అందిన ద్రాక్ష.. ఆరోగ్యం!

సీజన్‌ వచ్చిందంటే చాలు.. ద్రాక్ష పండ్లను తినకుండా ఉండలేం. వీటివల్ల అనేక లాభాలు. ఆకుపచ్చ, నలుపు, ఊదా.. ద్రాక్ష వివిధ రంగుల్లో, రూపాల్లో లభిస్తాయి. గింజలతో, గింజలు లేకుండానూ వస్తాయి. అలాగే ఎండు ద్రాక్ష వల్ల కూడా ఎన్నో ప్రయోజనాలు. ఇతర పండ్లలాగే వీటిలోనూ విటమిన్స్‌, మినరల్స్‌ పుష్కలం.

• చర్మానికి ద్రాక్ష ఎంతో మేలు చేస్తుంది. ద్రాక్ష రసంతో ముఖానికి ప్యాక్‌ వేసుకోవడం వల్ల చర్మం మృదువుగా మారుతుంది.
• ద్రాక్షలో యాంటీ ఆక్సిడెంట్స్‌ అపారం. కెరోటెనాయిడ్స్‌ నుంచి పాలీఫెనాల్స్‌ వరకు వివిధ సూక్ష్మపోషకాలు క్యాన్సర్‌ను నివారిస్తాయి. గుండెకు మేలు చేస్తాయి.
• వంద గ్రాముల ద్రాక్షలో 191 మిల్లీగ్రాముల పొటాషియం ఉంటుంది. ఇది అధిక రక్తపోటు, అధిక కొవ్వు, గుండె జబ్బులను తగ్గించేందుకు తోడ్పడుతుంది.
• వీటిలో ఫైబర్‌, పొటాషియం, విటమిన్స్‌, మినరల్స్‌ అపారం.
• మధుమేహ వ్యాధిగ్రస్తులకూ ద్రాక్ష పండ్లు ఉపకరిస్తాయి.
• ద్రాక్షలో అధికశాతం నీళ్లు ఉండటంవల్ల శరీరం డీహైడ్రేట్‌ కాకుండా చేస్తాయి. అలాగే కడుపు ఉబ్బరం, మలబద్ధకం సమస్యలను దూరం చేస్తాయి.
• ఇందులోని ల్యుటీన్‌, జిక్సాంథిన్‌ వంటి యాంటీ ఆక్సిడెంట్స్‌ కంటి ఆరోగ్యాన్ని కాపాడతాయి.
• ద్రాక్షలోని క్యాల్షియం దంతాలకు మేలు చేస్తుంది. సీజన్‌లో ఈ అద్భుత ఫలాన్ని తప్పక ఆరగించండి. మీ ఆత్మీయులకూ పంచండి.

• ఇలా తినొచ్చు..
• ఫ్రూట్‌ సలాడ్‌, శాండ్‌విచ్‌లలో ద్రాక్ష పండ్లను చేర్చుకోవచ్చు.
• చీజ్‌తో కలిపి తినొచ్చు.
• కేక్‌, కస్టర్డ్‌లో ద్రాక్ష తరుగును వాడొచ్చు.
• ద్రాక్ష రసం లేదా స్మూతీని పిల్లలు ఎక్కువగా ఇష్టపడతారు.
• వివిధ స్వీట్లలో ఎండు ద్రాక్షను వేసుకోవచ్చు. పెరుగన్నం లోనూ కలుపుకోవచ్చు.

–మయూరి ఆవుల, న్యూట్రిషనిస్ట్‌,
Mayuri@trudiet.in