే క‌రోనా కాటేసింది. ఎన్నో రోజులుగా ఎన్నిక‌ల్లో విజ‌యం కోసం అల్లాడిన వారు.. తీరా విజ‌యం అందుకునే స‌మ‌యానికి కాన‌రాని లోకాల‌కు ప‌య‌న‌మ‌య్యారు. ఒకరు ఓట్ల లెక్కింపుకు ఆరు రోజుల ముందు చ‌నిపోగా.. మరొకరు మూడు రోజుల క్రితం, ఇంకొక‌రు ఓట్ల లెక్కింపు ప్రారంభం కాక‌ముందే క‌న్నుమూశారు.

ఆగ్రా జిల్లా ప‌రిధిలోని ఖండౌలి బ్లాక్‌కు చెందిన కుబేర్‌పూర్ గ్రామ పంచాయతీకి పోటీ చేసిన‌ జస్వీర్ సింగ్ 202 ఓట్ల మెజార్టీతో గెలుపొందారు. ఈ గ్రామ పంచాయతీ ఓట్లను సోమవారం లెక్కించారు. అయితే, అతను మూడు రోజుల ముందే విజ‌యాన్ని చూడ‌కుండా క‌న్నుమూశాడు. కరోనా సోకి చాలా రోజులు ద‌వాఖాన‌లో పోరాడి తుదిశ్వాస విడిచాడు.

అలాగే, ఫతేపూర్ సిక్రీకి చెందిన రసూల్‌పూర్ గ్రామ పంచాయతీ నుంచి బాబులాల్ ఫౌజీ విజయం సాధించాడు. ఇతను కూడా కరోనా కారణంగా వారం క్రితం మంచాన ప‌డి ఆరు రోజుల క్రితం ఏప్రిల్ 25 న మరణించాడు. భారత సైన్యం నుంచి పదవీ విరమణ చేసిన బాబులాల్‌.. దక్షిణాచల్ విద్యుత్‌ విత్రాన్ నిగమ్‌కు చెందిన ఫతేపూర్ సిక్రీ విద్యుత్ కేంద్రంలో కాంట్రాక్ట్ కార్మికుడిగా పనిచేశారు. ఇటీవ‌లి పంచాయ‌తీ ఎన్నిక‌ల్లో త‌న గ్రామం ర‌సూల్‌పూర్ నుంచి బ‌రిలో నిలిచారు.

ఇదేవిధంగా, ఖండౌలి బ్లాక్ నుంచి వార్డు స‌భ్యురాలిగా పోటీ చేసిన యాస్మిన్ ష‌కీల్ కూడా ఎన్నిక‌ల్లో గెలుపును ఆస్వాదించ‌కుండానే క‌న్నుమూసింది. రెండు రోజుల క్రితం క‌డుపులో నొప్పితో స్థానిక ద‌వాఖాన‌లో చేరింది. కాగా, ఆదివారం ఉద‌యం కౌంటింగ్‌కు ఏర్పాట్లు చేస్తుండ‌గా మ‌రోవైపు ఈమె తుదిశ్వాస విడిచింది. అయితే, యాస్మిన్ ష‌కీల్ క‌రోనాకు గుర‌వ‌డం వ‌ల్ల‌నే చ‌నిపోయింద‌ని గ్రామ‌స్థులు చెప్తున్నారు.